Kompleksimizin 8-ci sinif şagirdləri Hüseyn Ömər və Xanzadə Mehdi Qərbi Kaspi Universitetinin təşkilatçılığı ilə 24-25 dekabr 2021-ci il tarixlərində keçirilən “2021 Məktəblilərarası LEGO Olimpiadası”nda LEGO Sumo kateqoriyası üzrə II yerin qalibi olublar.
Ömər və Mehdini Olimpiadada iştirak edən ümumilikdə 16 komanda arasında qazanılmış bu yüksək nailiyyət münasibətilə təbrik edir, şagirdlərimizə gələcəkdə yeni-yeni qalibiyyətlər arzu edirik.
132-134 nömrəli Təhsil Kompleksini “First Lego League Azərbaycan” (FLL) mühəndislik və robot texnologiyaları yarışında təmsil edən “SpaceL” komandası turnirin “Fədakar Komanda Rəhbəri” nominasiyasının qalibi olmuşdur.
ADA Universitetində Təhsil Nazirliyi və “Edumedia” şirkətinin birgə təşkilatçılığı ilə məktəblilər arasında keçirilən “First Lego League Azərbaycan” (FLL) mühəndislik və robot texnologiyaları yarışının 19 dekabr tarixli finalında 26 komanda çıxış edib.
132-134 nömrəli Təshil Kompleksinin FLL komandasını bu qalibiyyət münasibətilə təbrik edir və şagirdlərimizə gələcəkdə yeni nailiyyətlər arzu edirik.
Komanda üzvləri: 1. Rəfiyev Cavidan (“10 a”), 2. Macabalitao Aylan (“9 b”), 3. Quliyev Mehdi (“9 b”), 4. Seyidov Mirzə (“9 b”), 5. Hüseyn Ömər (“8 d”), 6. Əhmədov Murad (“8 d”)
Komanda rəhbəri: Kompleksin əməkdaşı Nəbiyeva Bəyim
Komandada könüllü çalışan şagirdlərimiz: Mehdi (“8 d”), Ziya (“10 a”), Rəsul (“10 a”)
FLL şagirdləri elm, texnologiya, fizika və riyaziyyat dünyası ilə tanış edən turnirdir. Şagirdlər bu turnirdə iştirak edərək gələcək elm insanları və mühəndislər üçün lazım olan tənqidi düşüncə, qeyri-standart üsullarla problemlərin həll olunması, bununla yanaşı, komanda şəklində işləmək kimi vacib bacarıqları inkişaf etdirirlər.
Bu il keçirilən turnirin mövzusu “CITY SHAPER” adlanır. Turnirdə iştirak üçün 10-16 yaşlı şagirdlər komanda şəklində şəhərqurma üzrə tədqiqat aparıblar, “Lego Midstorms EV3” xüsusi dəstlərindən istifadə edərək mövzu üzrə elan edilmiş missiyaları həll etmək üçün robot yığaraq, onun proqramlaşdırmasında yaradıcı yanaşma nümayiş etdiriblər.
Dahi Azərbaycan şairi və mütəfəkkiri Nizami Gəncəvinin 880 illik yubileyi ilə əlaqədar 2021-ci il Azərbaycan Respublikası Prezidentinin Sərəncamına əsasən ölkəmizdə “Nizami Gəncəvi İli” elan edilib.
Dekabrın 16-da “Nizami Gəncəvi ili” çərçivəsində 132-134 nömrəli Təhsil Kompleksində Nizaminin zəngin irsinə və dünyaşöhrətli “Xəmsə”sinə həsr olunan ədəbi-bədii tədbir keçirildi. Tədbirdə məktəblilər Nizami Gəncəvinin həyat və yaradıcılığına dair çıxışlar etdilər, dahi şairin qəzəllərindən parçalar səsləndirdilər, qüdrətli söz və fikir ustadının zəngin irsində ibrətamiz və tərbiyəvi məqamlara dair səhnəciklər nümayiş etdirdilər.
