132-134 nömrəli Təhsil Kompleksində bütün tədris ili ərzində siniflərdə müsbət psixoloji auranın yaranması və qorunması istiqamətində Kompleksin psixoloqları tərəfindən sistemli fəaliyyət təşkil olunur.
Məktəbdə psixoloji xidmət fəaliyyətinin perspektiv istiqamətlərindən biri hər bir şagirdin inkişafı, onda yaradıcı həyata psixoloji hazırlıq formalaşdırılmasıdır. Məktəbdə psixoloji xidmətin səviyyəsini artırmaq üçün ibtidai siniflərdən başlayaraq bütün yaş qrupları üzrə siniflərdə məktəblilərlə xüsusi təşkilat saatları keçirilir, Kompleksin psixoloqları şagirdlərlə ünsiyyətdə olurlar.
Bu təşkilat saatlarında psixoloqun köməyi ilə şagirdlərin həm əqli, həm də şəxsi imkanları aşkara çıxarılır. Bu zaman diaqnostik işlər aparılır, şagirdin sinif yoldaşları ilə qarşılıqlı münasibətləri, uşağın məktəbə hazırlığı, ibtidai məktəbdən orta məktəbə keçməyə hazırlıq və s. məsələlərin keyfiyyətlə həll olunmasına nail olunur.
Bu gün, Təhsil Kompleksinin psixoloqu Quliyeva Aytən “3 a – Sağlam təhsil” sinifində Həyat bilgisi dərsində məktəblilərlə görüşdü və onlarla yaradıcılıq qabiliyyətlərinin, idrak proseslərinin inkişaf etdirilməsi məqsədilə intellektual oyunlar və test sorğuları keçirdi.
Şagirdlərin böyük marağına səbəb olan dərsdə psixoloq məktəbliləri yaxından müşahidə etmək, onların davranışındakı müsbət və mənfi keyfiyyətləri görmək imkanı əldə etdi.
Bu formatda təşkil olunan dərslərdə uşaqların davranışında və təhsilində irəliləyişlər olur, onların özlərinə güvəni yüksəlir, uğurları günü-gündən artır.
