Türk milləti tarixən mərdliyi, qorxmazlığı, Vətən torpağına bağlılığı ilə seçilib. 44 günlük Vətən müharibəsi Türkün gücünü bütün dünyaya nümayiş etdirdi. Ölkə başçısı, müzəffər Ali Baş Komandan İlham Əliyev bütün siyasi, beynəlxalq təzyiqlərə baxmayaraq, Azərbaycanın haqq mübarizəsini möhtəşəm tarixi qələbə ilə yekunlaşdırdı. 44 gün ərzində Azərbaycan xalqı nəinki ərazi bütövlüyünü bərpa etdi, eyni zamanda milli kimliyini, məğrurluğunu nümayiş etdirdi. Bir ömrə bərabər 44 gün ərzində xalqımız Liderinin ətrafında “dəmir yumruq” kimi birləşdi, Ordumuz 300-dən çox yaşayış məntəqəsini işğaldan azad etdi və əzəli düşmənimizi “iti qovan kimi” Azərbaycan torpaqlarından qovdu. Azərbaycan xalqı müzəffər və vətənpərvər xalq olduğunu bir daha sübut etdi.
Azərbaycanın qəhrəman əsgər və zabitləri xalqımıza böyük fəxarət yaşatdılar. 44 gün ərzində hər gün irəli gedən Azərbaycan Ordusunun uğurları, yeni qələbələri hər birimizin sevinc gözyaşlarına səbəb oldu. Təəssüf ki, müharibə itkisiz olmur. Müharibədə itirdiyimiz oğullar, Qələbə Şəhidlərimiz xalqımız üçün tarixi zəfər müjdəçisi oldular. Hər bir Şəhidin evinə getdikdə böyük bir qürur hissi keçirirsən, fərəhlənirsən ki, bu Vətənin belə igid, belə vətənpərvər ailələri var.
44 günlük Vətən müharibəsi Azərbaycanın şanlı tarixinə, qəhrəmanlıq dastanına çevrildi. Bir yumruq kimi birləşən xalq əzəli düşmənimizin başını əzdi. Yüksək vətənpərvərlik ruhunda böyüyən Azərbaycan gəncliyi atalarının və babalarının qisasını düşməndən layiqincə aldı. Biz fəxr edirik ki, bu torpağın övladlarıyıq. Fəxr edirik ki, döyüş meydanında öz haqqımızı bərpa etdik, düşməni məğlub etdik və bundan sonra biz müzəffər xalq kimi, qalib ölkə kimi əbədi yaşayacağıq.
Səfərova Könül
132-134 nömrəli Təhsil Kompleksinin İngilis dili müəllimi
