132-134 nömrəli Təhsil Kompleksində Rus bölməsi 6-cı sinif şagirdlərinin iştirakı və Kompleksin Tarix müəllimlərinin rəhbərliyi ilə “Qədim Yunan tarixi” mövzusunda bilik yarışması-viktorina təşkil olundu.
Rus bölməsi “6 a”, “6 b”, “6 c” və “6 d” siniflərini təmsil edən 4 komandanın yarışdığı viktorinanın qalibi “6 a” sinif şagirdlərindən ibarət “Zevs” komandası oldu.
Viktorina qaliblərinə və bütün iştirakçılara həvəsləndirici hədiyyələr təqdim olundu.
Mayın 10-da müstəqil Azərbaycan dövlətinin memarı və qurucusu, Ümummilli Lider Heydər Əliyevin anadan olmasının 99-cu ildönümü münasibəti ilə Təhsil Kompleksimizin ibtidai siniflərində ilk dərslər Ulu Öndər Heydər Əliyevin həyat və fəaliyyətinə həsr olundu.
Birincilərimiz üçün Kompleksin “Ulu Öndər Heydər Əliyev” Muzeyinə ekskursiyalar təşkil olundu. Müəllimələr şagirdlərə xalqımızın Ümummilli Liderinin həyat yolu və zəngin siyasi irsi barədə geniş məlumat verdilər.
Mayın 10-da 132-134 nömrəli Təhsil Kompleksində müstəqil Azərbaycan dövlətinin qurucusu, dahi siyasətçi və qüdrətli dövlət xadimi Ulu Öndər Heydər Əliyevin anadan olmasının 99-cu ildönümü münasibətilə “Nə qədər Azərbaycan var, mən də varam!” adlı tədbir keçirildi.
Tədbirdə ilk öncə Dövlət Himni səsləndirildi. Azərbaycan xalqının Ümummilli Lideri Heydər Əliyevin əziz və əbədiyaşar xatirəsi bir dəqiqəlik sükutla yad edildi.
Çıxış edən Kompleksin direktoru Sara Xanlarova müasir müstəqil Azərbaycanın qurucusu Ulu Öndər Heydər Əliyevin şərəfli və xalqına, millətinə həsr olunan ömür yolundan, Azərbaycanda dövlət quruculuğundakı əvəzolunmaz xidmətlərindən, Azərbaycan xalqı və dövlətçiliyi üçün yerinə yetirdiyi xilaskarlıq missiyalarından, ölkə iqtisadiyyatının, təhsilinin, səhiyyəsinin inkişafındakı rolundan, əhalinin yaşayış şəraitinin yaxşılaşdırılması, regionların sosial-iqtisadi inkişafı istiqamətində gördüyü işlərdən danışdı. 1991-ci ildə müstəqilliyini bərpa edən Azərbaycanın sonrakı bir neçə ildə üzləşdiyi parçalanmaq, yox olmaq təhlükələrini xüsusi qeyd edən S.Xanlarova bildirdi ki, xalqın təkidli tələbi ilə Azərbaycanda hakimiyyətə gələn Ümummilli Lider Azərbaycanın müstəqilliyinin qorunması və ölkədəki qardaş qırğınının qarşısının alnması, ölkənin iqtisadi tənəzzüldən dinamik inkişaf, tərəqqi yoluna çıxarılması istiqamətində əsl xilaskarlıq missiyaları yerinə yetirdi. Vurğulandı ki, “Azərbaycan mənim ürəyimdir, Azərbaycan mənim nəfəsimdir, Azərbaycan mənim həyatımdır!” deyən Ulu Öndər bütün həyatını Azərbaycanın tərəqqisi, xalqımızın rifahına həsr etdi və Azərbaycan xalqı üçün Azərbaycançılıq adlı müqəddəs yol qoydu. S.Xanlarova qeyd etdi ki, Ulu Öndər Heydər Əliyevin Azərbaycan xalqı qarşısındakı ən böyük xidmətlərindən biri şah əsəri olan Azərbaycanı sağlığında layiqli siyasi varisi, möhtərəm Prezidentimiz İlham Əliyevə etibar etməsi oldu. 44 günlük Vətən müharibəsində Azərbaycan xalqının möhtəşəm