Tədbirdə çıxış edən Təhsil Kompleksinin direktoru Sara Xanlarova əsası Ulu Öndər Heydər Əliyev tərəfindən qoyulan ənənələrin davamı olaraq möhtərəm Prezidentimiz İlham Əliyevin və respublikamızın Birinci vitse-prezidenti Mehriban xanım Əliyevanın Azərbaycan mədəniyyətinə, ədəbiyyatımızın görkəmli nümayəndəsi Nizami Gəncəvi irsinə göstərdikləri böyük diqqət və qayğıdan danışdı. Qeyd olundu ki, “Nizami Gəncəvi ili” böyük söz sərrafının yaradıcılığının daha geniş tədqiqinə, daha dərindən öyrənilməsinə və onun bənzərsiz poeziyasının dünyada geniş təbliği işinə mühüm töhfə olmuşdur. S.Xanlarova dünyaşöhrətli şair, görkəmli mütəfəkkir Nizami Gəncəvinin bütün əsərlərində ibrətamiz öyüd-nəsihət, mənəvi tərbiyə aşılayan dahi sənətkar olduğunu vurğulayaraq gənc nəsilə, şagirdlərə zəngin Nizami irsini dərindən dərk etməyi və müdrik həyat təcrübəsindən nümunə götürməyi, xalqımızın milli-mənəvi dəyərlərini qorumağı tövsiyə etdi.
Kompleksin Azərbaycan dili müəllimi Əliyeva Rəna və musiqi müəllimi Nazəni Əsədovanın bədii tərtibatında ərsəyə gələn ədəbi-bədii tədbirdə Kompleksin şagirdlərinin mahir ifaları və nümayiş etdirdikləri teatr səhnəcikləri böyük marağa səbəb oldu və məktəblilərin gurultulu alqışları ilə qarşılandı.
Dekabrın 10-da 132-134 nömrəli Təhsil Kompleksində müasir, müstəqil Azərbaycan dövlətinin qurucusu, dahi siyasətçi və görkəmli dövlət xadimi Ulu Öndər Heydər Əliyevin Anım gününə həsr olunan “Əbədiyyətə qovuşan ömür” mövzusunda tədbir-konfrans keçirildi.
Konfransda Kompleksin Tarix müəllimələri Şıxamirova Yelena, Səmədova Tünzalə, Səfərəliyeva Sevinc, Coğrafiya müəllimi Hüseynova Nailə və Kompleksin şagirdləri XI sinif şagirdləri Qafarova Xalidə, Dadaşova Leyla, Sadıqova Mədinə, Mövsümov Ayxan, X sinif şagirdləri Əhmədova Səbinə, Həsənli Ayar, IX sinif şagirdi Salehli Adilə və VIII sinif şagirdi Qılıncova Rəhimə çıxış etdilər.
Azərbaycan xalqının Ümummilli Lideri Heydər Əliyevin müasir dünya tarixində parlaq və silinməz iz qoymuş böyük şəxsiyyət, müdrik dövlət xadimi kimi xalqımızın milli azadlıq və müstəqillik tarixində xilaskarlıq rolu, mənalı həyat yolu, zəngin və çoxşaxəli irsinə həsr olunan çıxışlarda qeyd edildi ki, Ulu Öndər dühası, Heydər Əliyev şəxsiyyəti sayəsində yeni, müasir Azərbaycan dövlətinin müstəqilliyi qorunmuş, möhkəmlənmiş, ölkəmiz dünya birliyində öz layiqli yerini tutmuşdur. Vurğulandı ki, Ulu Öndər Heydər Əliyevin Azərbaycana rəhbərlik etdiyi dövr çoxəsrlik dövlətçilik tariximizin ən şanlı səhifələrindəndir. Ötən əsrin 70-ci illərindən etibarən 30 ildən artıq bir müddətdə Azərbaycanda iqtisadiyyatın, elm, təhsil və mədəniyyətin təşəkkülü və inkişafı bilavasitə Ümummillli Lider Heydər Əliyevin adı ilə bağlı olmuşdur. Konfransda Ulu Öndər Heydər Əliyevin Azərbaycan təhsilinin inkişafındakı müstəsna xidmətləri xüsusi qeyd olundu və görkəmli dövlət xadiminin ümumtəhsil məktəblərinə, müəllim peşəsinə, şagirdlərə və Azərbaycanın gələcəyi olan gənclərə olan diqqət və qayğısından danışıldı. Xüsusi qeyd olundu ki, əsası Ulu Öndər Heydər Əliyev tərəfindən qoyulmuş zəngin dövlətçilik ənənələri Azərbaycan Respublikasının Prezidenti cənab İlham Əliyev tərəfindən yeni müstəvidə və beynəlxalq təcrübə əsasında uğurla davam etdirilir və Azərbaycanın ildən-ilə qüdrətlənməsinə, yeni-yeni nailiyyətlər qazanmasına xidmət edir.
