Archives

Oktyabrın 19-da 132-134 nömrəli Təhsil Kompleksində Azərbaycan Dövlət Pedaqoji Universitetinin (ADPU) MBA “Təhsilin təşkili və idarə edilməsi” ixtisaslaşmasının magistrantları üçün “132-134 nömrəli Təhsil Kompleksinin strateji və optimal idarəetmə təcrübəsinin öyrənilməsi” mövzusunda master-klass (dərs-görüş) keçirildi.

“Təhsildə strateji idarəetmə” fənni çərçivəsində auditoriyadan kənar dərs formatında təşkil olunan görüşdə ADPU-nun elm və innovasiyalar üzrə prorektoru professor Asəf Zamanov, ADPU-nun Tədris departamentinin direktor müavini, Təhsil menecmenti kafedrasının dosenti Ənvər İmanov, Təhsil Kompleksinin direktoru, Əməkdar müəllim Sara Xanlarova, direktor müavinləri və magistrantlar iştirak etdilər.

İlk öncə magistrantlar 132-134 nömrəli Təhsil Kompleksinin Tarix Muzeyi ilə tanış oldular və zəngin ənənələrə malik olan bu məktəbin tarixi, unudulmaz məzunları, Təhsil Kompleksinin tarixi inkişaf yolu haqqında geniş məlumatlar əldə etdilər.

Təhsil Kompleksinin Akt Zalında davam edən master-klassda direktor Sara Xanlarova 132-134 nömrəli Təhsil Kompleksinin fəaliyyəti, maddi-texniki bazası, məktəbin strateji və optimal idarəetmə təcrübəsi, icra olunan beynəlxalq layihələr, burada əldə olunan yüksək nailiyyətlər və məktəbin şagirdlərinin, məzunlarının uğurlu nəticələri haqqında magistrantlara ətraflı məlumat verdi.

Magistrantlar məktəbin rəhbər işçilərinə mövzu ilə bağlı çoxsaylı suallar ünvanladılar. Qarşılıqlı fikir mübadiləsi aparılan dərs-görüşdə magistrantları maraqlandıran suallar ətraflı cavablandırıldı. Görüşdə gələcəkdə müsbət təcrübənin öyrənilməsi məqsədilə Azərbaycan Dövlət Pedaqoji Universiteti və 132-134 nömrəli Təhsil Kompleksi arasında yeni əməkdaşlıq imkanları müzakirə olundu.

Oktyabrın 18-də 132-134 nömrəli Təhsil Kompleksində 44 günlük Vətən müharibəsinin Şəhidləri, Təhsil Kompleksinin qəhrəman məzunları Nicat Tarıverdiyev, Fərid Əliyev və Yusif Budaqovun xatirə lövhələrinin açılış mərasimi keçirildi.

Açılış mərasimində Səbail rayon İcra Hakimiyyətinin başçısı Vüqar Zeynalov, Milli Məclisin deputatı Nigar Arpadarai, YAP Səbail rayon təşkilatının sədri Muxtar Nağıyev, Səbail rayon Şəhidlərinin valideynləri, ailə üzvləri, Vətən müharibəsi qaziləri, 132-134 nömrəli Təhsil Kompleksinin müəllim-şagird kollektivi, rayon ictimaiyyəti nümayəndələri iştirak etdilər.

İlk öncə, Azərbaycanın müstəqilliyi və ərazi bütövlüyü uğrunda qəhrəmancasına döyüşərək həlak olan Şəhidlərimizin əziz xatirəsi bir dəqiqəlik sükutla yad edildi. Daha sonra Təhsil Kompleksinin qəhrəman məzun Şəhidləri Nicat Tarıverdiyev, Fərid Əliyev və Yusif Budaqovun xatirə lövhələri önünə güllər düzüldü, xatirələrinə ehtiram ifadə olundu.

Çıxış edən Səbail rayon İcra Hakimiyyətinin başçısı Vüqar Zeynalov 44 günlük Vətən müharibəsində Azərbaycan xalqının möhtəşəm Zəfəri və qəhrəmanlıq salnaməsi, dövlət başçısı, müzəffər Ali Baş Komandan İlham Əliyevin rəhbərliyi altında rəşadətli Azərbaycan Ordusunun Zəfər yolu və xalqımızın müharibə dövründəki milli birliyi, işğaldan azad olunan ərazilərdə həyata keçirilən misilsiz bərpa, yenidənqurma işləri, 18 oktyabr – dövlət müstəqilliyinin bərpasından sonra ölkəmizdə baş verən hadisələr və müasir müstəqil Azərbaycanın inkişaf yolu haqqında danışdı. İcra başçısı qeyd etdi ki, biz qəhrəman Azərbaycan Ordusu, şanlı Zəfər tarixi yazan Şəhidlərimiz, qazilərimiz ilə fəxr edirik. Fərəhləndirici haldır ki, canlarını Vətən uğrunda fəda edən əziz Şəhidlərimizin adları, qəhrəmanlığı əbədiləşdirilir, onların xatirə lövhələri, büstləri ucaldılır, kitablar yazılır, filmlər çəkilir. Vurğulandı ki, gələcək nəsillər qəhrəman Şəhidlərimizi tanıyacaq, onların qəhrəmanlığından örnək götürəcək və Vətənin keşiyində əzmlə dayanacaqlar.

