Category: XƏBƏRLƏR

Fevralın 21-də 132-134 nömrəli Təhsil Kompleksində Bakı Şəhər İcra Hakimiyyətinin “Regional İnkişaf” İctimai Birliyi ilə birgə layihəsi olan, məktəblilər üçün nəzərdə tutulmuş “Bizim böyük Qələbəmiz” kitabının təqdimat mərasimi keçirildi.

Tədbirdə Bakı Şəhər İcra Hakimiyyətinin İctimai-siyasi, humanitar məsələlər və dini qurumlarla iş şöbəsinin müdiri Elmin İmanov, Səbail Rayon İcra Hakimiyyəti başçısının müavini Kəmalə Həşimova, RİHBA-nın Vətən müharibəsi iştirakçıları və şəhid ailələri ilə işin təşkili şöbəsinin müdiri Orxan Aydınov, məktəbin müəllim heyəti və bir qrup şagirdi iştirak etdilər.

Tədbir torpaqlarımızın azadlığı uğrunda canlarını fəda etmiş qəhrəman Vətən övladlarının əziz xatirəsinin bir dəqiqəlik sükutla yad edilməsindən sonra açıq elan olundu.

Tədbiri giriş sözü ilə açan 132-134 nömrəli Təhsil Kompleksinin direktoru Sara Xanlarova çıxış edərək məktəb kollektivi adından qonaqları salamlayaraq məktəbə təqdim olunan kitablara görə öz təşəkkürünü bildirdi.

Bakı Şəhər İcra Hakimiyyətinin İctimai-siyasi, humanitar məsələlər və dini qurumlarla iş şöbəsinin müdiri Elmin İmanov Bakı Şəhər İcra Hakimiyyətinin təşəbbüsü ilə ərsəyə gələn “Bizim böyük Qələbəmiz”, “Böyük Qayıdış”, “Vətən müharibəsinin tarixi” və digər nəşrlərin hər biri barədə tarixi faktlara söykənərək ətraflı məlumat verdi, əldə olunan tarixi Qarabağ Zəfərinin mənəviyyat və insanlığın erməni faşizmi üzərində böyük qələbəsi olduğunu vurğuladı. Elmin İmanov orta məktəblərdə Qarabağ həqiqətləri, Şanlı Qələbəmiz və Müzəffər Ali Baş Komandan, cənab İlham Əliyevin çoxşaxəli siyasi və sərkərdəlik fəaliyyətinin gənclər arasında təbliğinin gücləndirilməsi ilə bağlı verilən tövsiyələrin artıq öz bəhrəsini verdiyini qeyd etdi.

Çıxış edən Səbail Rayon İcra Hakimiyyəti başçısının müavini Kəmalə Həşimova Müzəffər Ali Baş Komandan cənab İlham Əliyevin rəhbərliyi altında Azərbaycan Silahlı Qüvvələrinin işğal altındakı torpaqlarımızın azad edilməsi uğrunda apardığı Vətən Müharibəsinin gələcək nəsillərə tanıdılması üçün hər kəsin öz cəbhəsində töhfələr verməyə çalışdığını, BŞİH-in təşəbbüsü ilə ərsəyə gələn “Bizim böyük qələbəmiz” kitabının da bu mənada müstəsna əhəmiyyətə malik olduğunu tədbir iştirakçılarının diqqətinə çatdırdı. Eyni zamanda Kəmalə Həşimova kitabın, yeniyetmə və gənclərimizin burada əks olunan tarixi şəxsiyyətlər və sərkərdələrimizin, şəhid və qazilərimizin fədakarlığı ruhunda tərbiyə olunması, Zəfərin əldə edilməsindən sonra Azərbaycanı regionda və dünyada öz sözünü qürurla diktə edən lider dövlətə çevrilməsinə zəmin yaradan tarixi faktların və reallıqların, həmçinin müasir qəhramanlıq nümunələrinin öyrənilərək mənimsənilməsi, bu tarixi Qələbədən sonra formalaşan qalib ruhlu yeni cəmiyyətin davamlı olaraq inkişaf etdirilməsi baxımından çox mühüm əhəmiyyət kəsb etdiyi vurğuladı.

