Category: XƏBƏRLƏR

Aprelin 14-də 132-134 nömrəli Təhsil Kompleksində ənənəvi “Fransa günü” keçirildi. Tədbirdə Fransanın Azərbaycandakı Səfiri Zakari Qros, Azərbaycan Respublikası Təhsil Nazirliyinin Beynəlxalq əməkdaşlıq şöbəsinin Beynəlxalq əlaqələr sektorunun müdiri İlqar Dadaşov, Azərbaycan-Fransız Universitetinin icraçı direktoru Vazeh Əskərov, Azərbaycan Respublikası Milli Olimpiya Komitəsinin marketinq idarəsinin rəisi Mehman Kərimov, APFAZ-ın sədri, Təhsil Problemləri İnstitunun fransız dili üzrə koordinatoru Gülbəniz Camalova, Bakı Dövlət Universitetinin Alman-Fransız kafedrasının dosenti Azelma Həsənova, eləcə də Səbail rayon İcra Hakimiyyətinin, Azərbaycan Dillər Universitetinin nümayəndələri və dəvət olunan çoxsaylı qonaqlar iştirak etdilər.

Qonaqlar ilk öncə Təhsil Kompleksinin şagirdlərinin və “Kiçik Akademiya” üzvlərinin “Qarabağ Azərbaycandır!” tədqiqat layihəsi, eləcə də Azərbaycanın bölgələrinin təbii sərvətlərinin öyrənilməsi üzrə keçirilən digər layihələr çərçivəsində hazırladıqları əl işlərindən ibarət sərgi ilə tanış oldular.

Daha sonra Kompleksin Akt zalında “Fransa günü” ilə bağlı tədbir keçirildi.

Tədbiri açıq elan edərək qonaqları salamlayan 132-134 nömrəli Təhsil Kompleksinin direktoru Sara Xanlarova Azərbaycanda ilk dəfə olaraq Avropa (Fransa) modeli olan “Ana məktəb” layihəsinin (The Maternal School) məhz Təhsil Kompleksi nəzdində fəaliyyətə başlaması, Kompleksin 2011-ci ildən etibarən Fransanın məşhur “Ecole de Roshes” məktəbi ilə qardaşlaşmış məktəblər layihəsi çərçivəsində sıx əməkdaşlığı, “Ana məktəb” layihəsi üzrə Kompleksdə dərs deyən müəllimlərin və təhsil alan şagirdlərin dəfələrlə Fransada təlimlərdə iştirakı, hər il Frankofoniya həftəsi ərzində 132-134 nömrəli Təhsil Kompleksində Fransanın Azərbaycandakı Səfirinin iştirakı ilə keçirilən “Fransa günləri”, Kompleksin Azərbaycan-Fransız Universiteti (UFAZ) və Olimpiya Mədəniyyəti və Təhsil Proqramı (OCEP) ilə birgə fəaliyyəti, Kompleksdə Fransız dilinin öyrənilməsinə olan yüksək maraq və bu istiqamətdə görülən işlər, əldə olunan nailiyyətlər haqqında danışdı.

Tədbirdə ötən illərdə 132-134 nömrəli Təhsil Kompleksində keçirilən “Fransa günləri”ndən kadrların nümayiş olunduğu videoçarx təqdim olundu.

Tədbirdə Fransanın Azərbaycandakı Səfiri Zakari Qros, Azərbaycan Respublikası Təhsil Nazirliyinin Beynəlxalq əməkdaşlıq şöbəsinin Beynəlxalq əlaqələr sektorunun müdiri İlqar Dadaşov, Azərbaycan-Fransız Universitetinin icraçı direktoru Vazeh Əskərov, Azərbaycan Respublikası Milli Olimpiya Komitəsinin marketinq idarəsinin rəisi Mehman Kərimov və Səbail rayon İcra Hakimiyyətinin İctimai-siyasi və humanitar məsələlər şöbəsinin müdir müavini Talıbov Şahin çıxış etdilər. Çıxışlarda Azərbaycan-Fransa diplomatik əlaqələrinin inkişafı, 132-134 nömrəli Təhsil Kompleksinin Azərbaycanda Fransız dilinin inkişafı istiqamətində gördüyü işlər və bu fəaliyyətə mühüm töhfələrindən bəhs edildi. Kompleksin şagirdlərinin müxtəlif layihə və müsabiqələrdə Fransanın tarixi, dili, mədəniyyətinin təbliği ilə bağlı gözəl çıxışları xüsusi vurğulandı.

