Archives

132-134 nömrəli Təhsil Kompleksinin nəzdində fəaliyyət göstərən Fransız modeli Ana Məktəb – Ècole Maternelle (Azərbaycan və Rus bölmələri üzrə məktəbəqədər hazırlıq) şagirdlərinin Novruz bayramına və baharın gəlişinə həsr olunan bayram şənliyi keçirildi.

Bayram tədbirində balaca fidanlarımız Azərbaycanda çox qədim kökləri olan Novruz bayramı adət-ənənələri və bayramın qeyd olunması ilə bağlı rəqslər, mahnılar ifa etdilər, şerlər səsləndirdilər və məşhur filmlərdən, teatr tamaşalarından səhnəciklər nümayiş etdirdilər.

İbtidai siniflərimizdə Novruz bayramı abu-havası

Azərbaycan bölməsi “7 b” sinifində Kompleksin İngilis dili müəllimi Mehriban Əzimovanın rəhbərliyi ilə ingilis dilində Novruz bayramına həsr olunan dərs təşkil olundu. Məktəblilər Azərbaycan xalqının Novruz bayramı adət-ənənələrinə, bahar bayramının tarixinə həsr olunan ingilis dilində çıxışlar etdilər, şerlər səsləndirdilər, müsiqi nömrələri və rəqslər ifa etdilər.

Bu gün Təhsil Kompleksinin psixoloqu Quliyeva Aytən ingilis bölməsi IB PYP siniflərində “Mənim gələcək peşəm” mövzusunda ingilis dilində oyun-əsaslı seminar təşkil etdi.

Seminarda psixoloq “Uşağın məktəb və sinifdənkənar maraqları”, “Uşaqlara peşə fəaliyyətinin məzmununu başa düşməyi öyrətmək”, “Şagirdlərlərin yaş dövrünə uyğun ünsiyyət psixologiyası” kimi mövzular ətrafında diaqnostik oyunlar təşkil etdi.

Şagirdlərin böyük marağına səbəb olan seminarın təşkilində məqsəd şagirdləri aktivləşdirmək, onlarda özü, bacarıqları və inkişaf perspektivləri haqqında psixoloq köməyi ilə əldə etdiyi bilikləri nəzərə alaraq müstəqil bir peşə seçimi arzusunu formalaşdırmaqdır.

Martın 16-da 132-134 nömrəli Təhsil Kompleksinin “Musiqi” kafedrasının təşkilatçılığı ilə Ulu Öndər Heydər Əliyevin 100 illiyinə həsr olunmuş “Ən çox sevdiyim bəstəkar – Tofiq Quliyev” konseptində “Ən çox sevdiyim mahnı” adlı musiqi tədbiri keçirildi. Tədbirdə Təhsil Kompleksinin şagirdləri Azərbaycan bəstəkarlıq məktəbinin ən parlaq şəxsiyyətlərindən olan Tofiq Quliyevin bəstələdiyi mahnıları ifa etdilər.

Tədbirdə Kompleksin şagirdləri Əzimov Əli, Quliyev Tofiq, Mürşüdzadə Ayan və Şükürova Leylanın ifasında “Bəxtiyar” filimindən“Əziz dost”, “Qaynana” filmindən “Məhəbbət çırağı”, “Ögey Ana” filmindən “Kəndimiz” və “Möcüzələr adası” filmindən “Coş dənizim” mahnıları, eləcə də Azərbaycanın Xalq mahnıları səsləndirildi.

Diqqətin inkişaf səviyyəsi uşağın məktəb təlimində müvəffəqiyyət qazanmasında çox böyük rol oynayır. Uşağın təhsildə uğur qazanması üçün ilk növbədə onun diqqətini və müşahidəçilik qabiliyyətini tərbiyə etmək lazımdır. Məktəbli uşaqların hafizəsinin inkişafının ən mühüm yollarından biri yardımçı, xüsusilə simvolik vasitələrin köməyi ilə yadda saxlamadır. Bu səbəblə 132-134 nömrəli Təhsil Kompleksində Kompleksin psixoloqları tərəfindən “Uşaqların estetik və yaradıcı inkişafı” mövzusunda xüsusən ibtidai siniflərdə fərdi və qrup halında məsləhətlər keçirilir.

Kompleksin psixoloqu Quliyeva Aytən şagirdlərlə mütəmadi olaraq bu mövzu ətrafında görüşlər, məsləhətlər təşkil edir. Bu zaman psixoloq uşaqlarla yaddaş, diqqət, təfəkkür, öz hisslərini dərk və idarə etmək, digər insanların hisslərini tanımaq və anlamaq qabiliyyəti, təsvir prosesində rəng çalarlarından istifadə, motorika, məsələnin həllini axtararkən özünəinam və müstəqillik nümayiş etdirmək, ünsiyyət vərdişləri, öz yanaşmalarını izah etmək və müdafiə etmək qabiliyyəti mövzularında söhbətlər aparır və konkret tapşırıqlar əsasında uşaqlara bu mövzuları izah edir.

