Bu gün 132-134 nömrəli Təhsil Kompleksində məktəb psixoloqları Quliyeva Aytən və Əhmədova İnarənin rəhbərliyi ilə bütün buraxılış IV siniflərdə psixo-diaqnostik test keçirildi.
Testin məqsədi, bu yaş qrupuna daxil olan məktəblilərin buraxılış imtahanı öncəsi diqqətinin mərkəzləşməsi və paylanmasını faiz etibarı ilə təyin edib onlara və müəllimlərinə lazımi psixoloji məlumatları ötürməkdir.
132-134 nömrəli Təhsil Kompleksində görkəmli ictimai xadim, oftalmoloq-alim, akademik Zərifə xanım Əliyevanın anadan olmasının 101-ci ildönümü münasibətilə “Ölməz qəlbin zərifliyi” adlı tədbir keçirildi.
Tədbirdə Kompleksin şagirdlərinin ifasında tibb elminə böyük töhfələr verən, biliyi ilə yanaşı, humanistliyi, peşəsinə, ailəsinə, Vətəninə böyük sevgisi ilə seçilən Zərifə xanım Əliyevanın həyatı və elmi fəaliyətinə həsr olunan çıxışlar edildi, ədəbi-bədii kompozisiyalar səsləndirildi, səhnəciklər təqdim olundu, həmçinin videoçarxlar nümayiş olundu.
Kompleksin direktoru, Əməkdar müəllim Sara Xanlarova çıxışında qeyd etdi ki, yüksək intellektual keyfiyyətləri özündə birləşdirən ziyalı, peşəkar həkim, oftolmoloq alim Zərifə xanım Əliyeva eyni zamanda gözəl və fədakar ana, vəfalı ömür-gün yoldaşı, insanlara sevgisi və qayğısı ilə seçilən xeyirxah insan idi. Dünyada ilk dəfə olaraq görmə orqanının peşə patologiyasını araşdıran elmi-tədqiqat laboratoriyası yaradan və praktik olaraq elm aləmində yeni bir istiqamətin – peşə oftalmologiyasının əsasını qoyan akademik Zərifə xanım özünün çoxillik fəaliyyəti dövründə neçə-neçə insana şəfa bəxş etmiş, gözdə ən ağır, mürəkkəb əməliyyatlar aparmış, görmə qabiliyyəti zəif olanların, yaxud tamamilə görməyənlərin qaranlıq dünyasını işıqlandırmışdı.
S.Xanlarova vurğuladı ki, Zərifə xanım onu tanıyanların, iş yoldaşlarının, saysız-hesabsız tələbələrinin xatirində insanların qəlbinə, ruhuna siyarət edən nəcib və sadə insan kimi qalıb. O, xoşbəxt qadın, övlad, ana idi. Görkəmli dövlət və elm xadimi Əziz Əliyevin ailəsində dünyaya göz açan Zərifə xanım müasir müstəqil Azərbaycanın qurucusu Ulu Öndər Heydər Əliyev kimi dahinin sevgisini qazanmışdı. Cəmiyyətin həyatında fəal rol oynayan Zərifə xanım eyni zamanda ailəsinə son dərəcə bağlı bir qadın, gözəl ana idi. Onun təmkinliliyi, səbirliliyi, Vətənə sevgisi və digər müsbət xüsusiyyətləri övladlarının da onun yolunu getməsinə köməkçi olmuşdu. Bu gün bütün Azərbaycan xalqı özünün dünyaşöhrətli Lideri, 30 illik işğala son qoyan və Azərbaycanın ərazi bütövlüyünü bərpa edən müzəffər Ali Baş Komandan cənab Prezident İlham Əliyev ilə fəxr edir. Biz, bu ailəyə – Ulu Öndər Heydər Əliyevə və Zərifə xanım Əliyevaya minnətdarıq ki, qəlblərində daim Azərbaycan sevgisi ilə yaşayan, Vətənimizin qüruru sayılan övladlar yetişdirmişlər. Azərbaycan Respublikasının Birinci vitse-prezidenti, Heydər Əliyev Fondunun Prezidenti Mehriban xanım Əliyeva və bu ailədə böyüyüb boya-boşa çatan Zərifə xanımın nəvələri də bu gün bu ənənələri davam etdirir. Yüksək dəyərləri öz şəxsiyyətində birləşdirmiş Mehriban xanım milli-mənəvi sərvətlərimizin qoruyucusudur. O, Azərbaycanda təhsilin, səhiyyənin, mədəniyyətin və digər sahələrin inkişafı üçün böyük xidmətlər göstərib.