qələbəsi Ulu Öndər Heydər Əliyevin əbədiyaşar ideyalarının və Prezident cənab İlham Əliyevin düşünülmüş və Azərbaycan xalqının milli maraqlarına xidmət edən siyasətinin təntənəsi oldu. Ulu Öndər Heydər Əliyev dünya tarixinin ən məşhur və ən sevilən Liderlərindən biri olub, möhtərəm Prezidentimiz İlham Əliyev bu gün dünyanın ən müasir, ən görkəmli və xalqı ilə birlikdə bir yumruq olmağı bacaran nadir Prezidentdir. Azərbaycan bu gün çox güclüdür, sabah da, gələcəkdə də güclü olmalıdır. Bu məqamda gənc nəslin vəzifələri və məsuliyyəti mühüm amildir. Ulu Öndərin zəngin siyasi irsinin, şərəfli həyat və fəaliyyətinin gənc nəsil tərəfindən öyrənilməsi olduqca önəmlidir. Çünki görkəmli dövlət xadimi, dahi şəxsiyyət Heydər Əliyevin həyat yolu və zəngin irsi, Onun Vətən sevgisi və Azərbaycançılıq məfkurəsi gənc və gələcək nəsillərimiz üçün böyük örnəkdir. Nə qədər Azərbaycan var, Ulu Öndər Heydər Əliyev və Onun ideyaları xalqımız tərəfindən yaşadılacaq, böyük sevgi və ehtiramla yad olunacaqdır.
Tədbirdə Ulu Öndərin həyat yoluna və çoxşaxəli dövlətçilik fəaliyyətinə həsr olunmuş videoçarxlar nümayiş olundu və Kompleksin şagirdləri Azərbaycan xalqının Ümummilli Lideri Heydər Əliyevə həsr olunan ədəbi-bədii kompozisiya ilə çıxış etdilər.
Tədbirdə həmçinin Ulu Öndər Heydər Əliyevin anadan olmasının 99-cu ildönümünə həsr olunan və 132-134 nömrəli Təhsil Kompleksində keçirilən “Nə qədər Azərbaycan var, mən də varam!” adlı qısa inşa müsabiqəsinin qalibləri diplomlarla mükafatlandırıldılar.
132-134 nömrəli Təhsil Kompleksində “ƏZİZ ŞUŞA, SƏN AZADSAN!” adlı tədbir keçirildi.
Tədbirdə müasir hərb tariximizin ən parlaq səhifələrindən biri olan Şuşa əməliyyatının maraqlı detallarının, Şuşa döyüşlərinin iştirakçısı olan cəsur əsgər və zabitlərimizin müsahibələrinin, əməliyyat zamanı çəkilmiş eksklüziv kadrların əks olunduğu “Şuşa, sən azadsan!” sənədli filmi nümayiş olundu. Kompleksin tarix müəllimləri Səmədova Tünzalə, Xəlilova Pərvanə və Abdullayev Elşən 2020-ci ilin noyabrın 8-də əsl sahiblərinə qovuşan və 8 may tarixini məğrur, qalib şəhər kimi qarşılayan Şuşanın tarixi, Azərbaycan, Qarabağ üçün tarixi, coğrafi əhəmiyyəti, bu tarixi şəhərin xalqımız üçün mənəvi dəyəri, Azərbaycan tarixinə əbədi həkk olunan Şuşanın azadlığı və 8 noyabr – Zəfər gününün 44 günlük Vətən müharibəsində dönüş nöqtəsi olması haqqında geniş çıxış etdilər və məktəblilərə ətraflı məlumat verdilər.
Tədbirdə edilən bütün çıxışlarda xüsusi vurğulandı ki, biz bu gün fəxr və qürur hissi ilə deyirik ki, tikilən, qurulan və Azərbaycanın mədəniyyət paytaxtı olan Şuşamız 8 mayı azad şəkildə qarşılayır. 44 günlük Vətən müharibəsində tarix yazan Müzəffər Ali Baş Komandan İlham Əliyevin rəhbərlik etdiyi Azərbaycan ordusu işğalçıları Şuşadan qovaraq bütünlükdə Qarabağı düşmən əsarətindən qurtardı. Azərbaycan Şuşanı əzəli, əbədi sahibinə qaytarmaqla tarixi ədaləti bərpa etdi.
