Archives

“Su ehtiyatlarından səmərəli istifadənin təmin edilməsinə dair 2020-2022-ci illər üçün Tədbirlər Planı”nın icrası istiqamətində məktəblilərin su ehtiyatlarının idarə olunması, sudan qənaətli və səmərəli istifadə ilə bağlı mövzularda maarifləndirilməsi məqsədilə 132-134 nömrəli Təhsil Kompleksində bu il xüsusi dərslər və müxtəlif interaktiv-öyrədici layihələr təşkil olunmuşdur.

Bu layihələrdən biri Kompleksin Rus bölməsi 6-cı sinif şagirdlərinin iştirakı ilə “Aral – səhraya çevrilmiş dəniz” mövzusunda keçirilmişdir. Layihə Kompleksin Coğrafiya müəllimi Nailə Hüseynovanın rəhbərliyi ilə reallaşdırılmışdır.

“6 a”, “6 c” və “6 d” sinif şagirdləri “Aral – səhraya çevrilmiş dəniz” mövzusunda araşdırmalar aparmış, mövzuya dair hazırladıqları ekoloji fəlakətin miqyasına və nəticələrinə diqqət çəkən müxtəlif maketlər, rəsmlər, plakatlar əsasında maraqlı təqdimatlarla çıxış etmişlər.

Dərsdə qeyd olunmuşdur ki, son onilliklərdə Aral dənizindəki su səviyyəsində ciddi dəyişikliklər müşahidə olunmuşdur. 30 il əvvəl Aral dənizi sahəsinə görə dünyanın dördüncü gölü idi. İndi isə bu dənizin “dibində” dəvə sürüləri otlayır. Aral dənizinin qurumasının günahkarı insanlardır. Məhz insanların təsərrüfat fəaliyyəti nəticəsində Aral “yoxa” çıxmışdır. Bu faciə qlobal ekoloji fəlakətin xəbərçisidir. Təbiət məhv olduqca, insan həyatı da məhv olacaqdır. İnsanlar planetimizin taleyi üçün məsuliyyət daşımalıdırlar.

Şagirdlər daha bir məsələyə diqqət çəkdilər ki, Aral dənizindəki öncəki vəziyyətin tam bərpası mümkünsüz kimi görünsə də, su səviyyəsinin yüksəldilməsi üçün müəyyən tədbirlər həyata keçirilə bilər. Məktəblilər Aral dənizindəki ekoloji fəlakətin qarşısının alınması üçün təkliflər də irəli sürdülər.

132-134 nömrəli Təhsil Kompleksinin “GreenX” komandası bu il ilk dəfə olaraq Azərbaycanda keçirilən Texnofest Azərbaycan Festivalında uğurla çıxış edir.

Kompleksimizin Biologiya və Həyat Bilgisi müəllimi Rübabə Səmədovanın mentorluq etdiyi və 5 nəfərdən ibarət “GreenX” komandası 26-29 may tarixlərində Bakıda keçirilən #Teknofest Aviasiya, Kosmos və Texnologiya Festivalında “FreshAir” layihəsi üzrə 100-ə yaxın komanda arasından bütün mərhələləri uğurla  keçərək finala vəsiqə qazanmışdır.

Festival milli texnologiyaların təbliği və inkişaf etdirilməsi məqsədi daşıyır.

“Yol hərəkətinin təhlükəsizliyi sahəsində təbliğat-təşviqat işinin təşkili ilə bağlı 2020-2023-cü illər üçün” Tədbirlər Planının icrası istiqamətində 132-134 nömrəli Təhsil Kompleksində hər il olduğu kimi, bu il də təhsilalanlar və təhsilverənlər arasında yol hərəkəti təhlükəsizliyi ilə bağlı geniş maarifləndirmə işi aparılmış, Kompleksin Həyat bilgisi müəllimləri tərəfindən bu mövzuda müxtəlif yaş qrupları üzrə sinif şagirdləri üçün xüsusi maarifləndirmə dərsləri təşkil olunmuş, məktəblilər yol hərəkəti təhlükəsizliyinin təbliği işinə yaxından cəlb olunmuş, yol hərəkəti qaydaları və yol nişanları haqqında təbliğat-təşviqat məzmunlu maarifləndirici materialların yayılması təşkil olunmuşdur.