S.Xanlarova məktəblilərə gələcək həyat yolları ilə bağlı tövsiyələrini verdi və qeyd etdi ki, ömrünün sonlarına kimi ətrafına nur saçan ziyalı kimi tanınan Zərifə xanım Əliyevanın həyat yolu gənc nəsillər üçün əsl mənəviyyat dərsi, kamillik və müdriklik məktəbidir. Nə qədər ki, Azərbaycan elmi, Azərbaycan mədəniyyəti, Azərbaycan qadını var, Zərifə xanım Əliyevanın əziz xatirəsi bizimlə olacaq və onun şəxsiyyətinə olan dərin hörmət və ehtiram Azərbaycan xalqının qəlbində daim yaşayacaqdır.
22 aprel – “Beynəlxalq Yer günü” münasibətilə Rus bölməsi “3 c” sinifində “Yaşa, Yer kürəsi!” mövzusunda dərs keçirildi.
Dərsdə şagirdlərə ətraf mühitin sağlamlaşdırılmasının vacibliyi haqqında məlumat verildi. Məktəblilər mövzu haqqında posterlər hazırladılar, təqdimatlar etdilər və öyrəndilər ki, bütün insanlar dünyamızı, Yer kürəmizi, öz yurdumuzu-yuvamızı qorumalı, ağaclar əkməli, yaşıllıqlara qulluq etməli, yaşadıqları əraziləri müxtəlif tullantılardan təmizləməlidirlər.
Pedaqoq: Qəniyeva Sevda
Azərbaycan bölməsi “10 b” sinifində Tarix-Coğrafiya həftəsi çərçivəsində açıq dərs təşkil olundu. Məktəblilər komandalar şəklində təqdimatlarla çıxış etdilər.
Açıq dərsdə “Türk dünyası” komandası “Azərbaycanın Türk dünyasında geosiyasi mövqeyi və əlaqələndirici rolu” mövzusunda çıxış etdilər.
Pedaqoq: Kompleksin Coğrafiya müəllimi Nəsirova Qətibə
Video: Qrup işi çərçivəsində “10 b” sinif şagirdi Əhmədli Fidanın hazırlayıb təqdim etdiyi videoçarx
Rus bölməsi “2 a” sinif şagirdləri üçün Fövqəladə Hallar Nazirliyinin Səbail rayon Dövlət Yanğından Mühafizə Hissəsində ekskursiya təşkil olundu. Məktəblilərə yanğınsöndürmə vasitələrindən istifadə qaydaları, “112” qaynar telefon xəttinin təyinatı, fəaliyyət prinsipləri, qaynar xəttə müraciət üçün əsaslar barədə geniş məlumat verildi.
Ekskursiya rəhbəri: Fransız modeli Rus bölməsi “2 a” sinif rəhbəri Nağıyeva İradə
Azərbaycan bölməsi “5 b” sinifində “Müasir kütləvi qırğın silahları” mövzusunda dərs keçirildi.
Dərsdə məktəblilər kimyəvi və bioloji silah növləri, dərinin mühafizə vasitələri, nüvə silahı ölkələri, təhlükəsizlik və qorunma tədbirləri, tibbi mühafizə vasitələri mövzularında təqdimatlarla çıxışlar etdilər.
Pedaqoq: “5 b” sinif rəhbəri, Kompleksin Ərəb dili müəllimi Məmmədova Gülnara
2024-cü il 18 aprel tarixində Milli Müdafiə Universitetinin nümayəndə heyəti paytaxt Bakı şəhərinin mərkəzində yerləşən Səbail rayonunun 132-134 nömrəli Təhsil Kompleksinin akt zalında şagirdlərlə görüşüb. Görüşdə 132-134 nömrəli Təhsil Kompleksinin direktoru, Əməkdar müəllim Sara Xanlarova, Təhsil Kompleksinin çağırışaqədərki hazırlıq üzrə hərbi rəhbərləri və məktəbin 10-11-ci sinif şagirdləri iştirak ediblər.
Əvvəlcə Azərbaycan Respublikasının Dövlət Himni səsləndirilib və xalqımızın Ümummilli Lideri Heydər Əliyevin və ölkəmizin ərazi bütövlüyü uğrunda şəhid olanların xatirəsi bir dəqiqəlik sükutla yad edilib.
Təhsil Kompleksinin direktoru Sara Xanlarova tədbiri giriş sözü ilə açıb. Daha sonra gənclərin hərbi vətənpərvərlik ruhunda tərbiyə olunması, onlara dövlətçiliyə sədaqət hisslərinin təlqin edilməsi məqsədilə təşkil olunan görüşdə Milli Müdafiə Universiteti Elmi Tədqiqat İnstitutunun Humanitar elmlər şöbəsinin professoru, “Dərbənd” İctimai Birliyinin sədri, ehtiyatda olan birinci dərəcəli kapitan, tarix elmləri doktoru, professor Nurulla Əliyev çıxış edib.