Tədbirin bədii hissəsində Təhsil Kompleksinin şagirdləri Fransa mədəniyyətinin müxtəlif nümunələrinə həsr olunan ədəbi-bədii kompozisiya ilə çıxış etdilər, Fransız dilində mahnılar oxudular, şerlər səsləndirdilər, səhnəciklər nümayiş etdirdilər, eyni zamanda Azərbaycan şairi və mütəfəkkiri Nizami Gəncəvinin “Xəmsə”sindən şer nümunələrini, səhnəcikləri Azərbaycan dilində ifa etdilər, Azərbaycanla bağlı mahnılar oxudular və səhnədə Azərbaycan-Fransa dostluğu və mədəni əməkdaşlığının əyani nümunəsini göstərdilər.

132-134 nömrəli Təhsil Kompleksində keçirilən “Fransa günü” xoş xatirələr, rəngarəng səhnəciklər, məktəblilərin maraqlı çıxışları və iştirakçı qurumların gələcək əməkdaşlıq istiqamətlərinin müəyyənləşdirilməsi ilə yadda qaldı.

Bu gün, 132-134 nömrəli Təhsil Kompleksi və Robot Texnologiyaları, Proqramlaşdırma, Mühəndislik və Rəqəmsal İncəsənət üzrə peşəkar təlimlər təklif edən “Mars Academy” şirkətinin birgə təşkilatçılığı ilə 12 Aprel – Beynəlxalq Kosmonavtika Günü münasibətilə Kompleksimizin şagirdləri üçün “Veb proqramlaşdırma” mövzusunda master-klass təşkil olundu.

Master-klass çərçivəsində “Mars Academy”nin peşəkar təlimçilərinin rəhbərliyi ilə 7-8-9-cu sinif şagirdləri müstəqil şəkildə veb-saytların yaradılması və dizaynı üzrə təlim keçdilər.

Məktəblilərin böyük marağına səbəb olan təlim həm maraqlı, həm öyrədici oldu.

“Mars Academy” şirkətinə yüksək səviyyədə təşkil olunmuş təlim üçün təşəkkür edirik.

Bu gün, 5-ci sinif şagirdləri üçün “Sağlam qidalanma” ilə bağlı maarifləndirici dərs keçirilib. “Sağlam qida – sağlam həyat tərzidir!” mövzusunda keçirilən maarifləndirici dərsin əsas məqsədi şagirdləri düzgün qidalanma yolları ilə tanış etmək, onlara sağlam və zərərli qidalar haqqında məlumat verməkdən ibarət olub.

Biologiya müəllimləri məktəblilərə sağlam qidalar haqqında məlumat verərək, qidalanmanın bir vərdiş olduğunu vurğulayıblar.

132-134 nömrəli Təhsil Kompleksinin Rus bölməsi “6 a” sinif şagirdləri “Azərbaycanın Milli Parkları və Dövlət Təbiət Qoruqları” mövzusunda tədqiqat layihəsinin təqdimatını keçirdilər. Layihə Kompleksin biologiya və həyat bilgisi müəllimi Rübabə Səmədovanın rəhbərliyi ilə reallaşdırılmışdır.

Layihə çərçivəsində aparılmış tədqiqatın nəticələrinə əsasən şagirdlər komandalar formatında aşağıdakı təbii qoruqlar üzrə təqdimatlar etdilər:

1) Komanda 1: Zaqatala və Bəsitçay Dövlət Təbiət Qoruqları;

2) Komanda 2: İlisu və Qarayazı Dövlət Təbiət Qoruqları;

3) Komanda 3: Göygöl Milli Parkı və İsmayıllı Dövlət Təbiət Qoruğu;

4) Komanda 4: Qızılağac Milli Parkı və Qaragöl Dövlət Təbiət Qoruğu;

5) Komanda 5: Şirvan və Şahbuz Dövlət Təbiət Qoruqları;

6) Komanda 6: Türyançay və Pirqulu Dövlət Təbiət Qoruqları.

Şagirdlər layihə çərçivəsində Azərbaycanın təbii zənginliyini təşkil edən və xüsusi ekoloji, estetik və sağlamlaşdırma əhəmiyyəti daşıyan təbiət komplekslərindən və obyektlərindən ibarət olan, nadir və nəsli kəsilmək təhlükəsi qarşısında olan bitki və heyvan növlərinin yayıldığı və xüsusi qorunan təbiət əraziləri – Azərbaycanın Milli Parkları və Dövlət Təbiət Qoruqları mövzularında maraqlı təqdimatlar, maketlər, şəkillər hazırladılar, bukletlər çap etdirdilər.