Şuşa Ali Baş Komandan Prezident İlham Əliyev üçün təkcə strateji əhəmiyyətli, döyüşlərin gedişində kulminasiya nöqtəsi sayılacaq vacib şəhər deyildi, həm də sevimli, hər qarışında, daşında tariximizi yaşadan, əsl sahibini səsləyən əzəmətli bir qala idi. Ali Baş Komandan bu qalanı fəth etməklə adını şanlı tarixə yazdı.
Tədbirdə 132-134 nömrəli Təhsil Kompleksinin qəhrəman məzun Şəhidlərinin əziz xatirəsi ehtiramla yad olundu və qeyd olundu ki, 44 günlük Vətən müharibəsi Azərbaycan xalqının vətənpərvərliyinin, igidliyinin, tarixi qəhrəmanlığının və döyüşkən ruhunun Zəfəri oldu. Noyabrın 8-i Zəfər günü kimi Azərbaycan tarixinə əbədi həkk olunub. Bu şərəfli tarixi qorumaq, Vətənimizin adını daim uca tutmaq hər birimizin müqəddəs amalıdır.
Bu gün əziz Şuşamız azaddır. Orada şanlı bayrağımız qürurla dalğalanır. Şuşa hər zaman qürur mənbəyimiz olub, bundan sonra da belə qalacaq!
Bu gün fəxarətlə deyirik ki: “Əziz Şuşa, sən azadsan! Əziz Şuşa, biz qayıtmışıq, biz səni dirçəldəcəyik!”
“Su ehtiyatlarından səmərəli istifadənin təmin edilməsinə dair 2020-2022-ci illər üçün Tədbirlər Planı”nın icrası istiqamətində 132-134 nömrəli Təhsil Kompleksində hər il olduğu kimi, bu il də Kompleksin “Kiçik akademiya”sının üzvləri müxtəlif tədqiqat layihələri təqdim etmişlər.
Kompleksin Rus bölməsi 8-ci sinif şagirdləri 5 komandaya bölünərək bir ay müddətində su resurslarının idarə edilməsi, suya qənaət mövzularında araşdırma aparmış və tədqiqat nəticələrini maraqlı maketlər formatında təqdim etmişlər. Layihə Kompleksin Biologiya və Həyat bilgisi müəllimi Rübabə Səmədovanın rəhbərliyi ilə reallaşdırılmışdır.
Mayın 6-da “Kiçik akademiya” üzvlərinin su ehtiyatlarının idarə olunması, sudan qənaətli və səmərəli istifadə ilə bağlı “Hər dəqiqə suya qənaət et!” adlı maarifləndirici layihəsi təqdim olundu.
Layihə çərçivəsində aparılmış tədqiqatın nəticələrinə əsasən şagirdlər komandalar formatında aşağıdakı mövzular üzrə təqdimatlar etdilər:
Komanda 1: “Yer kürəsinin ən vacib təbii sərvəti – Su”
Komanda 2: “Təbiətdə böyük və kiçik su dövranları”
Komanda 3: “İçməli su ehtiyatlarının azalması təhlükəsi”
Komanda 4: “Suyu qorumaq üçün 5 səbəb”
Komanda 5: “İnsan orqanizmində suyun rolu”
Şagirdlər bu mövzular üzrə maraqlı təqdimatlar, maketlər, şəkillər hazırlamış, bukletlər çap etdirmiş, bu mövzu ilə bağlı fikir mübadiləsi aparmışlar.
Bu gün, görkəmli oftalmoloq alim, Əməkdar elm xadimi, akademik Zərifə xanım Əliyevanın anadan olmasının 99-cu ildönümü tamam olur.
Oftalmologiya elminə verdiyi töhfələri bu gün də aktuallığını saxlayan, biliyi ilə yanaşı, insanpərvərliyi ilə də seçilən Zərifə xanımın həyatı və fəaliyyəti hər zaman Azərbaycan xalqı tərəfindən dərin hörmətlə yad edilir.
Aprelin 28-də 132-134 nömrəli Təhsil Kompleksində akademik Zərifə xanım Əliyevanın anadan olmasının 99-cu ildönümü münasibətilə tədbir təşkil olundu.