Milli Məclisin deputatı Nigar Arpadarai bugünkü tədbirin Azərbaycan xalqı üçün əlamətdar tarixi gündə – 18 oktyabrda keçirildiyini qeyd edərək bildirdi ki, Azərbaycan keşməkeşli müstəqillik yolu keçib, çox sınaqlardan üzüağ çıxıb və qəhrəman oğulları sayəsində bu gün, müasir, qüdrətli dövlətə çevrilib. Biz bu gün qürurlu, qalib xalqıq, çünki Azərbaycanın ərazi bütövlüyü bərpa olunub, işğaldan azad olunan ərazilərimizdə üçrəngli bayrağımız ucaldılıb. Deputat qeyd etdi ki, ölkəmizdəki xalq-iqtidar birliyi sayəsində biz əzəli düşmənimizi ağır məğlubiyyətə uğratdıq və Azərbaycanın müasir gəncləri möhtəşəm qələbə günləri yaşadılar. N. Arpadarai gənclərin qarşısında duran vəzifələrdən danışaraq vurğuladı ki, gənc nəsillər onlara əmanət olunan müasir, müstəqil Azərbaycan dövlətini göz bəbəyi kimi qorumalı və bayrağımızı daim ucalarda qürurla dalğalandırmalıdırlar.

YAP Səbail rayon təşkilatının sədri Muxtar Nağıyev çıxışında bildirdi ki, Azərbaycanın ərazi bütövlüyü uğrunda canlarını fəda edən Şəhidlərimizin xatirəsini daima əziz tutmaq hər birimizin vətəndaşlıq borcudur. Şəhidlərimiz, qazilərimiz, qəhrəman Azərbaycan əsgəri döyüş meydanında böyük qəhrəmanlıq nümayiş etdirdilər, müqəddəs amal üçün həyatlarını qurban verdilər, eyni zamanda xalqımızın milli birliyinə nail oldular. Vurğulandı ki, Ulu Öndər Heydər Əliyev tərəfindən əsası qoyulan siyasət ölkəmizdə uğurla davam etdirilir və Azərbaycanın qlobal miqyasda nailiyyətləri hər bir vətəndaşımızı qürurlandırır.

132-134 nömrəli Təhsil Kompleksinin direktoru, Əməkdar müəllim Sara Xanlarova çıxışında qeyd etdi ki, Təhsil Kompleksinin qəhrəman məzunlarının xatirə lövhələrinin açılış mərasimi məktəbin tarixində son dərəcə əlamətdar və unudulmaz hadisədir. Direktor vurğuladı ki, 132-134 nömrəli Təhsil Kompleksi hər zaman öz məzunları ilə fəxr edib. Bu məktəb vətənpərvər, savadlı məzunlar, qəhrəman Şəhidlər yetişdirən məktəbdir. Birinci Qarabağ müharibəsi Şəhidi, Milli Qəhrəman Riad Əhmədov, 20 Yanvar Şəhidi Larissa Məmmədova, 44 günlük Vətən müharibəsinin qələbə Şəhidləri Nicat Tarıverdiyev, Fərid Əliyev və Yusif Budaqov 132-134 nömrəli Təhsil Kompleksinin hər zaman böyük fəxr və qürurla anılan qəhrəman məzunlarıdır. Müqəddəs Vətən torpaqlarının azadlığı, xalqımızın müstəqilliyi uğrunda canlarını fəda edən bu qəhrəmanların hər birinin şərəfli həyat yolu bu məktəbdə böyüyən, yetişən gənc və gələcək nəsillər üçün böyük örnəkdir. Müasir, müstəqil, qüdrətli Azərbaycanın Ulu Öndər Heydər Əliyevin və görkəmli dövlət xadimi, ölkə başçısı, qalib ordunun qalib sərkərdəsi, müzəffər Ali Baş Komandan İlham Əliyevin siyasi yolu ilə uğurla irəlilədiyini vurğulayan S.Xanlarova əminliyini ifadə etdi ki, qalib Azərbaycan xalqı bundan sonra da Ümummilli Lider Heydər Əliyev siyasətinin uğurlu və layiqli davamçısı Prezident İlham Əliyevin ətrafında sıx birləşərək inamla gələcəyə addımlayacaq və ildən-ilə yeni qələbələrə imza atacaqdır. Qəhrəman Şəhidlərimizin əziz xatirəsi xalqımız tərəfindən daim böyük ehtiramla yad olunacaq və yaşadılacaqdır.

Çıxış edən Şəhid məzunlarımızın valideynləri övladlarının xatirəsinin və qəhrəmanlıqlarının əbədiləşdirilməsi istiqamətində görülən işlər üçün rayon rəhbərliyinə, 132-134 nömrəli Təhsil Kompleksinin müəllim və şagird kollektivinə təşəkkür etdilər. Valideynlər bildirdilər ki, biz bu gün çox qürurluyuq, çünki, övladlarımız yalnız bir ailənin, bir məktəbin deyil, böyük bir xalqın qəhrəmanına çevrildilər. 44 günlük müqəddəs Vətən müharibəsində döyüşən, Azərbaycan xalqına Zəfər yaşadan və bu yolda Şəhid olan qəhrəmanların hər biri igidlik dastanı və fəxarət tarixi yazdılar. Əziz Şəhidlərimizin xatirəsinin yaşadılması və gənc nəslin vətənpərvərlik ruhunda böyüdülməsində müəllimlərin rolunu xüsusi vurğulayan Şəhid valideynləri qeyd etdilər ki, Şəhid ailələrinə göstərilən hər bir diqqət bu ailələr üçün çox önəmli və dəyərlidir.