Təqdimatlarda məktəblilər hər bir Milli Park və Dövlət Təbiət Qoruğunun yaranma tarixi, təbii zənginlikləri, fauna və florası haqqında ətraflı məlumatlar verdilər.

Bu gün 132-134 nömrəli Təhsil Kompleksində “IB (International Baccalaureate/Beynəlxalq Bakalavriat) Diplom Proqramı” üzrə təhsil alan şagirdlərimizin təşkilatçılığı və iştirakı ilə Novruz şənliyi – Bayram tədbiri keçirildi.

IB şagirdləri Novruz simvollarına, milli adət-ənənələrimizə dair Azərbaycan və İngilis dillərində səhnəciklər nümayiş etdirdilər, mahnılar ifa etdilər, şerlər səsləndirdilər, rəqslər etdilər, həm özləri əyləndilər, həm də bütün izləyici müəllim və şagirdlərə əsl bayram əhval-ruhiyyəsi yaşatdılar.

Qeyd edək ki, 132-134 nömrəli Təhsil Kompleksi “IB dünya məktəbi” statusuna malik olan qlobal məktəblər şəbəkəsinin üzvüdür.

Martın 4-də 132-134 nömrəli Təhsil Kompleksində İdman Həftəsi çərçivəsində keçirilən yarışların qaliblərinin mükafatlandırılma mərasimi keçirildi.

Mükafatlandırma mərasimində Kompleksdə bütün bölmələrin şagirdləri arasında keçirilən “Olimpiya oyunları uşaqların gözü ilə” STEAM, əl işləri və rəsm müsabiqələri qaliblərinin əsərləri nümayiş olundu.

Tədbirdə Kompleksin II-IV sinif şagirdləri gimnastika nümunələri ilə çıxış etdilər.

Mərasimdə  İdman Həftəsi çərçivəsində Kompleksdə keçirilən bütün yarışların – 9-cu sinif şagirdləri arasında Basketbol yarışı, 10-11-ci sinif şagirdləri arasında qızlar və oğlanlar arasında Voleybol yarışları,  “Ən sürətli şagird – qaçış yarışı”, 4 və 7-ci siniflər arasında “Şən startlar – estafet” yarışı, “Olimpiya oyunları uşaqların gözü ilə” STEAM, əl işləri və rəsm müsabiqələri, esse yarışması, qol güləşi yarışması və digər müsabiqələr üzrə müxtəlif nominasiyaların qalibləri mükafatlandırıldı.

Bütün şagirdlərimizi İdman Həftəsindəki uğurlu çıxışları münasibətilə təbrik edir, yaxından iştirakları üçün onlara təşəkkür edir və şagirdlərimizə gələcəkdə yeni-yeni təhsil və idman uğurları arzu edirik.

Martın 3-də 132-134 nömrəli Təhsil Kompleksində İdman Həftəsi çərçivəsində Olimpiya oyunları və sağlam həyat tərzi mövzularında Kompleksin Rus bölməsi üzrə bütün 7-ci sinif şagirdlərinin hazırladığı tədqiqat layihəsi təqdim olundu.

Kompleksin təlim-tərbiyə işləri üzrə direktor müavini İlahə Həsənlinin ümumi rəhbərliyi ilə həyata keçirilmiş layihə çərçivəsində bütün 7-ci sinif şagirdləri (“7 a”, “7 b”, “7 d”, “7 f” və “7 e”) Olimpiya oyunları və sağlam həyat tərzi mövzularında müstəqil araşdırmalar apardılar, müxtəlif maketlər düzəltdilər, rəsmlər çəkdilər, elektron təqdimatlar, videoçarxlar hazırladılar. Şagirdlər komandalar şəklində maraqlı və fərqli təqdimatlarla çıxış etdilər.

Qeyd edək ki, mövzu üzrə maketlər şagirdlərin STEAM dərslərindən qazandıqları biliklər əsasında hazırlanmışdır.

Layihənin reallaşmasında iştirak edən bütün müəllimələrə, 7-ci siniflərin sinif rəhbərlərinə – Əliyeva Lalə (“7 a”), Hüseynova Kəmalə (“7 b”), Əliyeva Rəna (“7 e”), Quliyeva Nuranə (“7 d”), Manafova Fəridə (“7 f”) və gözəl təqdimatlarla çıxış edən şagirdlərimizə təşəkkür edirik.