Konfransda Ümummilli Lider Heydər Əliyevin Azərbaycanda dövlət quruculuğu və xalqımızın müstəqilliyinə xidmət edən həyat və fəaliyyətinin ən önəmli məqamlarına həsr olunan filmlər nümayiş olundu.
132-134 nömrəli Təhsil Kompleksinin müəllim-şagird kollektivi Ümummilli Liderin əziz xatirəsini hər il olduğu kimi bu il də dərin hörmət və ehtiramla yad edir. Ulu Öndər Heydər Əliyevin müasir, müstəqil Azərbaycan dövləti, xalqı üçün əvəzsiz xidmətləri əbədi olaraq yaşayacaqdır.
İbtidai siniflərdə “Sağlam qidalanma” mövzusunda dərslər keçirilir. Dərslərdə şagirdlərə sağlam və qeyri-sağlam qidalar və onların insan orqanizminə təsiri barədə ətraflı məlumat verilir, mövzu ilə bağlı öyrədici videoçarxlar izlədilir.
Dərslərdə mövzu ilə bağlı şagirdlərlə fikir mübadiləsi aparılır.
132-134 nömrəli Təhsil Kompleksinin 11-ci sinif şagirdi Qafarova Xalidə Kamran qızı Təhsil Nazirliyinin təşkilatçılığı, Heydər Əliyev Fondu və Qarabağ Dirçəliş Fondunun tərəfdaşlığı ilə ümumi təhsil müəssisələrinin VIII-XI sinif şagirdləri arasında keçirilmiş “Zəfər yolu” inşa müsabiqəsində III yerə layiq görülüb.
Şagirdimizi ürəkdən təbrik edir, ona yeni-yeni nailiyyətlər arzulayırıq.
17 noyabr – 44 günlük Vətən müharibəsinin Şəhidi Nicat Tarıverdiyevin doğum günüdür. Qəhrəmanımız yaşasaydı bu gün 23 yaşı tamam olacaqdı.
Şəhidimizin doğum günü münasibətilə noyabrın 17-də təhsil aldığı 132-134 nömrəli Təhsil Kompeksində Şəhid Nicat Tarıverdiyevin xatirə günü keçirildi. Gün ərzində Kompleksin bütün monitorlarında qəhrəman Vətən oğlunun şərəfli həyat və döyüş yolunu əks etdirən fotolar nümayiş olundu, Şəhidimizə həsr olunan dərslər keçirildi. Bu əlamətdar gündə məktəbimizin fəxri qonaqları olan Şəhidimizin valideynləri və ailə üzvləri Şəhid Nicat Tarıverdiyev adına sinif otağını ziyarət etdilər, məktəblilərin Şəhidlərimizə, Azərbaycana, azad Qarabağa və xalqımızın qürur, şərəf günü olan 8 Noyabr – Zəfər Gününə həsr etdikləri şerləri dinlədilər. Şəhidimizin Anası Şükran xanım oğlunun xatirəsini və Vətənə xidmətlərini öyrənən, yaşadan məktəblilərə ürəkdən təşəkkür etdi və məzun Şəhidimiz haqqında əziz xatirələrini şagirdlərimizlə paylaşdı.