Tədbirdə 132-134 nömrəli Təhsil Kompleksinin şagirdləri vətənpərvərlik mövuzusunda Şəhidlərimizə həsr olunan ədəbi-musiqili kompozisiya ilə çıxş etdilər.

Allah bütün Şəhidlərimizə rəhmət eləsin! Qarabağ Azərbaycandır!

AZTV

Oktyabrın 13-də Azərbaycanın görkəmli tarixçi alimi, tarix elmləri doktoru, Azərbaycan Respublikasının əməkdar elm xadimi, akademik Yaqub Mahmudov 132-134 nömrəli Təhsil Kompleksinin qonağı oldu və Kompleksin yuxarı sinif şagirdləri üçün “Qalib xalq adını özümüzə qaytaran Böyük Tarixi Qələbə!” mövzusunda geniş mühazirə ilə çıxış etdi.

44 günlük Vətən müharibəsinin tarixi əhəmiyyəti, mühüm hərbi-siyasi nəticələri, xalqımızın möhtəşəm qələbəsini şərtləndirən amillər, müasir müstəqil Azərbaycanın siyasi dirçəlişi, Azərbaycanın zəngin dövlətçilik tarixi, görkəmli tarixi şəxsiyyətləri, qəhrəman sərkərdələri, mərkəzləşdirilmiş böyük Azərbaycan dövləti olan Səfəvilər İmperiyası, Türk dövlətlərinin tarixi, əzəli Azərbaycan torpaqları olan Qarabağ və İrəvan xanlıqlarının tarixi, coğrafiyası, mədəni və dini abidələri haqqında məktəblilərə ətraflı məlumat verən akademik bildirdi ki, 44 günlük Vətən müharibəsində möhtərəm Prezidentimiz, müzəffər Ali Baş Komandan İlham Əliyevin rəhbərliyi ilə rəşadətli Ordumuz, Azərbaycan xalqı dünya hərb tarixinin parlaq səhifəsini yazdı.

Akademik Yaqub Mahmudov mühazirəsində qeyd etdi ki, dünyanın böyük imperiyalar yaradan, yadelliləri dəfələrlə ağır məğlubiyyətlərə uğradan Azərbaycan xalqı 2020-ci ildə öz şərəfli tarixi adını – qalib xalq adını özünə qaytardı. Qarabağ zəfəri 1813-cü və 1828-ci il faciələrindən sonra Azərbaycan xalqının müharibə meydanında qazandığı ən böyük tarixi nailiyyətdir. 2020-ci ildə ilk dəfə olaraq xalqımızın sərkərdə oğlu İlham Əliyevin başçılıq etdiyi müzəffər Azərbaycan Ordusu tərəfindən erməni işğalçıları Azərbaycan torpaqlarından rüsvayçılıqla qovulub çıxarıldı. Müharibə nəticəsində sübut olundu ki, havadarları olmadıqda erməni faşizmi Azərbaycan xalqının, Azərbaycan Ordusunun qarşısında heç nədir!

Tarixçi alim diqqətə çatdırdı ki, 44 gün davam edən Vətən müharibəsi Azərbaycan üçün ağır sınaq idi. Bu ağır sınaq günlərində dost-düşmən çox aydın göründü. Dünya tarixinin və siyasətinin dahi bilicisi, Sovet İttifaqı kimi nəhəng dövlətin rəhbərlərindən biri kimi siyasət zirvəsinə ucalmış Ulu Öndər Heydər Əliyevin “Bir millət, iki dövlət” kəlamı Vətən müharibəsi zamanı cəbhədə, döyüş meydanlarında sınaqdan çıxdı. Biz bu müharibədə bir daha tarixi ibrət dərsi aldıq: Azərbaycan və Türkiyə daim birlikdə olmalıdır! Bunun alternativi yoxdur.

Mahmudov vurğuladı ki, biz yağı düşmən üzərində ona görə parlaq zəfər çala bildik ki, 44 günlük müharibədən əvvəl Prezident İlham Əliyevin başçılığı ilə informasiya müharibəsində düşmən üzərində qələbə çalmışdıq. İnformasiya müharibəsi bundan sonra da davam edəcək və kəskinləşəcək. Biz həmişə düşməni məğlub etməyə hazır və qadir olmalıyıq!

Vətən müharibəsində qələbəmizin ən mühüm tarixi əhəmiyyəti və nəticələrindən biri budur ki, Prezident İlham Əliyevin xüsusi səyləri nəticəsində Cənubi Qafqazın beynəlxalq münasibətlər tarixində dönüş baş verdi və yeni dövr başlandı. Tarixin gedişi dəyişdi. Tarix boyunca bütün Vətən müharibələrində xalq qalib gəlib. Bizim 44 günlük Vətən müharibəmizdə də xalqımız qalib gəldi, dəmir yumruq kimi birləşərək qalib gəldi. Xalq bu müharibədə öz Prezidentinə – Ordusunun sərkərdəsinə inandı, onun və Vətən torpaqları naminə çarpışan ordunun arxasında durdu. Azərbaycan xalqı müharibədən qalib xalq kimi çıxdı. Bu, Azərbaycanımızın gələcək tarixinə olduqca müsbət təsir göstərəcəkdir.