“Yol hərəkətinin təhlükəsizliyi sahəsində təbliğat-təşviqat işinin təşkili ilə bağlı 2020-2023-cü illər üçün” Tədbirlər Planının icrası istiqamətində 132-134 nömrəli Təhsil Kompleksində “Yol-nəqliyyat hadisələri zamanı görülən tədbirlər və ilk tibbi yardım” mövzusunda maarifləndirici dərs təşkil olundu.

Məktəblilər yol-nəqliyyat hadisələri və digər bədbəxt hadisələr zamanı xəsarət alanlara vaxtında və düzgün ilk yardım göstərilməsi qaydaları, təcili tibbi yardım maşını gələnə qədər qəza yerində davranış qaydaları, ilk yardımın həyat xilası üçün əhəmiyyəti haqqında məlumatlandırıldılar.

Fevralın 25-də 132-134 nömrəli Təhsil Kompleksində Xocalı soyqırımının 30-cu ildönümünə həsr olunan tədbir keçirildi.

Anım tədbirində XX əsrin ən dəhşətli faciələrindən biri, bəşəriyyətə və insanlığa qarşı törədilmiş ağır cinayət olan Xocalı soyqırımı qurbanlarının əziz xatirəsi yad olundu, Azərbaycan xalqının qan yaddaşına həkk olunan 26 fevral 1992-ci il tarixli görünməmiş vəhşət gecəsində qarlı meşələrdə yüzlərlə vətəndaşımızı xilas etməyə nail olan, xain düşmənlə sona qədər mübarizə aparan və müqəddəs amal uğrunda qəhrəmancasına Şəhid olan xalqımızın igid oğul və qızlarının mübarizlik ruhu, fədakarlığı və əbədiyaşar xidmətlərinə həsr olunan ədəbi-bədii kompozisiya təqdim olundu.

İlk öncə Dövlət Himni səsləndirildi. Sonra Azərbaycan xalqına qarşı xüsusi amansızlıqla törədilmiş Xocalı soyqırımı qurbanlarının əziz xatirəsi bir dəqiqəlik sükutla yad edildi.

Anım tədbirində 132-134 nömrəli Təhsil Kompleksinin şagirdləri Xocalı soyqırımının 30-cu ildönümünə həsr olunan ədəbi-bədii kompozisiya ilə çıxış etdilər. Kompozisiyada məktəblilər Azərbaycan xalqının qanayan yarası olan Xocalı faciəsi ilə bağlı duyğularını, xalqımızın hüznünü, ağrısını, eyni zamanda 44 günlük tarixi Vətən müharibəsində Xocalı qətliamını törədən erməni qəsbkarlarından artıqlaması ilə alınan intiqamımızdan sonra hiss olunan ümumxalq qüruru məharətlə ifa etdikləri şerlərdə, mahnılarda və səhnəciklərdə təqdim etdilər. Tədbirdə Heydər Əliyev Fondunun vitse-prezidenti Leyla xanım Əliyevanın təşəbbüsü ilə “Xocalıya ədalət!” beynəlxalq kampaniyası çərçivəsində görülən genişmiqyaslı işlər barədə və Azərbaycan xalqının qələbə əzminin və əzəli düşmənimizdən döyüş meydanında alınan qisasın təccəssümü olan 44 günlük Vətən müharibəsinə həsr olunan videoçarxlar nümayiş olundu.