Təhsil Kompleksinin Muzeyində yaradılmış Şəhid Məzunlar Guşəsi ziyarət olundu, Şəhidlərimizin əbədiyaşar ruhuna ehtiram ifadə olundu.
Kompleksin Akt zalında qəhrəman Şəhidimiz Nicat Tarıverdiyevin doğum günü münasibətilə Anım tədbiri keçirildi. Tədbirdə Təhsil Kompleksinin direktoru Sara Xanlarova, Nicatın döyüş yoldaşı, sinif yoldaşları, ibtidai sinif müəlliməsi, sinif rəhbəri və Nicata dərs deyən müəllimələr çıxış etdilər, qəhrəman Şəhidimizlə bağlı unudulmaz və əziz xatirələrini məktəblilərlə bölüşdülər. Çıxışlarda qeyd olundu ki, Nicat müəllimlərinin sevimli və nümunəvi şagirdi olub, kiçik yaşlarından yüksək vətənpərvərliyi, Vətəninə sonsuz məhəbbəti və bağlılığı, eyni zamanda mərdliyi, cəsarəti və dürüstlüyü ilə seçilib. Vurğulandı ki, Vətənin Nicat kimi mərd, igid oğulları xalqımızın başını uca etdilər, məhz bu qəhrəmanlarımız sayəsində biz bu gün məğrur və qalib xalqa çevrilmişik. Hər zaman valideynlərinin, müəllimlərinin qüruru olan Nicat döyüş meydanındakı qəhrəmanlığı, Vətən uğrundakı fədakarlığı və uca Şəhadət məqamı ilə xalqımızın əbədiyaşar qəhrəmanlarından biri oldu. Xalqımızın Zəfər salnaməsini qanları ilə yazan Şəhidlərimizin həyat və döyüş yolu gənc və gələcək nəsillər üçün hər zaman örnək olacaq və əziz xatirələri qəlblərdə əbədi olaraq yaşayacaqdır.
Çıxış edən Şəhid Anası Şükran xanım qəhrəman övladı ilə qürur duyduğunu bildirərək oğlunun əziz xatirəsini daima ehtiramla yad edən və yaşadan 132-134 nömrəli Təhsil Kompleksinin rəhbərliyinə, müəllim-şagird kollektivinə təşəkkür etdi.
Anım tədbirinin ən duyğusal anlarından biri məktəbin qəhrəman məzun Şəhidi Nicatın hər kəs tərəfindən ayaqüstündə alqışlanması oldu. Bu gurultu alqışlar xalqımıza azad Qarabağ bəxş edən və Şəhadət məqamına yüksələn qəhrəman Şəhidlərimizin ruhlarına həsr olundu.
Şəhidimizlə bağlı duyğusal anların yaşandığı Anım tədbirində canlanan xoş xatirələr iştirakçıların və məktəblilərin yaddaşına həkk olundu.
Ruhun şad olsun, qəhrəman Nicatımız! Uğrunda canından keçdiyin Vətənimiz Azərbaycan var olduqca sən də yaşayacaq və qəlblərdə yaşadılacaqsan. Cənnətdə qeyd etdiyin doğum günün və Şəhadət məqamın mübarək!
16 noyabr – 44 günlük Vətən müharibəsində qəhrəmancasına döyüşərək Şəhid olan 132-134 nömrəli Təhsil Kompleksinin məzunu Əliyev Fərid Pirəli oğlunun Şəhid olmasının ildönümü və anım günüdür. Bu gün Səbail rayon İcra Hakimiyyətinin başçısı Vüqar Zeynalov, Səbail rayonu Şəhidlərinin ailə üzvləri, Fəridin yaxınları, döyüş yoldaşları, 132-134 nömrəli Təhsil Kompleksinin direktoru Sara Xanlarova və məktəbin müəllimləri, rayon ictimaiyyətinin nümayəndələri, ziyalılar qəhrəman Şəhidimizin məzarını ziyarət etdilər, əziz və əbədiyaşar xatirəsini ehtiramla yad etdilər, məzarı üzərinə güllər düzdülər və ruhuna dualar oxudular.