Akademik Yaqub Mahmudov zəngin tarixi ənənələri olan 132-134 nömrəli Təhsil Kompleksinin şagirdlərinə hər zaman xalqımızla, Vətənimizlə, Azərbaycanın dövlətçilik tarixi və dahi şəxsiyyətləri ilə qürur duymağı, tariximizi dərindən öyrənməyi, xarici dilləri yüksək səviyyədə öyrənərək Azərbaycan həqiqətələrini hər yerdə təbliğ etməyi, cəsarətli, sədaqətli və mərd olaraq Vətənimizə sahib çıxmağı tövsiyə etdi. Alim əminliyini ifadə etdi ki, qalib dövlətin gəncləri arasından gələcəkdə böyük alimlər, Nizamilər, Tusilər, Lütfi Zadələr, Cavad xanlar, Hüseynqulu xanlar, Ziyadoğulları nəslindən olan qalib sərkərdələr, Sabirlər, Bəxtiyar Vahabzadələr yetişəcək və bu vətənpərvər nəsil hər sahədə hər zaman zəkaları ilə qalib gələcəklər.

Tədbirdə 132-134 nömrəli Təhsil Kompleksinin təlim-tərbiyə işləri üzrə direktor müavini Şəfəq Şirinova, Kompleksin tarix müəllimələri Aygün Əfəndiyeva və Tünzalə Səmədova, məktəblilər çıxış edərək görkəmli tarixçi alim Yaqub Mahmudova bugünkü unudulmaz mühazirə üçün təşəkkür etdilər və gənc nəslin vətənpərvərlik ruhunda böyüməsində, şanlı Azərbaycan tarixinin müstəqillik dövründə düzgün yazılmasında və təbliğində Yaqub müəllimin əvəzsiz xidmətlərini və misilsiz töhfələrini vurğuladılar.

Akademik Yaqub Mahmudov 132-134 nömrəli Təhsil Kompleksinin kitabxanasına “Seçilmiş əsərləri” çoxcildliyini hədiyyə etdi.

AzərTAC
İkiSahil
Olaylar.az
Sherg.az
Modern.az

Oktyabrın 11-də 132-134 nömrəli Təhsil Kompleksinin qəhrəman məzun Şəhidi Budaqov Yusif Ramiq oğlunun doğum günü münasibətilə məzarı ziyarət olundu.

Rayon ictimaiyyətinin nümayəndələri 44 günlük Vətən müharibəsinin Şəhidi Budaqov Yusif Ramiq oğlunun xatirəsini ehtiramla yad etdilər, məzarı üzərinə gül dəstələri düzdülər və ruhuna dualar oxudular.

Vətən müharibəsinin ilk günlərindən döyüşə atılan Yusif Budaqov oktyabrın 27-də Füzuli rayonu istiqamətində gedən döyüşlərdə şəhidlik zirvəsinə ucalmışdır. Döyüşlərdə göstərdiyi qəhrəmanlığa görə Azərbaycan Respublikasının Prezidenti cənab İlham Əliyev tərəfindən ölümündən sonra “Vətən uğrunda”, “Xocavəndin azad olunmasına görə” və “Füzulinin azad olunmasına görə” medalları ilə təltif olunmuşdur.

Qəhrəman məzun Şəhidimiz Yusifin şərəfli həyat və döyüş yolu gənc nəsillərə hər zaman örnək olacaq, Azərbaycan xalqı qəhrəman Şəhidlərimizin əziz və əbədiyaşar xatirəsini daima uca tutacaq və onların Vətən uğrundakı şücaət və fədakarlığını minnətdarlıqla yad edəcəklər. Ruhun şad olsun, Vətən oğlu!

Oktyabrın 10-da 132-134 nömrəli Təhsil Kompleksi və Milli Azərbaycan Tarixi Muzeyinin birgə təşkilatçılığı ilə böyük şərqşünas alim, filologiya elmləri doktoru, elm təşkilatçısı, ictimai xadim, professor Aida xanım İmanquliyevanın anadan olmasının 83-cü ildönümünə həsr edilmiş “Elmin zirvəsinə ucalan alim ömrü” adlı tədbir keçirildi.

Tədbirdə çıxış edən Təhsil Kompleksinin direktoru, Əməkdar müəllim Sara Xanlarova 1957-ci ildə 132 nömrəli orta məktəbi (indiki 132-134 nömrəli Təhsil Kompleksi) qızıl medalla bitirmiş Kompleksin unudulmaz məzunu professor Aida xanım İmanquliyevanı böyük şərqşünas alim, pedaqoq, parlaq şəxsiyyət, zərif və nəcib qadın və mehriban ana kimi xarakterizə edərək görkəmli alimin şərəfli, gənc və gələcək nəsillərə örnək olan ömür yolu haqqında məktəblilərə geniş məlumat verdi. Vurğulandı ki, Azərbaycanda ilk şərqşünas qadın elmlər doktoru olan Aida xanım Azərbaycan qadınına xas olan ən gözəl, ən nəcib xüsusiyyətləri özündə cəmləşdirən xeyirxah insan və Vətənə yüksək intellektual səviyyəli, dərin mənəvi keyfiyyətləri ilə nümunə olan övladlar bəxş edən qayğıkeş ana olub.