Rus bölməsi “6 d” sinif şagirdləri yol hərəkəti təhlükəsizliyinin təbliği işində nümunəvi fəaliyyətləri ilə xüsusilə seçilmiş və “Yol nişanları barəsində diqqətli olaq” mövzusunda maraqlı araşdırma layihəsi hazırlamışlar. Məktəblilərin bu mövzuda maarifləndirilməsi işinə rəhbərlik edən Kompleksin Biologiya və Həyat bilgisi müəllimi Rübabə Səmədovaya təşəkkür edirik.

132-134 nömrəli Təhsil Kompleksində 28 may – Müstəqillik Günü münasibətilə bayram tədbiri keçirildi.

İlk öncə Azərbaycan Respublikasının Dövlət Himni səsləndirildi. Tədbirdə Şərqin ilk demokratik respublikası olan Azərbaycan Xalq Cümhuriyyətinin yaradılması və Cümhuriyyətin fəaliyyəti sayəsində dövlətçilik tariximizin zənginləşən əsaslarına həsr olunan videoçarxlar nümayiş olundu.

Tədbirdə Kompleksin şagirdləri “Müstəqilliyimiz əbədidir, daimidir, dönməzdir” mövzusunda ədəbi-bədii kompozisiya ilə çıxış etdilər. Məktəblilərin çıxışı zamanı qeyd olundu ki, müsəlman Şərqində ilk demokratik cümhuriyyətin məhz Azərbaycan torpağında yaranması xalqımızın o dövrdə – XIX əsrin sonunda və XX əsrin əvvəllərində milli müstəqillik, azadlıq duyğuları ilə yaşaması ilə bağlıdır. Müstəqil Azərbaycan Respublikası Xalq Cümhuriyyətinin varisidir. Ulu Öndər Heydər Əliyev müasir Azərbaycan dövlətinin qurucusu olmaqla yanaşı, çoxəsrlik dövlətçilik tariximizdə mühüm yeri olan Azərbaycan Xalq Cümhuriyyətinin xidmətlərini hər zaman yüksək qiymətləndirmiş, cümhuriyyət ənənələrinin yaşadılmasına və inkişaf etdirilməsinə daim böyük əhəmiyyət vermişdir.

Tədbirdə vurğulandı ki, bu gün Azərbaycan dünya miqyasında yüksək beynəlxalq nüfuza malik olan ölkədir. 44 günlük Vətən müharibəsində Azərbaycan öz tarixi tor­paqlarını düşmən işğalından azad etdi. Cümhuriyyət dövründən bizə əmanət qa­lan şanlı üçrəngli bayrağımız azad Qarabağda dal­ğalanmaqdadır. Qarabağ Azərbaycandır!

Müstəqillik Günümüz mübarək!

21-22 may tarixlərində ADA Universiteti nəzdində fəaliyyət göstərən ADA Məktəbində Birləşmiş Millətlər Təşkilatı (BMT) Modeli Konfransı keçirilib. Beynəlxalq BMT Modeli Konfransında 18 dövlət və ölkəmizdəki beynəlxalq məktəbləri təmsil edən 250-dək şagird iştirak edib.

132-134 nömrəli Təhsil Kompleksinin IB (International Baccalaureate/ Beynəlxalq Bakalavriat Proqramı) şagirdləri Haqverdiyeva Leyla və Fateh Əhməd Konfransın Fəxri Nümayəndələr Sertifikatı (Certificate of Honorable Delegates) ilə təltif olunublar.

Məktəblilər miqrasiya, iqlim dəyişiklikləri, ekoloji fəlakətlər və ətraf mühitin çirklənməsi, iqtisadi böhranlar, aclıq, zərərli maddələrin dövriyyəsi, korrupsiya, miqrantların və onların ailələrinin müdafiəsi və digər qlobal təxirəsalınmaz məsələlər ətrafında müzakirələr aparıblar. Konfransda bu mövzular ətrafında debatlar təşkil olunub və müvafiq qətnamələr qəbul olunub.