Anım tədbirində Səbail rayon İcra Hakimiyyətinin başçısı Vüqar Zeynalov, 132-134 nömrəli Təhsil Kompleksinin direktoru Sara Xanlarova və Şəhid Fəridin ailə üzvləri, döyüş yoldaşları çıxış etdilər. Vurğulandı ki, ölkə Prezidenti, müzəffər Ali Baş Komandan İlham Əliyevin rəhbərliyi ilə qəhrəman Azərbaycan Ordusunun 44 günlük Vətən müharibəsində qazandığı tarixi Qarabağ Zəfəri nəticəsində Azərbaycan xalqı qalib, məğrur xalqa çevrildi. “8 Noyabr – Zəfər Günü” Azərbaycan xalqının milli qürur günü və müasir, müstəqil Azərbaycanın şanlı hərbi qələbəsinin rəmzi kimi əbədi olaraq yaşayacaq. Fərid kimi Vətənin igid oğulları bu qəhrəmanlıq dastanını qanları ilə yazaraq uca Şəhadət məqamına yüksəldilər. Qədirbilən Azərbaycan xalqı Şəhidlərinin əziz xatirəsini daima ehtiramla yad edəcək və onların Vətən qarşısındakı əvəzsiz xidmətlərini, fədakarlığını, Vətən sevgisini gənc və gələcək nəsillər üçün nümunə olaraq göstərəcəkdir.
____
16 noyabr tarixində 132-134 nömrəli Təhsil Kompleksində qəhrəman məzun Şəhidimiz Fərid Əliyevin Anım gününə həsr olunan dərslər keçirildi, məktəblilərə Şəhidimizin şərəfli həyat və döyüş yolu haqqında məlumat verildi, Kompleksin muzeyində yaradılmış Şəhid Məzunlar Güşəsi ziyarət olundu.
Qeyd edək ki, 44 günlük Vətən müharibəsində Kompleksin üç qəhrəman məzun Şəhidinin və Birinci Qarabağ müharibəsinin Şəhidi, Milli Qəhrəman Riad Əhmədovun əziz xatirəsi daima yüksək ehtiramla yad olunur və məktəblilərə Azərbaycanın suverenliyi, müstəqilliyinin qorunması və ərazi bütövlüyünün bərpası uğrunda qəhrəmanlıq göstərmiş məzun Şəhidlər haqqında məlumatlar verilir.
Kompleksimizdə qəhrəman məzun Şəhidlərimizin adını daşıyan sinif otaqlarında Şəhid guşələri yaradılıb və bu sinif otaqları şagirdlərimizin böyük məhəbbət və ehtiramla ziyarət etdikləri məkana çevrilib. Allah bütün Şəhidlərimizə rəhmət eləsin!
132-134 nömrəli Təhsil Kompleksində “8 Noyabr – Zəfər Günü” münasibətilə təntənəli bayram tədbiri keçirildi.
Kompleksin qəhrəman Şəhid məzunlarının valideynlərinin, Səbail rayon İcra Hakimiyyətinin müavini Kəmalə Həşimova və RİH-in məsul əməkdaşlarının, çoxsaylı qonaqların iştirak etdiyi tədbirdə Azərbaycan xalqının 44 günlük Vətən müharibəsində qazandığı möhtəşəm Şanlı Qələbəyə, Prezident, müzəffər Ali Baş Komandan İlham Əliyevin qətiyyətli siyasətinə, qəhrəman Azərbaycan Ordusunun rəşadətinə və Vətənin suverenliyi, ərazi bütövlüyü uğrunda canını fəda edən Şəhidlərimizə, sağlamlığını itirən qazilərimizə və şanlı qələbə yolu keçən müharibə veteranlarına həsr olunan çıxışlar edildi, məktəblilər tərəfindən hazırlanan və məharətlə ifa olunan ədəbi-bədii kompozisiya təqdim olundu.