Sonra qonaqlar məktəbin şagirdlərinə kitabları təqdim etdilər, onlara Vətən Müharibəsindəki şanlı qələbə barədə ətraflı məlumat verdilər, eyni zamanda şagirdləri maraqlandıran sualları cavablandırdılar.

132-134 nömrəli Təhsil Kompleksi OCEP layihəsində fəal iştirak etdiyinə görə təşəkkür plaketi ilə mükafatlandırılıb. Mükafat MOK-un marketinq şöbəsinin əməkdaşı Mirağa Əliyev  tərəfindən Təhsil Kompleksinə təqdim edilib. Bundan əlavə gələcəkdə layihə ilə bağlı görüləcək işlər də müzakirə edilib.

Yanvarın 21-də 132-134 nömrəli Təhsil Kompleksinin 8-ci sinif şagirdləri üçün səyyar tarix dərsi çərçivəsində xeyriyyəçi Hacı Zeynalabdin Tağıyevin Bakıda metronun “İçərişəhər” stansiyasının qarşısındakı meydanda ucaldılan abidəsinə maarifləndirici ekskursiya təşkil olundu. Ekskursiya zamanı Kompleksin tarix müəllimi Səmədova Tünzalə məktəblilərə XIX əsrin sonu-XX əsrin əvvəllərində yaşamış xeyriyyəçi, maarifpərvər və ictimai xadim Hacı Zeynalabdin Tağıyevin Bakının iri neft sahibkarı kimi Azərbaycanın iqtisadi və mədəni inkişafına yönəlmiş genişmiqyaslı fəaliyyəti, eləcə də özünəməxsus səxavətlə həyata keçirdiyi çoxşaxəli ictimai, maarifçilik və xeyriyyəçilik işləri haqqında ətraflı məlumat verdi. T.Səmədova diqqətə çatdırdı ki, hələ sağlığında “el atası” adını almış H.Z.Tağıyev dəfələrlə Bakı dumasının üzvü seçilmiş, şəhərin mühüm problemlərinin həllində, qərarların müzakirə və qəbul olunmasında iştirak etmişdi. H.Z.Tağıyev nəinki faydalı təkliflərin təşəbbüskarı kimi onlara səs verir, həm də öz vəsaiti ilə bu təkliflərin həyata keçirilməsinə kömək edirdi. Onun təşəbbüsü və birbaşa iştirakı ilə Bakıda ilk teatr binası tikildi, at-dəmir yolu (konka) işə salındı, şəhərin mərkəzində bir sıra dükan və kontorların yerləşdiyi Ticarət evi – Tağıyev pasajı fəaliyyətə başladı. H.Z.Tağıyev Bakıya içməli suyun çəkilməsi layihəsinin hazırlanıb həyata keçirilməsində yaxından iştirak etmişdir. Hələ 1874-cü ildə o, öz vəsaiti hesabına Bakı şəhərinə su kəmərini çəkdirdiyinə görə üzərində “Səyinə görə” yazısı olan gümüş medalla təltif olunmuşdu. H.Z.Tağıyev 1901-ci ildə ingilis mühəndisi V. Lindley tərəfindən yeraltı suların qazılması işlərinə 25 min rubl vəsait ayırımış və 1917-ci ildə Bakıya içməli su gətirən kəmər istifadəyə verilmişdi.

Maarifin, savadlılığın yayılması kimi mühüm problemin həlli H.Z.Tağıyevin ictimai fəaliyyətində geniş yer tuturdu. Hacı ehtiyacı olan şagirdlərə maddi yardım göstərir, ali tədris müəssisələrində təhsil alan onlarla tələbəyə təqaüd verirdi. Həmin tələbələr arasında sonralar görkəmli ictimai və dövlət xadimləri, alimlər, həkimlər, mühəndislər – Həsən bəy Ağayev, Nəriman Nərimanov, Məşədi Əzizbəyov, Əlimərdan bəy Topçubaşov, Nəsib bəy Yusifbəyli, Əziz Əliyev, Ağa Axundov, Qara Axundov, Qarabəy Qarabəyov, Xudadad bəy Məlik-Aslanov, Şahbaz Rüstəmbəyov və başqaları var idi.