Kompleksimizin ibtidai sinif şagirdlərinin iştirakı ilə “My Free Time” (“Mənim asudə vaxtım”) adlı interaktiv dərs təşkil olundu. Dərsdə I, II və III sinif şagirdləri qruplar şəklində “Asudə vaxtın səmərəli təşkili və dəyərləndirilməsi” mövzusunda təqdimatlarla çıxış etdilər, oyunlar oynadılar, rəqslər etdilər, mahnılar ifa etdilər və müxtəlif səhnəciklər nümayiş etdirdilər.

Dərsdə “Uşaqlar boş vaxtlarını necə keçirməlidir və onu necə bölüşdürməlidir?”, “Asudə vaxtlarda hansı fəaliyyətlərlə məşğul olmaq olar?”, “Yaş xüsusiyyətləri nəzərə alınaraq hansı bədii ədəbiyyatları oxuya və həmin ədəbiyyatları necə əldə edə bilərlər?” kimi suallar cavablandırıldı və vurğulandı ki, uşaqların asudə vaxtlarının səmərəli təşkili onların inkişafında vacib istiqamətlərdən biridir. Asudə vaxtın səmərəli təşkil edilməsi uşaqların həm fiziki, həm də psixi sağlamlığına böyük təsir edir.

Dərsin təşkilində məqsəd məktəblilərin intellektual və yaradıcı inkişafına təkan vermək, şagirdləri intellektual fəaliyyətə daha geniş miqyasda cəlb etmək və asudə vaxtın səmərəli təşkilini təmin etmək idi. İbtidailərimiz maraqla iştirak etdikləri dərsdə həm əyləndilər, həm də yeni, faydalı biliklər əldə etdilər.

Təşkilatçı və rəhbər: Kompleksin təlim-tərbiyə işləri üzrə (profil) direktor müavini, ingilis dili müəllimi İbrahimova Çinarə

132-134 nömrəli Təhsil Kompleksində Rus bölməsi 6-cı sinif şagirdlərinin iştirakı və Kompleksin Tarix müəllimlərinin rəhbərliyi ilə “Qədim Yunan tarixi” mövzusunda bilik yarışması-viktorina təşkil olundu.

Rus bölməsi “6 a”, “6 b”, “6 c” və “6 d” siniflərini təmsil edən 4 komandanın yarışdığı viktorinanın qalibi “6 a” sinif şagirdlərindən ibarət “Zevs” komandası oldu.

Viktorina qaliblərinə və bütün iştirakçılara həvəsləndirici hədiyyələr təqdim olundu.

Mayın 10-da müstəqil Azərbaycan dövlətinin memarı və qurucusu, Ümummilli Lider Heydər Əliyevin anadan olmasının 99-cu ildönümü münasibəti ilə Təhsil Kompleksimizin ibtidai siniflərində ilk dərslər Ulu Öndər Heydər Əliyevin həyat və fəaliyyətinə həsr olundu.

Birincilərimiz üçün Kompleksin “Ulu Öndər Heydər Əliyev” Muzeyinə ekskursiyalar təşkil olundu. Müəllimələr şagirdlərə xalqımızın Ümummilli Liderinin həyat yolu və zəngin siyasi irsi barədə geniş məlumat verdilər.

Mayın 10-da 132-134 nömrəli Təhsil Kompleksində müstəqil Azərbaycan dövlətinin qurucusu, dahi siyasətçi və qüdrətli dövlət xadimi Ulu Öndər Heydər Əliyevin anadan olmasının 99-cu ildönümü münasibətilə “Nə qədər Azərbaycan var, mən də varam!” adlı tədbir keçirildi.

Tədbirdə ilk öncə Dövlət Himni səsləndirildi. Azərbaycan xalqının Ümummilli Lideri Heydər Əliyevin əziz və əbədiyaşar xatirəsi bir dəqiqəlik sükutla yad edildi.