132-134 nömrəli Təhsil Kompleksinin müəllim heyətinin də iştirak etdiyi görüşdə ölkəmizdə gənc nəslin milli-mənəvi dəyərlərimizə, tarixdən gələn ənənələrimizə bağlı, Vətənə sevgi, dövlətçiliyə sədaqət ruhunda tərbiyə olunması istiqamətində müxtəlif sahələrdə atılan addımlardan danışılıb. Qeyd olunub ki, Vətən müharibəsi, eləcə də digər uğurlu əməliyyatlarda Qələbənin qazanılmasını təmin edən mühüm amillərdən biri də gənclər arasında vətənpərvərlik ruhunun aşılanması ilə bağlı uğurlu işin aparılmasıdır.
Milli Müdafiə Universiteti Elmi Tədqiqat İnstitutunun Humanitar elmlər şöbəsinin professoru Nurulla Əliyev bildirib ki, görüşün əsas məqsədi məktəbliləri Azərbaycan Ordusunda həyata keçirilən yeniliklər, Müdafiə Nazirliyinin strukturuna daxil olan xüsusi təyinatlı hərbi təhsil müəssisələrin fəaliyyəti ilə tanış etmək, gələcəkdə karyerasını zabit kimi davam etdirmək istəyən gənclərə dəstək olmaqdır. O, məktəblilərə xüsusi təyinatlı hərbi təhsil müəssisələrində yaradılmış şərait, təklif olunan xidmət növləri, imtiyazlar, Müdafiə Nazirliyi sisteminə daxil olan xüsusi təyinatlı ali hərbi təhsil müəssisələrindəki ixtisaslar, müraciət qaydaları barədə ətraflı məlumat verib. N.Əliyev zabit olmaq istəyən gənclər üçün yaradılan şəraitdən danışıb, hərbçi olmağın şərəfli, qürurlu bir vəzifə olduğunu diqqətə çatdırıb.
Görüş zamanı, həmçinin Heydər Əliyev adına Hərbi İnstituta 2024/2025-ci tədris ili üçün I, II və III ixtisas qrupları üzrə sənəd qəbulun qaydaları və burada mövcud olan ixtisaslar barədə ətraflı məlumat verilib. Həmçinin, Bakı şəhərində yerləşən Heydər Əliyev adına Hərbi İnstitutda, Cəmşid Naxçıvanski adına Hərbi Liseydə və Azərbaycan Tibb Universitetinin Hərbi Tibb Fakültəsində, o cümlədən Azərbaycan Respublikası Elm və Təhsil Nazirliyinin dəstəyi ilə Sumqayıt, Gəncə, Mingəçevir, Şirvan şəhərlərinin və Quba, Qəbələ, Qazax, Bərdə, Beyləqan, Cəlilabad, Lənkəran rayonlarının təhsil sektorlarında yaradılmış sənəd qəbulu məntəqələri haqqında məlumatlar verilib, bu sahədə görülən işlər müzakirə olunub.
Tədbirdə görüş iştirakçılarına Heydər Əliyev adına Hərbi İnstituta və Hərbi kollecə həsr olunmuş videoçarxlar nümayiş olunub.
Sonra şagirdləri maraqlandıran suallar cavablandırılıb.
Sonda xatirə şəkilləri çəkdirilib.
Bu gün, V sinif şagirdləri üçün “Sağlam qidalanma” ilə bağlı maarifləndirici dərs keçirilib. “Sağlam qida – sağlam həyat tərzidir!” mövzusunda keçirilən maarifləndirici dərsin əsas məqsədi şagirdləri düzgün qidalanma yolları ilə tanış etmək, onlara sağlam və zərərli qidalar haqqında məlumat verməkdən ibarət olub.
Biologiya müəllimləri məktəblilərə sağlam qidalar haqqında məlumat verərək, qidalanmanın bir vərdiş olduğunu vurğulayıblar.
Aprelin 16-da 132-134 nömrəli Təhsil Kompleksində “Mülki Müdafiə” və “Fövqəladə hallar zamanı nə etməli?” mövzusuna həsr olunan xüsusi maarifləndirici-öyrədici dərslər təşkil olundu, şagirdlərə fövqəladə hallarda davranış qaydaları ətraflı izah olundu.
Dərslərin kçeirilməsində əsas məqsəd şagirdlərin diqqətini fövqəladə hallar zamanı davranış qaydalarının mənimsənilməsinə yönəltmək, məktəblilərə baş verə biləcək təbii fəlakət, yanğın və qəza hadisələri zamanı düzgün təxliyə olunmanı öyrətməkdir.
Foto: Azərbaycan bölməsi “6 a” və “6 d” sinifləri və Rus bölməsi “5 c” sinifi
Aprelin 16-da ibtidai siniflərimizdə “Mülki müdafiə” mövzusunda maarifləndirici-öyrədici xüsusi dərslər təşkil olundu.
Foto: Azərbaycan bölməsi “2 d” sinifi (Pedaqoq: Xudiyeva Nailə); Fransız modeli Rus bölməsi “2 a” sinifi (Pedaqoq: Nağiyeva İradə)
Video: Fransız modeli Rus bölməsi “2 a” sinifi (Pedaqoq: Nağiyeva İradə)