H.Z.Tağıyevin gördüyü mühüm işlərdən biri də 1901-ci ildə Bakıda Tağıyevin qız məktəbi adı ilə tanınan, İmperatriçə Aleksandra Fyodorovna adına rus-müsəlman qız məktəbinin açılması idi. Məktəb Şərqdə müsəlman qızlar üçün ilk dünyəvi tədris müəssisəsi olmuşdur. Onun yaradılması üçün H.Z.Tağıyev 1896-cı ildə 150 min rubl ayırmışdı. Ondan 125 min rubl işçi heyət, kitab və dərs ləvazimatı, 25 min rubl isə binanın tikintisi üçün nəzərdə tutulmuşdu. Qız məktəbinin məzunları Azərbaycanın məktəblərində işləmək üçün pedaqoq hazırlanmasının, azərbaycanlı qadınların peşə təhsilinin formalaşmasının əsasını qoydu.

Vurğulandı ki, H.Z.Tağıyev özünün əməlləri, müdrikliyi, xalqının gələcəyinə qayğısı, heyranedici səxavəti, alicənablığı, zamanla ayaqlaşmaq bacarığı ilə nəsillərin yaddaşında silinməz iz qoydu. H.Z.Tağıyevin fəaliyyəti öz layiqli qiymətini yalnız 1980-ci illərin sonunda aldı. Onun adı küçələrə, təhsil, sənaye müəssisələrinə verildi, şərəfinə abidələr ucaldıldı.

Xüsusi olaraq qeyd olundu ki, milli mədəniyyətimizin müxtəlif məqamlarını özündə əks etdirən tarixi abidələrin qorunması, bərpası, gələcək nəsillərə çatdırılması, tarixi şəxsiyyətlərimizin heykəllərinin ucaldılması və adlarının, ictimai-siyasi fəaliyyətlərinin, Azərbaycan mədəniyyətinin inkişafına verdikləri töhfələrin əbədiləşdirilməsi ilə bağlı əsası Ulu Öndər Heydər Əliyev tərəfindən qoyulan siyasət hazırda eyni diqqət və həssaslıqla möhtərəm Prezidentimiz İlham Əliyev tərəfindən uğurla davam etdirilir, ölkəmizin müxtəlif guşələrində yüksək estetik dəyərlərə malik olan milli-mənəvi irsə və tarixi keçmişə dərin ehtiram duyğusu oyadan monumental heykəltəraşlıq abidələri, memorial və xatirə kompleksləri ucaldılır və bu əsərlər Azərbaycan heykəltəraşlıq və memarlıq sənətinin ən gözəl nümunələrinə, şəhər və kəndlərimizin görkəminin ayrılmaz hissəsinə çevrilir.

132-134 nömrəli Təhsil Kompleksinin müəllim-şagird kollektivinin görkəmli ictimai xadim Hacı Zeynalabdin Tağıyevi hər zaman xüsusi məhəbbət və ehtiramla yad etdiklərinin bildirildiyi ekskursiya zamanı vurğulandı ki, Kompleksin hazırda fəaliyyət göstərdiyi tarixi bina “Müqəddəs Nina” qızlar gimnaziyası üçün 1886-cı ildə məhz xeyriyyəçi Hacı Zeynalabdin Tağıyevin təşəbbüsü ilə, eyni zamanda bir neçə Bakı milyonçusunun onunla bərabər böyük vəsait sərf etməsi nəticəsində tikilmiş və ikimərtəbəli, geniş, hündür otaqları olan məktəb binası kimi fəaliyyətə başlamışdı. Müxtəlif dövrlərdə bu tarixi binada 1918-1920-ci illərdə hərbi akademiya, 1933-1937-ci illərdə beynəlmiləl məktəb, 1937-2010-cu ilin sentyabr ayına qədər davamlı olaraq məşhur 132 (Azərbaycan) və 134 (Rus) saylı orta məktəbləri fəaliyyət göstərmişdir. 2010-cu ildə Azərbaycan Respublikasının Prezidenti cənab İlham Əliyevin xüsusi tapşırığı ilə bina əsaslı şəkildə yenidən qurulmuş və 132-134 nömrəli Təhsil Kompleksi adı ilə fəaliyyətini bu günə kimi uğurla davam etdirir.