Bayram tədbirində Kompleksin direktoru Sara Xanlarova, Səbail rayon İcra Hakimiyyətinin müavini Kəmalə Həşimova və Kompleksin qəhrəman Şəhid məzunlarının ailə üzvləri çıxış edərək, Azərbaycan xalqının qəhrəmanlıq dastanına çevrilən 44 günlük şərəf, milli qürur mübarizəsindən fəxrlə danışdılar və Azərbaycan ordusunun, Vətənin qəhrəman oğullarının şücaətini, Vətən sevgisini və əvəzsiz xidmətlərini yüksək qiymətləndirdilər.
Məktəblilər vətənpərvərlik ruhunda hazırlanan ədəbi-bədii kompozisiya zamanı Ali Baş Komandana, qəhrəman Şəhidlərimizə, rəşadətli Azərbaycan əsgərinə, doğma Vətənimizə həsr olunan şerlər dedilər, mahnılar səsləndirdilər, gözəl tərtibatda rəqslərlə çıxış etdilər.
Bayram tədbiri qürur və fəxarət dolu duyğulu anlarla yadda qaldı. Qələbən mübarək, Şanlı Azərbaycan! Yaşasın qəhrəman Azərbaycan xalqı! Şəhidlərimizin ruhu şad, məkanları cənnət olsun! QARABAĞ AZƏRBAYCANDIR!
132-134 nömrəli Təhsil Kompleksində məktəblilərin xalqımızın milli-mənəvi dəyərlərinə bağlı, yüksək vətənpərvərlik ruhunda təlim-tərbiyəsi və Azərbaycan tarixinin dərindən öyrənilməsi hər zaman başlıca prioritetlər olmuşdur.
Ölkə Prezidenti, müzəffər Ali Baş Komandan İlham Əliyevin rəhbərliyi ilə qəhrəman Azərbaycan Ordusunun 44 günlük Vətən müharibəsində qazandığı möhtəşəm Zəfər məktəbliləri vətənpərvərlik ruhunda maraqlı layihələr hazırlamağa, Azərbaycanın əzəli torpaqları haqqında yeni araşdırmalar aparmağa, Qarabağın tarixini dərindən öyrənməyə və təbliğ etməyə daha da həvəsləndirmişdir.
Noyabrın 5-də Kompleksin “Kiçik Akademiyası”nın üzvləri olan 7-ci sinif şagirdləri 44 günlük Vətən müharibəsində işğaldan azad olunan Azərbaycan rayonlarının tarixi haqqında biologiya və həyat bilgisi müəllimi Rübabə Səmədovanın rəhbərliyi ilə maraqlı təqdimat layihəsi ilə çıxış etdilər. 2021-ci ilin iyunundan başlayaraq bu layihə üzərində çalışan məktəblilər Şuşa və Xankəndi şəhərləri, Ağdərə, Ağdam, Füzuli, Xocalı, Xocavənd, Laçın, Kəlbəcər, Zəngilan, Qubadlı və Cəbrayıl rayonları haqqında əsaslı tarixi araşdırmalar apardılar, hər bir rayonun simvolu olan tarixi-mədəni abidələrin maketlərini öz əlləri ilə hazırladılar, rəsmlər çəkdilər və xalqımızın ata-baba torpaqları haqqında tarixi-coğrafi arayışlar və məlumat bukletləri tərtib etdilər. Kompleksin bütün 7-ci sinif şagirdlərinin cəlb olunduğu və hər bir sinifin 2 seçilmiş rayon üzərində çalışdığı layihənin təqdimatı açıq dərs formatında Səbail rayon İcra Hakimiyyətinin nümayəndələri və Kompleksin rəhbərliyinin iştirakı ilə keçirildi.
Layihə təqdimatı çərçivəsində məktəblilər araşdırma apardıqları rayonlar haqqında hazırladıqları maketləri təqdim etdilər və video-təqdimat formatında maraqlı tarixi-coğrafi məruzələrlə çıxışlar etdilər.
Bu gözəl layihəni ərsəyə gətirən məktəblilər Təhsil Kompleksinin Diplomları ilə təltif olundular.