Çıxış edən Kompleksin direktoru Sara Xanlarova qeyd etdi ki, Zərifə xanım hər zaman nəcib və ali insani keyfiyyətləri, elmi fəaliyyəti, ən əsası isə insanlara olan sevgisi, xeyirxahlığı ilə böyük məhəbbət və ehtiramla xatırlanır. Görkəmli dövlət və elm xadimi, bütün bilik və bacarığını xalqa xidmətə sərf etmiş Əziz Əliyevin ailəsində dünyaya göz açan Zərifə xanım valideynlərinə layiqli bir övlad, məşhur alim, tanınmış həkim, istedadlı insan, sədaqətli ömür yoldaşı və qayğıkeş ana idi. Vicdanı, əməli pak olan Zərifə xanım oftalmologiya elminin inkişafına böyük töhfələr vermiş və oftalmologiya aləmində ən yüksək mükafata – SSRİ Tibb Elmləri Akademiyasının akademik M.İ.Averbax adına mükafatına layiq görülən ilk qadın həkim olmuşdur.
Zərifə xanım Əliyeva, eyni zamanda müstəqil Azərbaycan dövlətinin memarı və qurucusu, bütün mənalı ömrünü Vətəninin və xalqının tərəqqisinə həsr etmiş dahi şəxsiyyətin – Ümummilli Lider Heydər Əliyevin vəfalı ömür-gün yoldaşı, sədaqətli dostu və etibarlı silahdaşı olmuşdur. Bütün həyatı boyu insanların gözlərinə şəfa verən Zərifə xanım Əliyevaya eyni zamanda həm Prezident xanımı olmaq, həm də Prezident anası olmaq kimi nadir insanlara nəsib olan tale qismət olmuşdur. S.Xanlarova vurğuladı ki, Zərifə xanım sadəliyi və səmimiliyi ilə gözəllik yaradırdı. Məhz bu isti, vətənpərvər ocaqda böyüyüb, boya-başa çatan, Zərifə xanımın ailə tərbiyəsinin, görkəmli dövlət xadimi Ulu Öndər Heydər Əliyevin siyasi məktəbinin layiqli varisi olan möhtərəm Prezidentimiz İlham Əliyev müstəqil Azərbaycanın ən şanlı qələbələrinə imza atır. Ölkə başçısı, müzəffər Ali Baş Komandan İlham Əliyev 30 illik ağrılı münaqişəni siyasi iradəsi və idarəçilik məharəti ilə 44 gündə həll etdi və möhtəşəm Qarabağ Zəfəri Azərbaycan tarixinə qızıl hərflərlə həkk olundu. Vurğulandı ki, ümumtəhsil məktəblərində Azərbaycanın görkəmli şəxsiyyətlərinə həsr olunan tədbirlərin, xatirə günlərinin təşkili gənc və gələcək nəslin tərbiyəsində mühüm əhəmiyyət kəsb edir. Zərifə xanım Əliyevanın zəngin həyat yolu, ali insani keyfiyyətləri, xeyirxahlığı və insan sevgisi kiçikdən-böyüyə hər kəs üçün böyük örnəkdir və gözəl insan Zərifə xanımın işıqlı xatirəsi daima Azərbaycan xalqı tərəfindən ehtiramla yad olunacaqdır.
Tədbirdə görkəmli oftalmoloq alim Zərifə xanım Əliyevanın həyat və fəaliyyəti ilə bağlı videoçarx nümayiş olundu.
“Yol hərəkətinin təhlükəsizliyi sahəsində təbliğat-təşviqat işinin təşkili ilə bağlı 2020-2023-cü illər üçün” Tədbirlər Planının icrası istiqamətində 132-134 nömrəli Təhsil Kompleksində aprelin 26-da Rus bölməsi “6 d” sinif şagirdlərinin iştirakı ilə “Yol nişanları barəsində diqqətli olaq” mövzusunda və yol hərəkətinin təhlükəsizliyi qaydalarının təbliğinə həsr olunmuş açıq dərs və bu sahədə məktəblilərin biliklərini yoxlamaq üçün maraqlı viktorina təşkil olundu.