Biz Hacı Zeynalabdin Tağıyevi Azərbaycan xalqı üçün böyük işlər görmüş görkəmli xeyriyyəçi-mesenat, ictimai xadim kimi daima yad edirik və Onun xatirəsi bizim üçün çox əzizdir.

Yanvarın 19-da 132-134 nömrəli Təhsil Kompleksində 20 Yanvar faciəsinin 32-ci ildönümünə həsr olunan tədbir keçirildi.

Anım tədbirində xalqımızın azadlığı uğrunda canlarını qurban vermiş və müstəqilliyimizin ilk Şəhidləri kimi qəlbimizdə əbədi yaşayacaq olan 20 Yanvar Şəhidlərinin, o cümlədən 1990-cı ildə 134 saylı orta məktəbin 7-ci sinif şagirdi olan Şəhid Larisa Məmmədovanın əziz xatirəsi xüsusi ehtiramla yad olundu.

Çıxış edən Kompleksin direktoru Sara Xanlarova xalqımızın həyatında ən ağrılı və hüznlü, eyni zamanda böyük qəhrəmanlıq, milli özünüdərk günlərindən biri olan 20 Yanvar faciəsinin tarixindən, Sovet İmperiyası tərəfindən Bakıda Azərbaycan xalqına qarşı törədilmiş bu dəhşətli qətliamın səbəblərindən və tarixi ibrət dərslərindən danışdı. Vurğulandı ki, 20 Yanvar gecəsi hər bir azərbaycanlı üçün müstəqilliyimizə aparan yolda şərəfli mübarizə səhifəsidir. Şəhidlərimizin əbədiyaşar xatirəsini daim əziz tutan Azərbaycan xalqı Birinci Qarabağ Müharibəsində və 2020-ci il Vətən müharibəsində torpaqlarımızın azadlığı uğrunda qəhrəmanlıqla döyüşən igidlər yetişdirdi. Möhtərəm Prezidentimiz, müzəffər Ali Baş Komandan İlham Əliyevin rəhbərliyi ilə qəhrəman Azərbaycan Ordusu cəmi 44 gün ərzində 30 il işğal altında olan torpaqlarımızı mənfur düşmən tapdağından xilas etdi. Azərbaycan Vətən müharibəsinin qalibi oldu. Bu misilsiz nailiyyət və Şanlı Qarabağ Zəfəri ölkəmizdə aparılan düzgün idarəetmə və gənclər siyasətinin nəticəsidir. Məhz bu siyasət və bütün Şəhidlərimizin, qazilərimizin şücaəti, mətanəti, fədakarlığı nəticəsində bu gün Azərbaycan xalqı məğrur, qalib ölkənin vətəndaşlarıdır. Azərbaycan xalqı daim bütün Şəhidlərimizin əbədi xatirəsini yaşadacaq və onların ruhları qarşısında dərin ehtiramlarını bildirəcəkdir.

Tədbirdə Şəhid şagirdimiz Larisanın valideyni Şəhidlik zirvəsinə ucalan övladı ilə bağlı xatirələrini bölüşdü və gələcək nəsillərə tarixin bu ibrət səhifələrindən nəticə çıxarmağı tövsiyə etdi.