Çıxış edən Kompleksin direktoru Sara Xanlarova müasir müstəqil Azərbaycanın qurucusu Ulu Öndər Heydər Əliyevin şərəfli və xalqına, millətinə həsr olunan ömür yolundan, Azərbaycanda dövlət quruculuğundakı əvəzolunmaz xidmətlərindən, Azərbaycan xalqı və dövlətçiliyi üçün yerinə yetirdiyi xilaskarlıq missiyalarından, ölkə iqtisadiyyatının, təhsilinin, səhiyyəsinin inkişafındakı rolundan, əhalinin yaşayış şəraitinin yaxşılaşdırılması, regionların sosial-iqtisadi inkişafı istiqamətində gördüyü işlərdən danışdı. 1991-ci ildə müstəqilliyini bərpa edən Azərbaycanın sonrakı bir neçə ildə üzləşdiyi parçalanmaq, yox olmaq təhlükələrini xüsusi qeyd edən S.Xanlarova bildirdi ki, xalqın təkidli tələbi ilə Azərbaycanda hakimiyyətə gələn Ümummilli Lider Azərbaycanın müstəqilliyinin qorunması və ölkədəki qardaş qırğınının qarşısının alnması, ölkənin iqtisadi tənəzzüldən dinamik inkişaf, tərəqqi yoluna çıxarılması istiqamətində əsl xilaskarlıq missiyaları yerinə yetirdi. Vurğulandı ki, “Azərbaycan mənim ürəyimdir, Azərbaycan mənim nəfəsimdir, Azərbaycan mənim həyatımdır!” deyən Ulu Öndər bütün həyatını Azərbaycanın tərəqqisi, xalqımızın rifahına həsr etdi və Azərbaycan xalqı üçün Azərbaycançılıq adlı müqəddəs yol qoydu. S.Xanlarova qeyd etdi ki, Ulu Öndər Heydər Əliyevin Azərbaycan xalqı qarşısındakı ən böyük xidmətlərindən biri şah əsəri olan Azərbaycanı sağlığında layiqli siyasi varisi, möhtərəm Prezidentimiz İlham Əliyevə etibar etməsi oldu. 44 günlük Vətən müharibəsində Azərbaycan xalqının möhtəşəm qələbəsi Ulu Öndər Heydər Əliyevin əbədiyaşar ideyalarının və Prezident cənab İlham Əliyevin düşünülmüş və Azərbaycan xalqının milli maraqlarına xidmət edən siyasətinin təntənəsi oldu. Ulu Öndər Heydər Əliyev dünya tarixinin ən məşhur və ən sevilən Liderlərindən biri olub, möhtərəm Prezidentimiz İlham Əliyev bu gün dünyanın ən müasir, ən görkəmli və xalqı ilə birlikdə bir yumruq olmağı bacaran nadir Prezidentdir. Azərbaycan bu gün çox güclüdür, sabah da, gələcəkdə də güclü olmalıdır. Bu məqamda gənc nəslin vəzifələri və məsuliyyəti mühüm amildir. Ulu Öndərin zəngin siyasi irsinin, şərəfli həyat və fəaliyyətinin gənc nəsil tərəfindən öyrənilməsi olduqca önəmlidir. Çünki görkəmli dövlət xadimi, dahi şəxsiyyət Heydər Əliyevin həyat yolu və zəngin irsi, Onun Vətən sevgisi və Azərbaycançılıq məfkurəsi gənc və gələcək nəsillərimiz üçün böyük örnəkdir. Nə qədər Azərbaycan var, Ulu Öndər Heydər Əliyev və Onun ideyaları xalqımız tərəfindən yaşadılacaq, böyük sevgi və ehtiramla yad olunacaqdır.

Tədbirdə Ulu Öndərin həyat yoluna və çoxşaxəli dövlətçilik fəaliyyətinə həsr olunmuş videoçarxlar nümayiş olundu və Kompleksin şagirdləri Azərbaycan xalqının Ümummilli Lideri Heydər Əliyevə həsr olunan ədəbi-bədii kompozisiya ilə çıxış etdilər.