“6 d” sinif şagirdləri bir ay öncədən 7 komandaya bölünmüş və hər komanda yol hərəkətinin təhlükəsizliyi qaydaları və yol nişanları haqqında müstəqil tədqiqat apararaq öyrəndikləri mövzuları əks etdirən rəsmlər çəkmiş, maketlər hazırlamışdılar. Həmin rəsm və maketlər açıq dərs zamanı nümayiş olundu.
Şagirdlər tərəfindən hazırlanan və yol hərəkətinin təhlükəsizliyi qaydalarını, eləcə də yol nişanlarını düzgün bilməyi təbliğ və təşviq edən maketlər məktəblilər arasında yol mədəniyyətinin daha da inkişaf etdirilməsi və bu mövzuya şüurlu yanaşmanın təmin edilməsinə böyük töhfə oldu. Eyni zamanda, viktorinada məktəblilərə yol hərəkətinin təhlükəsizliyi qaydaları və yol nişanları haqqında biliklərini yoxlayan müxtəlif krossvordlar, rebuslar, izahlı tapşırıqlar və testlər təqdim olundu ki, bu materiallar da ümumtəhsil müəssisələrində bu mövzunun interaktiv və oyun əsaslı öyrədilməsi üçün metodik vasitələr kimi istifadə oluna bilər.
Açıq dərs və viktorina Kompleksin Biologiya və Həyat bilgisi müəllimi Rübabə Səmədovanın rəhbərliyi ilə təşkil olundu.
132-134 nömrəli Təhsil Kompleksinin IB (International Baccalaureate/ Beynəlxalq Bakalavriat Proqramı) 8-ci və 9-cu sinif şagirdləri BMT Modeli Təhlükəsizlik Şurasının iclasını təşkil etdilər.
Beynəlxalq format modelində təşkil olunan tədbirdə “Rusiya-Ukrayna böhranının davamlı həll yollarının tapılması” mövzusu ilə bağlı aktual məsələlər ətrafında intensiv müzakirələr aparıldı.
Məktəblilər müxtəlif ölkələri təmsil edən nümayəndələr qismində çıxış edərək beynəlxalq tədbirdə qlobal mövzularda müzakirələr aparmaq təcrübəsi qazandılar.
Azərbaycan bölməsi “1 b” sinif şagirdi Babazadə Azad 21 ölkənin iştirak etdiyi TIMO Beynəlxalq Riyaziyyat Olimpiadasında ilk üçlüyə düşərək yarışın bürünc medalını və Beynəlxalq Diplomunu qazanıb.
Qeyd edək ki, istedadlı şagirdimiz Azad çoxsaylı respublika və beynəlxalq müsabiqələrdə dəfələrlə qalib olub, təhsil, şahmat və rəsm sahəsində bir çox diplom və medalları var.
Azadı bu yüksək nailiyyətlər və gözəl qələbələr münasibətilə təbrik edir, şagirdimizə gələcəkdə yeni təhsil uğurları və qalibiyyətlər arzu edirik. Təbriklər, Azad!
Lütfi Zadə Məntiq Olimpiadası və Məktəblilərarası VII Fənn Müsabiqələrində Finala vəsiqə qazanan şagirdlərimizi tanıyaq:
– Əliyev Kamal (V “A”)
– Allahverdi Nurəddin (V “A”)
– Mehmood Abdulla (V “A”)
– Mirheydərov Hüseyn (V “A”)
– Cəbrayılzadə İbrahim (V “B”)
– Həbibzadə Mehdi (V “B”)
– Ələkbərzadə Hakansəid (VI “A”)
– Məlikzadə Əli (VI “A”)
– Nəzərli Həcər (VI “A”)
– Yusif Hüseyn (VI “A”)
– Axundova Zəhra (VI “B”)
– Abbaszadə Minayə (VI “B”)
– İskəndər Hidayət (VI “C”)
– Şərifov hüseyn (VI “C”)
– Musalı Ramin (VI “D”)
– Nəsirli Fərhad (VI “D”)
– Mehtiyev Rəhman (VII “A”)
– Musazadə Fəxri (VII “B”)
Hər iki müsabiqədə finalda iştirak etmək hüququ qazanan bütün şagirdlərimizi təbrik edirik və onlara finalda uğurlar arzu edirik!