Anım tədbirində 132-134 nömrəli Təhsil Kompleksinin şagirdləri 1990-cı il 20 Yanvar faciəsinə, insanlığa qarşı cinayət olan bu dəhşətli qətliamın qurbanlarına və müstəqilliyimizin ilk Şəhidlərinin xalqımızın qəlbindəki əbədiyaşar əziz xatirəsinə həsr olunan ədəbi-bədii kompozisiya ilə çıxış etdilər.  Məktəblilər qan yaddaşımıza həkk olunan və milli iradəmizin zəfər çaldığı 20 Yanvar qəhrəmanlıq gününə həsr olunan şerlər səsləndirdilər, musiqi kompozisiyaları ifa etdilər. Məktəblilərin çıxışlarında xüsusilə qeyd olundu ki, 2020-ci ildə Prezidentimiz, müzəffər Ali Baş Komandanımız İlham Əliyevin rəhbərliyi ilə qazanılmış möhtəşəm Qarabağ Zəfərindən sonra Azərbaycanın müstəqilliyi, ərazi bütövlüyü və torpaqlarımızın azadlığı uğrunda canından keçən bütün Şəhidlərimizin qisası alındı, qəhrəman oğul və qızlarımızın ruhu şaddır.

Allah bütün Şəhidlərimizə qəni-qəni rəhmət eləsin!

Kompleksimizin 9-cu sinif şagirdləri Təhsil Nazirliyinin dəstəyi, Respublika Uşaq-Gənclər İnkişaf Mərkəzinin təşkilatçılığı ilə uşaq və gənclər arasında təşkil olunan “Sahibkar məktəbli” müsabiqəsində uğurla iştirak etmiş və “Resursların təkrar emalı – yeni məhsulların dizaynı və istehsalı” nominasiyası üzrə 2-ci yerin qalibi olmuşlar.

Şagirdlərin startap layihələr hazırlayıb təqdim etdikləri müsabiqənin əsas məqsədi məktəblilərin sahibkarlıq bacarıqlarının formalaşdırılması, onlar arasında kiçik biznesin inkişaf etdirilməsi, liderlik potensialı və kreativ düşüncəyə malik olan yaradıcı və istedadlı uşaqların üzə çıxarılmasından ibarətdir.

Müsabiqədə uğurla çıxış edərək qalib olan şagirdlərimizi ürəkdən təbrik edir və onlara yeni-yeni nailiyyətlər arzu edirik.

Kompleksimizin 8-ci sinif şagirdləri Hüseyn Ömər və Xanzadə Mehdi Qərbi Kaspi Universitetinin təşkilatçılığı ilə 24-25 dekabr 2021-ci il tarixlərində keçirilən “2021 Məktəblilərarası LEGO Olimpiadası”nda LEGO Sumo kateqoriyası üzrə II yerin qalibi olublar.

Ömər və Mehdini Olimpiadada iştirak edən ümumilikdə 16 komanda arasında qazanılmış bu yüksək nailiyyət münasibətilə təbrik edir, şagirdlərimizə gələcəkdə yeni-yeni qalibiyyətlər arzu edirik.

132-134 nömrəli Təhsil Kompleksini “First Lego League Azərbaycan” (FLL) mühəndislik və robot texnologiyaları yarışında təmsil edən “SpaceL” komandası turnirin “Fədakar Komanda Rəhbəri” nominasiyasının qalibi olmuşdur.

ADA Universitetində Təhsil Nazirliyi və “Edumedia” şirkətinin birgə təşkilatçılığı ilə məktəblilər arasında keçirilən “First Lego League Azərbaycan” (FLL) mühəndislik və robot texnologiyaları yarışının 19 dekabr tarixli finalında 26 komanda çıxış edib.

132-134 nömrəli Təshil Kompleksinin FLL komandasını bu qalibiyyət münasibətilə təbrik edir və şagirdlərimizə gələcəkdə yeni nailiyyətlər arzu edirik.