Tədbirdə həmçinin Ulu Öndər Heydər Əliyevin anadan olmasının 99-cu ildönümünə həsr olunan və 132-134 nömrəli Təhsil Kompleksində keçirilən “Nə qədər Azərbaycan var, mən də varam!” adlı qısa inşa müsabiqəsinin qalibləri diplomlarla mükafatlandırıldılar.

132-134 nömrəli Təhsil Kompleksində “ƏZİZ ŞUŞA, SƏN AZADSAN!” adlı tədbir keçirildi.

Tədbirdə müasir hərb tariximizin ən parlaq səhifələrindən biri olan Şuşa əməliyyatının maraqlı detallarının, Şuşa döyüşlərinin iştirakçısı olan cəsur əsgər və zabitlərimizin müsahibələrinin, əməliyyat zamanı çəkilmiş eksklüziv kadrların əks olunduğu “Şuşa, sən azadsan!” sənədli filmi nümayiş olundu. Kompleksin tarix müəllimləri Səmədova Tünzalə, Xəlilova Pərvanə və Abdullayev Elşən 2020-ci ilin noyabrın 8-də əsl sahiblərinə qovuşan və 8 may tarixini məğrur, qalib şəhər kimi qarşılayan Şuşanın tarixi, Azərbaycan, Qarabağ üçün tarixi, coğrafi əhəmiyyəti, bu tarixi şəhərin xalqımız üçün mənəvi dəyəri, Azərbaycan tarixinə əbədi həkk olunan Şuşanın azadlığı və 8 noyabr – Zəfər gününün 44 günlük Vətən müharibəsində dönüş nöqtəsi olması haqqında geniş çıxış etdilər və məktəblilərə ətraflı məlumat verdilər.

Tədbirdə edilən bütün çıxışlarda xüsusi vurğulandı ki, biz bu gün fəxr və qürur hissi ilə deyirik ki, tikilən, qurulan və Azərbaycanın mədəniyyət paytaxtı olan Şuşamız 8 mayı azad şəkildə qarşılayır. 44 günlük Vətən müharibəsində tarix yazan Müzəffər Ali Baş Komandan İlham Əliyevin rəhbərlik etdiyi Azərbaycan ordusu işğalçıları Şuşadan qovaraq bütünlükdə Qarabağı düşmən əsarətindən qurtardı. Azərbaycan Şuşanı əzəli, əbədi sahibinə qaytarmaqla tarixi ədaləti bərpa etdi.

Şuşa Ali Baş Komandan Prezident İlham Əliyev üçün təkcə strateji əhəmiyyətli, döyüşlərin gedişində kulminasiya nöqtəsi sayılacaq vacib şəhər deyildi, həm də sevimli, hər qarışında, daşında tariximizi yaşadan, əsl sahibini səsləyən əzəmətli bir qala idi. Ali Baş Komandan bu qalanı fəth etməklə adını şanlı tarixə yazdı.

Tədbirdə 132-134 nömrəli Təhsil Kompleksinin qəhrəman məzun Şəhidlərinin əziz xatirəsi ehtiramla yad olundu və qeyd olundu ki, 44 günlük Vətən müharibəsi Azərbaycan xalqının vətənpərvərliyinin, igidliyinin, tarixi qəhrəmanlığının və döyüşkən ruhunun Zəfəri oldu. Noyabrın 8-i Zəfər günü kimi Azərbaycan tarixinə əbədi həkk olunub. Bu şərəfli tarixi qorumaq, Vətənimizin adını daim uca tutmaq hər birimizin müqəddəs amalıdır.

Bu gün əziz Şuşamız azaddır. Orada şanlı bayrağımız qürurla dalğalanır. Şuşa hər zaman qürur mənbəyimiz olub, bundan sonra da belə qalacaq!

Bu gün fəxarətlə deyirik ki: “Əziz Şuşa, sən azadsan! Əziz Şuşa, biz qayıtmışıq, biz səni dirçəldəcəyik!”