Çıxış edən Kompleksin direktoru Sara Xanlarova bildirdi ki, Azərbaycan xalqı 25-26 fevral tarixlərini hər il böyük hüzün və ağrı ilə yad edir. Lakin 44 günlük Vətən müharibəsindən sonra biz təqvimdəki hər tarixi öncəki illərdən fərqli tərzdə qeyd edirik. Vətən müharibəsi çoxəsrlik tarixində çox ağrı-acılara şahid olmuş Azərbaycan xalqının qalib və əzəli düşmənindən qisası alınmış, tarixinə, soy kökünə bağlı mübariz xalq olduğunu sübut etdi. Qeyd olundu ki, əsrin, tarixin ən böyük faciəsi olan Xocalı soyqırımının 30-cu ildönümündə biz hər il olduğu kim Xocalı qurbanlarını eyni ürək ağrısı və hüzünlə yad edir, onların ruhları qarşısında baş əyir, bir daha Azərbaycan xalqının qəhrəmanlığına və fədakarlığına şahidlik edirik. S.Xanlarova Xocalı qətliamına ilk siyası qiymətin Ulu Öndər Heydər Əliyev tərəfindən verildiyini vurğulayaraq dünyada Xocalı soyqırımına layiqli qiymət verilməsi istiqamətində möhtərəm Prezidentimiz İlham Əliyev, Respublikamızın Birinci vitse-prezidenti Mehriban xanım Əliyeva, Heydər Əliyev Fondunun vitse-prezidenti Leyla xanım Əliyeva tərəfindən həyata keçirilən çoxşaxəli işlər, genişmiqyaslı təbdirlər haqqında məktəblilərə ətraflı məlumat verdi. Xüsusi qeyd olundu ki, 44 günlük Vətən müharibəsi Xocalı Şəhidlərinin, Birinci Qarabağ müharibəsi Şəhidlərinin, xalqımızın günahsız qurbanlarının intiqamının əzəli düşmənimizdən artıqlaması ilə alındığı qəhrəmanlıq dastanı oldu. Ulu Öndər Heydər Əliyev tərəfindən əsası qoyulan və Azərbaycan xalqının milli mənafelərinə xidmət edən siyasi kurs ölkə başçısı İlham Əliyev tərəfindən uğurla davam etdirilir. Möhtərəm Prezidentimiz, Müzəffər Ali Baş Komandan, Qalib Sərkərdə və Azərbaycanın tarixi qəhrəmanı İlham Əliyev 30 illik məsafəni igid əsgər və zabitlərimiz, güclü Ordumuzla 44 gün ərzində qət etdi və tarixi ədalət zəfər çaldı, Azərbaycan xalqının günahsız qurbanlarının qisası döyüş meydanında alındı.

132-134 nömrəli Təhsil Kompleksində gənc nəslin yüksək vətənpərvərlik və milli ruhda təlim-tərbiyəsinə hər zaman xüsusi diqqət göstərildiyini qeyd edən S.Xanlarova bildirdi ki, Bakının tarixi məktəbləri olan 132 və 134 nömrəli məktəblərin məzunları Birinci Qarabağ müharibəsində qəhrəmancasına iştirak ediblər, Azərbaycanın Milli Qəhrəmanı Riad Əhmədov 134 nömrəli məktəbin məzunu olub. 44 günlük Vətən müharibəsində Kompleksimizin üç nəfər məzunu qəhrəmancasına Şəhid olub. Bu şərəfli tarix və Kompleksimizin Vətənin müdafiəsinə, Azərbaycanın müstəqilliyinə töhfələri bu gün 132-134 nömrəli Təhsil Kompleksinin bütün müəllim-şagird kollektivinin qürur mənbəyidir. S.Xanlarova diqqətə çatdırdı ki, bu gün biz qalib ölkənin vətəndaşlarıyıq. 44 günlük Vətən müharibəsi xalqımızın əzmkarlığının, qəhrəmanlığının, gənclərimizin dövlətinə, xalqına, millətinə sevgisi, yüksək vətənpərvərliyinin təcəssümü, eyni zamanda tarixboyu Azərbaycan xalqına qarşı erməni qəsbkarları tərəfindən törədilmiş qanlı cinayətlərə layiqli cavab oldu.

Direktor məktəblilərə tariximizi yaxşı öyrənməyi, Vətənimizə, torpağımıza böyük sevgi və sədaqət ruhunda böyüməyi, dərslərini əla oxuyaraq savadlı kadrlar kimi formalaşmağı və Vətəninə layiqli xidmət etməyi, Azərbaycanın ildən-ilə inkişafı və qüdrətlənməsinə töhfələr verməyi tövsiyə etdi.

Allah bütün Şəhidlərimizə rəhmət eləsin! Xocalı soyqırımında həlak olan soydaşlarımızı ehtiramla yad edirik. Xocalıya ədalət!

Fevralın 24-də “Sabahın alimləri” XI Respublika müsabiqəsinin onlayn bağlanış mərasimi keçirildi və müsabiqənin qalibləri elan olundu.

132-134 nömrəli Təhsil Kompleksinin şagirdləri Əlizadə Cavidan Vüsal oğlu (XI sinif, “11 c”) və Əhmədova Səbinə Xudaverdi qızı (X sinif, “10 b”) “Sabahın alimləri” XI Respublika müsabiqəsində Tibb və sağlamlıq istiqaməti üzrə III yerin qalibi oldular. Mövzu: “Orqanizmin lipid mübadiləsinin təbii mənşəli birləşmələr ilə korreksiyası”.

Cavidan və Səbinəni bu yüksək nailiyyət münasibətilə təbrik edir, gələcəyin alimləri olan şagirdlərimizə yeni-yeni elmi nailiyyətlər və təhsil uğurları arzu edirik.