Son illərdə ölkəmizdə təhsilin inkişafı ilə bağlı həyata keçirilən tədbirləri və Azərbaycan xalqının Ümummilli Lideri Heydər Əliyevin “Təhsil millətin gələcəyidir” müdrik kəlamını xüsusi qeyd edən S.Xanlarova bildirdi ki, əsası Ulu Öndər Heydər Əliyev tərəfindən qoyulan milli təhsil strategiyası bu gün möhtərəm Prezidentimiz cənab İlham Əliyev tərəfindən uğurla davam etdirilir. Dövlətin təhsillə bağlı strategiyasının həyata keçirilməsində Respublikanın Birinci vitse-prezidenti Mehriban xanım Əliyevanın və rəhbərlik etdiyi Heydər Əliyev Fondunun fəaliyyəti xüsusi ilə diqqət çəkir. Bu gün Azərbaycanda heç vaxt olmayan qədər geniş bazaya malik təhsil infrastrukturu yaradılıb. Bununla da ölkədə təhsilə qayğı, onun maddi-texniki bazasının möhkəmləndirilməsi işi ümummilli səviyyəyə qaldırılıb.

Məktəbin fəaliyyətinin əsas nəticəsinin onun şagirdlərinin və məzunlarının nailiyyətlərini olduğunu diqqətə çatdıran S.Xanlarova bildirdi ki, Azərbaycanın təhsil tarixində özünəməxsus yeri olan 132-134 nömrəli Təhsil Kompleksinin müəllim-şagird kollektivi məktəbin unudulmaz məzunu, Azərbaycanın dünya elminə bəxş etdiyi görkəmli simalardan olan Aida xanım İmanquliyeva ilə fəxr edir. Aida xanım İmanquliyevanın xatirəsi yeni nəsillər tərəfindən də hər zaman dərin ehtiram və böyük məhəbbətlə yad olunur, əsərləri dönə-dönə oxunur, elmi irsi araşdırılır və təbliğ edilir. Direktor əminliyini ifadə etdi ki, 132-134 nömrəli Təhsil Kompleksinin şagirdləri Kompleksin unudulmaz məzunlarından hər zaman layiqli örnək alacaq və Azərbaycanın gələcək gözəl vətəndaşları və böyük alimləri kimi yetişəcəklər.

Çıxış edən Milli Azərbaycan Tarixi Muzeyinin direktoru, akademik Nailə Vəlixanlı məzunu olduğu 132 nömrəli orta məktəb (indiki 132-134 nömrəli Təhsil Kompleksi) haqqında xatirələrini şagirdlərlə bölüşərək, məktəbin unudulmaz məzunu, professor Aida xanım İmanquliyevanın Azərbaycanın elm və təhsil tarixindəki müstəsna rolundan bəhs etdi, onun elmi irsinin, əsərlərinin əhəmiyyətini diqqətə çatdırdı. Vurğulandı ki, Şərq-Qərb mədəni əlaqələrinin inkişafında professor Aida İmanquliyevanın tədqiqatları xüsusilə böyük aktuallıq kəsb edir. N.Vəlixanlı Aida xanım İmanquliyevanın əziz xatirəsinin könüllərdə daim yaşayacağını qeyd edərək, 132-134 nömrəli Təhsil Kompleksinin şagirdlərinə seçdikləri fəaliyyət sahəsindən asılı olmayaraq hər zaman bu tarixi məktəbin adını layiqli şəkildə təmsil etməyi tövsiyə etdi.

Tədbirdə professor Aida İmanquliyevanın tələbələri olmuş 132-134 nömrəli Təhsil Kompleksinin Ərəb dili müəllimi Gülnarə Məmmədova, hazırda təqaüddə olan Kompleksin Ərəb dili müəllimi Dilşad Səfərli, Kompeksin tarix müəllimələri Aygün Əfəndiyeva və Tünzalə Səmədova ölkəmizdə şərqşünaslıq məktəbinin yaranmasında mühüm rolu olan Aida xanımın elmi irsinin əhəmiyyətindən geniş bəhs etdilər. Çıxışlarda qeyd olundu ki, ömrünü Şərq mədəniyyətini və məhcər ədəbiyyatını öyrənməyə sərf edən Aida xanım İmanquliyeva müasir ərəb ədəbiyyatının tədqiqində yeni səhifə açıb, öz fundamental araşdırmaları ilə təkcə Azərbaycan şərqşünaslığını deyil, dünya şərqşünaslığını da zənginləşdirib və inkişaf etdirib. Azərbaycan şərqşünaslığında ilk qadın elmlər doktoru, professor olan Aida İmanquliyeva Şərq-Qərb ədəbi əlaqələrini araşdıran ilk azərbaycanlı olub, Bakı Dövlət Universitetində səmərəli pedaqoji fəaliyyət göstərib, ərəb filologiyası fənnindən oxuduğu maraqlı mühazirələri və xeyirxahlığı, yüksək insani keyfiyyətləri ilə yetirmələrinin, tələbələrinin yaddaşlarında dərin izlər qoyub.

Tədbirdə böyük alimin həyat və fəaliyyətindən bəhs edən videoçarxlar nümayiş olundu. Təhsil Kompleksinin şagirdləri ictimai xadim, professor Aida xanım İmanquliyevanın zəngin elmi irsi və şərəfli, nümunəvi həyat yolu ilə bağlı çıxışlar etdilər.

Bütün çıxışlarda vurğulandı ki, 132-134 nömrəli Təhsil Kompleksinin unudulmaz məzunu Aida xanım İmanquliyevanın əziz xatirəsi, Onun şəxsiyyətini və elmi irsini yüksək dəyərləndirən çoxsaylı insanların qəlbində əbədi olaraq yaşayacaqdır.