Komanda üzvləri: 1. Rəfiyev Cavidan (“10 a”), 2. Macabalitao Aylan (“9 b”), 3. Quliyev Mehdi (“9 b”), 4. Seyidov Mirzə (“9 b”), 5. Hüseyn Ömər (“8 d”), 6. Əhmədov Murad (“8 d”)

Komanda rəhbəri: Kompleksin əməkdaşı Nəbiyeva Bəyim

Komandada könüllü çalışan şagirdlərimiz: Mehdi (“8 d”), Ziya (“10 a”), Rəsul (“10 a”)

FLL şagirdləri elm, texnologiya, fizika və riyaziyyat dünyası ilə tanış edən turnirdir. Şagirdlər bu turnirdə iştirak edərək gələcək elm insanları və mühəndislər üçün lazım olan tənqidi düşüncə, qeyri-standart üsullarla problemlərin həll olunması, bununla yanaşı, komanda şəklində işləmək kimi vacib bacarıqları inkişaf etdirirlər.

Bu il keçirilən turnirin mövzusu “CITY SHAPER” adlanır. Turnirdə iştirak üçün 10-16 yaşlı şagirdlər komanda şəklində şəhərqurma üzrə tədqiqat aparıblar, “Lego Midstorms EV3” xüsusi dəstlərindən istifadə edərək mövzu üzrə elan edilmiş missiyaları həll etmək üçün robot yığaraq, onun proqramlaşdırmasında yaradıcı yanaşma nümayiş etdiriblər.

Dahi Azərbaycan şairi və mütəfəkkiri Nizami Gəncəvinin 880 illik yubileyi ilə əlaqədar 2021-ci il Azərbaycan Respublikası Prezidentinin Sərəncamına əsasən ölkəmizdə “Nizami Gəncəvi İli” elan edilib.

Dekabrın 16-da “Nizami Gəncəvi ili” çərçivəsində 132-134 nömrəli Təhsil Kompleksində Nizaminin zəngin irsinə və dünyaşöhrətli “Xəmsə”sinə həsr olunan ədəbi-bədii tədbir keçirildi. Tədbirdə məktəblilər Nizami Gəncəvinin həyat və yaradıcılığına dair çıxışlar etdilər, dahi şairin qəzəllərindən parçalar səsləndirdilər, qüdrətli söz və fikir ustadının zəngin irsində ibrətamiz və tərbiyəvi məqamlara dair səhnəciklər nümayiş etdirdilər.

Tədbirdə çıxış edən Təhsil Kompleksinin direktoru Sara Xanlarova əsası Ulu Öndər Heydər Əliyev tərəfindən qoyulan ənənələrin davamı olaraq möhtərəm Prezidentimiz İlham Əliyevin və respublikamızın Birinci vitse-prezidenti Mehriban xanım Əliyevanın Azərbaycan mədəniyyətinə, ədəbiyyatımızın görkəmli nümayəndəsi Nizami Gəncəvi irsinə göstərdikləri böyük diqqət və qayğıdan danışdı. Qeyd olundu ki, “Nizami Gəncəvi ili” böyük söz sərrafının yaradıcılığının daha geniş tədqiqinə, daha dərindən öyrənilməsinə və onun bənzərsiz poeziyasının dünyada geniş təbliği işinə mühüm töhfə olmuşdur. S.Xanlarova dünyaşöhrətli şair, görkəmli mütəfəkkir Nizami Gəncəvinin bütün əsərlərində ibrətamiz öyüd-nəsihət, mənəvi tərbiyə aşılayan dahi sənətkar olduğunu vurğulayaraq gənc nəsilə, şagirdlərə zəngin Nizami irsini dərindən dərk etməyi və müdrik həyat təcrübəsindən nümunə götürməyi, xalqımızın milli-mənəvi dəyərlərini qorumağı tövsiyə etdi.

Kompleksin Azərbaycan dili müəllimi Əliyeva Rəna və musiqi müəllimi Nazəni Əsədovanın bədii tərtibatında ərsəyə gələn ədəbi-bədii tədbirdə Kompleksin şagirdlərinin mahir ifaları və nümayiş etdirdikləri teatr səhnəcikləri böyük marağa səbəb oldu və məktəblilərin gurultulu alqışları ilə qarşılandı.

Dekabrın 10-da 132-134 nömrəli Təhsil Kompleksində müasir, müstəqil Azərbaycan dövlətinin qurucusu, dahi siyasətçi və görkəmli dövlət xadimi Ulu Öndər Heydər Əliyevin Anım gününə həsr olunan “Əbədiyyətə qovuşan ömür” mövzusunda tədbir-konfrans keçirildi.