Oktyabrın 5-də Ağdamda “Dayanıqlı İnkişaf Məqsədləri” və “Yeni Şəhər Gündəliyi” – postmünaqişə dövründə bərpa və yenidənqurmanın aparıcı qüvvəsi kimi” mövzusunda keçirilən Azərbaycan Milli Şəhərsalma Forumu Azərbaycan həqiqətlərinin bir daha dünyaya çatdırıldığı növbəti beynəlxalq platforma oldu. Azərbaycan Respublikasının Prezidenti İlham Əliyev Forumun açılış mərasimindəki nitqində Ermənistanın işğalçılıq siyasətinin acınacaqlı nəticələrini bir daha faktlar və əsaslı sübutlarla dünya ictimaiyyətinə təqdim etdi. Artıq bütün dünya Azərbaycanın işğaldan azad olunmuş ərazilərində erməni vandalizminin, barbarlığının, xalqımıza qarşı aparılan etnik təmizləmə siyasətinin canlı şahididir.

Ötən 30 illik işğal dövründə Azərbaycanın düşmən tapdağında olan bütün şəhər və kəndləri qəddarcasına dağıdılıb, ermənilər bizim torpaqlarımızda qanunsuz məskunlaşdırma siyasəti həyata keçirib. İşğaldan azad olunan ərazilərə gələn xarici ekspertlər, jurnalistlər viran qoyulmuş Azərbaycan şəhərlərinə, Füziliyə, Cəbrayıla, Qubadlıya, Zəngilana “urbisid qurbanı”, “ruhlar şəhəri”, Ağdama isə də “Qafqazın Xirosiması” adlarını verib. Bu adların hər biri xalqımıza qarşı törədilən insanlıq faciəsi və hərbi cinayətlərin miqyasını əks etdirir.

Ağdam şəhərinin bir zamanlar yerləşdiyi məkanda keçirilən Forumda dünyanın 40-dan çox ölkənin nümayəndəsi, BMT təmsilçisi iştirak etdilər. Xarici qonaqlar Ağdamda gördükləri mənzərəni Qarabağ ərazisində hər bir kənddə görə bilərlər. Bütün binaların dağıdılmadığı yeganə yerlər Şuşa, Laçın və qismən Kəlbəcər olub. Bunun səbəbi odur ki, Ermənistan dövləti müxtəlif ölkələrdən olan erməniləri işğal edilmiş ərazilərdə yerləşdirmək üçün qanunsuz məskunlaşma siyasəti yürüdürdü. Bu, beynəlxalq hüququn və Cenevrə Konvensiyasının kobud şəkildə pozulması hesab olunur. Ermənilər Azərbaycan xalqına qarşı hərbi cinayətlər işləməklə yanaşı, xalqımızın əzəli torpaqlarında tarixi, mədəni, dini irsini silmək üçün kütləvi dağıntılar törədib, xalqımızın maddi və mənəvi tarixi xəzinələri talan olunub, oğurlanıb, məhv olunub. İşğalçı həmçinin daha bir beynəlxalq cinayətə imza ataraq Azərbaycan ərazilərində qanunsuz məskunlaşma siyasəti yürüdüb. Lakin, 44 günlük müharibə təcavüzkar Ermənistana əsaslı cavab oldu, xalqımızın əzəli düşmənin başı əzildi və qisas qiyamətə qalmadı.

Dövlət başçısının bu beynəlxalq Forumdakı tarixi nitqində qeyd etdiyi kimi, əvvəllər bizim milli ideya torpaqlarımıza qayıtmaqdan, ədaləti və ərazi bütövlüyümüzü bərpa etməkdən ibarət idi və bütün Azərbaycan xalqı bu ideya ətrafında birləşmişdi, özünü buna hazırlamışdı. 8 noyabr 2020-ci il tarixində Azərbaycan xalqı Böyük Qələbəni gününü tarixə həkk etdi. İndi azərbaycan xalqı artıq öz ata-baba yurlarına qayıdır. İndi biz keçmiş məcburi köçkünlərin öz yurdlarına tezliklə qayıtması üçün bütün potensialımızı səfərbər edirik. İşğaldan azad olunan ərazilərdə irimiqyaslı infrastruktur layihələr icra olunur. Biz beynəlxalq hüquq normalarından istifadə edərək geri qayıtdıq və biz burada yaşamağa, əbədi yaşamağa geri qayıtdıq. Əminik ki, möhtərəm Prezidentimiz İlham Əliyevin rəhbərliyi ilə həyata keçirilən bu möhtəşəm bərpa və quruculuq işləri nəticəsində Qarabağ yaxın illərdə cənnət məkana çevriləcək.

Manaflı Gülər

132-134 nömrəli Təhsil Kompleksinin İngilis dili müəllimi

Oktyabrın 5-də BMT-nin Məskunlaşma Proqramı (UN-HABITAT) və Dövlət Şəhərsalma və Arxitektura Komitəsinin birgə əməkdaşlığı, ADA Universitetinin təşkilati dəstəyi ilə Ağdamda “Dayanıqlı İnkişaf Məqsədləri” və “Yeni Şəhər Gündəliyi” – postmünaqişə dövründə bərpa və yenidənqurmanın aparıcı qüvvəsi kimi” mövzusunda Azərbaycan Milli Şəhərsalma Forumu işə başlayıb.

Azərbaycan Milli Şəhərsalma Forumunun məhz Azərbaycanın işğaldan azad olunan ərazilərində, Ağdam şəhərinin bir zamanlar yerləşdiyi məkanda təşkil olunması və bu mötəbər beynəlxalq tədbirdə 40-dan çox ölkənin nümayəndələrinin, şəhər merlərinin və mer müavinlərinin, BMT-nin nümayəndəsinin iştirakı tədbirin əhəmiyyəti və əhatə miqyası baxımından olduqca önəmlidir. “Yeni Şəhər Gündəliyi” – postmünaqişə dövründə bərpa və yenidənqurmanın aparıcı qüvvəsi kimi” mövzusunda Azərbaycanda təşkil olunan Forumda dünya dövlətlərinin nümayəndələrinin iştirakı Azərbaycanın haqq mübarizəsinə və Azərbaycanın beynəlxalq hüququ bərpa etdiyi, BMT qətnamələrini icra etdiyi, BMT-nin Nizamnaməsini, xüsusilə də onun özünümüdafiə ilə bağlı müddəasından istifadə edərək xalqımızın milli ləyaqətini bərpa etdiyi 44 günlük Vətən müharibəsinə və post-müharibə dövründə regionda yaranan yeni reallıqlara beynəlxalq ictimaiyyətin göstərdiyi dəstəyin ən bariz örnəyidir.

Ötən 30 illik işğal dövründə ən çox təəssüf doğuran məqamlardan biri bu idi ki, beynəlxalq təşkilat nümayəndələri, müxtəlif ölkə təmsilçiləri, xüsusilə bu münaqişəni həll etmək üçün ATƏT-dən mandatı olan Minsk qrupu adlandırılan struktur və onun həmsədrləri işğal olunmuş ərazilərə dəfələrlə səfərlər edib, bütün şəhər və kəndlərin qəddarcasına dağıdılmasının, ermənilərin bizim torpaqlarımızda qanunsuz məskunlaşdırılmasının şahidi olublar, lakin Ermənistanı qınamayıblar. Azərbaycana qarşı işağlçı Ermənistan bütün mümkün vasitələrlə yalan və şər kampaniyası təşkil edib, Qarabağdakı vəziyyəti olduğu kimi yox, təhrif olunmuş şəkildə təqdim edib, lakin dünya bu haqsızlığa göz yumub və Azərbaycanın beynəlxalq hüquqlarının kobudcasına pozulmasına qarşı heç bir əməli fəaliyyət göstərməyib. İndi isə, Azərbaycan öz gücünə tarixi ədaləti bərpa etdikdən sonra bütün dünya Qarabağda baş verən insanlıq faciəsinə, Azərbaycan xalqına qarşı aparılan etnik təmizləmə siyasətinə, işğaldan dövründə xalqımızın əzəli torpaqlarında həyata keçirilən dəhşətli dağıntı və viran qoyma siyasətinə şahidlik edir.

Azərbaycan Respublikasının Prezidenti İlham Əliyevin Ağdamda Azərbaycan Milli Şəhərsalma Forumunun açılış mərasimindəki nitqi bir daha Azərbaycan dövlətinin haqq səsi və işğalçının ifşası oldu. Dövlətimizin başçısının nitqində qeyd etdiyi kimi, Sovet İttifaqının vaxtında Ağdam Qarabağda ən böyük şəhər idi, həyatla coşub-daşan şəhər idi və Azərbaycanda hər kəs bunu bilir. Ağdam işğal illərində dağıdılıb. O, Birinci Qarabağ müharibəsi dövründə dağılmamışdı. O, sonradan, demək olar ki, 30 il ərzində daşları bir-bir sökülməklə dağıdılıb, bütün binalar viran qoyulub və sökülüb, daşlar oğurlanıb və satılıb. Görə bilərsiniz ki, yarıdağılmış yeganə tikili Cümə məscidinin binası olub. Lakin onun keçmiş işğal altında olan ərazilərdə Ermənistanın dağıtdığı digər məscidlərlə birlikdə dağıdılmamasının səbəbi odur ki, onlar minarələrdən müşahidə üçün, Azərbaycan Silahlı Qüvvələrinin potensial hərəkətini görmək üçün istifadə edirdilər. Bu ərazilər işğaldan azad etdikdən sonra xarici ekspertlər, jurnalistlər buraya gəldilər və Ağdama bir neçə ad verdilər. Bu adlardan biri “urbisid qurbanı” idi, bu da tamamilə doğru idi. Digər ad “ruhlar şəhəri” idi, bu da tamamilə doğrudur. Biri də “Qafqazın Xirosiması” idi. Lakin Xirosimadan fərqli olaraq, dağıntılar atom bombasının partlaması nəticəsində baş verməmişdir, bu, qonşularımızın vandalizmi və barbarlığı nəticəsində olmuşdur.

Bəli, ölkə başçısının çox dəqiq və əsaslı faktlarla qeyd etdiyi kimi, bu gün işğaldan azad olunmuş ərazilərdə gördüyümüz ürəkağrıdıcı mənzərə, erməni vandalizmi, barbarlığının nümunəsi olan qeyri-insani rəftar, xalqımızın əzəli torpaqlarında Azərbaycan tarixinin, mədəniyyətinin, dini irsinin silinməsi cəhdləri artıq dünya ictimaiyyəti tərəfindən də görülür, təsdiq olunur.