Konfransda Kompleksin Tarix müəllimələri Şıxamirova Yelena, Səmədova Tünzalə, Səfərəliyeva Sevinc, Coğrafiya müəllimi Hüseynova Nailə və Kompleksin şagirdləri XI sinif şagirdləri Qafarova Xalidə, Dadaşova Leyla, Sadıqova Mədinə,  Mövsümov Ayxan, X sinif şagirdləri Əhmədova Səbinə, Həsənli Ayar, IX sinif şagirdi Salehli Adilə və VIII sinif şagirdi Qılıncova Rəhimə çıxış etdilər.

Azərbaycan xalqının Ümummilli Lideri Heydər Əliyevin müasir dünya tarixində parlaq və silinməz iz qoymuş böyük şəxsiyyət, müdrik dövlət xadimi kimi xalqımızın milli azadlıq və müstəqillik tarixində xilaskarlıq rolu, mənalı həyat yolu, zəngin və çoxşaxəli irsinə həsr olunan çıxışlarda qeyd edildi ki, Ulu Öndər dühası, Heydər Əliyev şəxsiyyəti sayəsində yeni, müasir Azərbaycan dövlətinin müstəqilliyi qorunmuş, möhkəmlənmiş, ölkəmiz dünya birliyində öz layiqli yerini tutmuşdur. Vurğulandı ki, Ulu Öndər Heydər Əliyevin Azərbaycana rəhbərlik etdiyi dövr çoxəsrlik dövlətçilik tariximizin ən şanlı səhifələrindəndir.  Ötən əsrin 70-ci illərindən etibarən 30 ildən artıq bir müddətdə Azərbaycanda iqtisadiyyatın, elm, təhsil və mədəniyyətin təşəkkülü və inkişafı bilavasitə Ümummillli Lider Heydər Əliyevin adı ilə bağlı olmuşdur. Konfransda Ulu Öndər Heydər Əliyevin Azərbaycan təhsilinin inkişafındakı müstəsna xidmətləri xüsusi qeyd olundu və görkəmli dövlət xadiminin ümumtəhsil məktəblərinə, müəllim peşəsinə, şagirdlərə və Azərbaycanın gələcəyi olan gənclərə olan diqqət və qayğısından danışıldı. Xüsusi qeyd olundu ki, əsası Ulu Öndər Heydər Əliyev tərəfindən qoyulmuş zəngin dövlətçilik ənənələri Azərbaycan Respublikasının Prezidenti cənab İlham Əliyev tərəfindən yeni müstəvidə və beynəlxalq təcrübə əsasında uğurla davam etdirilir və Azərbaycanın ildən-ilə qüdrətlənməsinə, yeni-yeni nailiyyətlər qazanmasına xidmət edir.

Konfransda Ümummilli Lider Heydər Əliyevin Azərbaycanda dövlət quruculuğu və xalqımızın müstəqilliyinə xidmət edən həyat və fəaliyyətinin ən önəmli məqamlarına həsr olunan filmlər nümayiş olundu.

132-134 nömrəli Təhsil Kompleksinin müəllim-şagird kollektivi Ümummilli Liderin əziz xatirəsini hər il olduğu kimi bu il də dərin hörmət və ehtiramla yad edir. Ulu Öndər Heydər Əliyevin müasir, müstəqil Azərbaycan dövləti, xalqı üçün əvəzsiz xidmətləri əbədi olaraq yaşayacaqdır.

İbtidai siniflərdə “Sağlam qidalanma” mövzusunda dərslər keçirilir. Dərslərdə şagirdlərə sağlam və qeyri-sağlam qidalar və onların insan orqanizminə təsiri barədə ətraflı məlumat verilir, mövzu ilə bağlı öyrədici videoçarxlar izlədilir.

Dərslərdə mövzu ilə bağlı şagirdlərlə fikir mübadiləsi aparılır.