Bu gün Azərbaycan yeni çağırışlarla üz-üzədir. Ancaq bunlar xoş çağırışlardır – Qarabağın və Şərqi Zəngəzurun yenidən qurulması, bu torpaqların sahiblərinin ata-baba yurdlarına geri qayıtması və Azərbaycanın hər hansı bölgəsində yaşayan keçmiş məcburi köçkünlər üçün daha yaxşı şəraitin yaradılmasıdır. Əminliklə deyə bilərik ki, Azərbaycan Milli Şəhərsalma Forumu həm işğaldan azad olunmuş Ağdamda keçmiş məcburi köçkünlərin öz yurdlarına tezliklə qayıtması, burada irimiqyaslı infrastruktur layihələrinin icrası üçün yeni imkanlar yaratmaq məqsədinə xidmət etdi, həm də Azərbaycan həqiqətlərinin bir daha dünyaya nümayiş olunması üçün yeni fürsətlər yaratdı.

Forumun yüksək səviyyədə təşkili, dünya ölkələri tərəfindən Foruma olan böyük maraq və yüksək iştirakın təmini və bu beynəlxalq əhəmiyyətli tədbirin gələcək nəticələri deməyə əsas verir ki, bu, həqiqətən də müasir Azərbaycandır, bu, yeni Azərbaycandır. İndi artıq işğal damğasından azad olunmuş Azərbaycan yüksəlməkdədir və şübhə yoxdur ki, Azərbaycan yaxın illərdə nəinki regionumuzda, eləcə də bütün dünyada ən uğurlu ölkələrdən biri olmağa davam edəcəkdir.

Əliyeva Lalə

132-134 nömrəli Təhsil Kompleksinin Biologiya müəllimi

“Zəfər tarixi” fənninin tədrisi çərçivəsində şagirdlərimizin Zəfər tariximiz barədə məlumatlandırılması, Azərbaycanın ərazi bütövlüyü uğrunda şücaət göstərərək Şəhidlik zirvəsinə ucalmış qəhrəmanlarımızın təhsilalanlar arasında tanıdılması, gənc nəslin vətənpərvərlik ruhunda tərbiyə edilməsi məqsədlərinə xidmət edən dərslər təşkil olunur.

Dünən Azərbaycan bölməsi “9 c” sinifində Zəfər tarixi dərsi “Vətən Müharibəsinin 10-cu günü – böyük qələbəyə doğru…” mövzusuna həsr olundu.

Dərsdə şagirdlər Azərbaycanın tarixi Qarabağ Zəfəri, rəşadətli Azərbaycan Ordusunun 44 günlük Zəfər yolu, bu müharibədə əldə olunan qələbədən sonra Azərbaycanın regionda yaratdığı yeni geosiyasi reallıqlar, Azərbaycan xalqının bu qələbəsinin tarixi əhəmiyyəti, qalib dövlətin gəncləri kimi vətənpərvərlik ruhunda böyüyən məktəblilərin üzərinə düşən vəzifələr haqqında müzakirələrdə iştirak etdilər və mövzular üzrə təqdimatlarla çıxış etdilər.

Qeyd olundu ki, “9 c” sinif şagirdlərindən iki nəfər məktəblinin yaxın qohumları 44 günlük Vətən müharibəsində qəhrəmancasına Şəhid olub. Dərsdə Şəhidimiz Kərimli İsmayıl Ceyhun oğlunun şərəfli həyat və döyüş yolu haqqında şagirdlərin hazırladığı məlumat bukleti təqdim olundu və Şəhidlərimizin qəhrəmanlığının əbədi olaraq xalqımızın qəlbində yaşayacağı vurğulandı.

Müəllim: Kompleksin Tarix müəllimi Xəlilova Pərvanə

Oktyabrın 5-də Səbail rayon İcra Hakimiyyətində “5 oktyabr – Beynəlxalq  Müəllimlər Günü” ilə bağlı tədbir keçirilmişdir.

Tədbirdə 132-134 nömrəli Təhsil Kompleksinin Azərbaycan dili müəllimi Əliyeva Rəna Malik qızı və Azərbaycan dili və ədəbiyyatı müəllimi Məmmədova Könül Surxay qızı peşə fəaliyyətlərində fərqləndiklərinə və rayonun ictimai-siyasi həyatında fəallıq göstərdiklərinə görə Səbail rayon İcra Hakimiyyətinin Fəxri Fərmanı ilə təltif edilmişlər.

Əziz müəllimlərimiz Rəna xanımı və Könül xanımı kollektiv adından təbrik edir, şərəfli və məsuliyyətli peşələrində, elmi-pedaqoji fəaliyyətlərində uğurlar arzulayırıq.

Azərbaycan Respublikasının təhsil işçilərinə “Əməkdar müəllim” Fəxri adının verilməsi haqqında Azərbaycan Respublikası Prezidentinin Sərəncamına əsasən 132-134 nömrəli Təhsil Kompleksinin İngilis dili müəllimi Əskərova Ədalət Sultan qızı “Əməkdar müəllim” Fəxri adına layiq görülmüşdür.

132-134 nömrəli Təhsil Kompleksinin kollektivi ingilis dilini şagirdlərinə böyük sevgi ilə öyrədən təcrübəli müəlliməmiz, eyni zamanda məktəbin UNESCO koordinatoru Ədalət xanımı “Əməkdar müəllim” adı alması münasibəti ilə ürəkdən təbrik edir, ona uzun ömür, möhkəm cansağlığı və elmi-pedaqoji fəaliyyətində uğurlar arzu edir.