13 mart 2023-cü il tarixində uzun müddət 132 nömrəli məktəbin direktoru olmuş, gözəl təhsil işçisi, təhsilin inkişafı üçün xüsusi xidmətlər göstərən Azərbaycan Respublikasının Əməkdar müəllimi Aliyə Təhmasibin doğum günü münasibətilə 132-134 nömrəli Təhsil Kompleksində “Yaddaşlarda yaşayan təhsil fədaisi” adlı xatirə tədbiri keçirildi. Tədbirdə Aliyə Təhmasibin ailə üzvləri, 132-134 nömrəli Təhsil Kompleksinin qəhrəman Şəhid məzunlarının ailə üzvləri, Aliyə xanımla birlikdə çalışmış təhsil ictimaiyyəti nümayəndələri, 132 nömrəli məktəbin müxtəlif dövr məzunları, Aliyə xanımın yetirmələri və Təhsil Kompleksinin müəllim kollektivi iştirak etdilər.

Xatirə gecəsində iştirak edən 132 nömrəli məktəbin məşhur məzunları Xalq artisti, tarzən, professor Zamiq Əliyev, tanınmış jurnalist Etibar Babayev, uzun müddət bu məktəbdə Aliyə xanımla birlikdə çalışmış müəllimlər, Birinci Qarabağ müharibəsinin qazisi, 1988-ci il 132 nömrəli məktəbin məzunu Babək Qocayev, 1970-ci illər, 1980-ci illər, 1990-cı illər və 2000-ci illərdə məktəbin məzunları, Təhsil Kompleksinin direktoru Əməkdar müəllim Sara Xanlarova və Aliyə xanımın ailə üzvləri adından bacısı oğlu Elçin Quliyev-Qafqazlı çıxışlar etdilər və Aliyə xanımla bağlı xatirələrini bölüşdülər. Çıxışlarda qeyd olundu ki, minlərlə şagirdi və yetirməsi olan, yüksək insani keyfiyyətlərə malik, ziyalılığı, alicənablığı, ətrafındakı insanlara xoş münasibəti, mərhəməti, savadı ilə hər zaman seçilən, gözəl ana, təkrarsız pedaqoq Aliyə Təhmasib həyatı boyu təhsilin inkişafı üçün çalışmış, respublikanın ictimai-siyasi həyatında yaxından iştirak etmiş, Azərbaycan Respublikası Prezidentinin fəxri təqaüdünə layiq görülmüş, yüksək dövlət mükafatları ilə yanaşı, bir sıra diplom və fəxri fərmanlarla təltif olunmuş, Azərbaycan və SSRİ Ali Sovetinin deputatı kimi respublikanın ictimai həyatında mühüm rol oynamış və uzun müddət Səbail rayonu Yeni Azərbaycan Partiyası Qadınlar Şurasının fəal üzvü olmuşdur. Aliyə xanımın təhsil sahəsindəki xidmətləri və əsl Azərbaycan xanımına xas nümunəvi həyat və elm yolu hər zaman gənc, gələcək nəsillər üçün örnək olacaqdır. Allah rəhmət eləsin!

Martın 6-da Təhsil Kompleksinin Azərbaycan dili və ədəbiyyatı müəllimi Nəsrəddin Şəfiyevin rəhbərliyi və məktəblilərin iştirakı ilə “Heydər Əliyev irsi və azərbaycançılıq məfkurəsi” mövzusunda açıq dərs təşkil olunub.

Dərslərin əsas məqsədi Ümummilli Liderin dövlətçilik irsinin və azərbaycançılıq məfkurəsinin öyrənilməsi və təbliği, şagirdlərin bu sahədə biliklərinin zənginləşdirilməsindən ibarətdir.

Dərsdə məktəblilər görkəmli dövlət xadimi, müasir müstəqil Azərbaycanın qurucusu Ulu Öndərin dövlətçilik ənənələrimizin dirçəldilməsi, müasir inkişafımızın təməlinin qoyulmasında misilsiz xidmətləri barədə çıxışlar ediblər. Xüsusilə vurğulanıb ki, Ulu Öndərin şah əsəri olan güclü Azərbaycan dövləti öz suverenliyini, müstəqilliyini qorumağa qadir olduğunu 44 günlük Vətən müharibəsində şanlı Zəfər qazanmaqla sübuta yetirib.

Məktəblilər həmçinin Ulu Öndərə həsr edilmiş şeirlər səsləndiriblər.

Martın 6-da Təhsil Kompleksinin “Azərbaycan dili və ədəbiyyat” fənn kafedrası müəllimlərinin iştirakı ilə “Heydər Əliyev ili”nə həsr olunmuş “Ümummilli Lider Heydər Əliyevin Azərbaycan dilinə olan böyük sevgisi” mövzusunda “dəyirmi masa” keçirilib.

Fənn müəllimləri Ulu Öndər Heydər Əliyevin Azərbaycan dilinin, milli-mənəvi mirasımızın qorunması və inkişafı istiqamətində misilsiz xidmətləri, Ümummilli Liderin Azərbaycan elminin, mədəniyyətinin, incəsənətinin və ədəbiyyatının inkişafında əvəzolunmaz rolu, ədəbiyyat və söz sənəti adamlarına göstərdiyi yüksək diqqət və qayğı haqqında hazırladıqları təqdimatlarla “dəyirmi masa” ətrafında çıxışlar ediblər.

Çıxışlarda qeyd olunub ki, Azərbaycan ədəbi və xalq danışıq dilini dərindən bilən, bu dilin zəngin lüğət tərkibinə yaxşı bələd olan və qrammatik imkanlarından fitri istedadı sahəsində səmərəli istifadə etməyi bacaran Heydər Əliyev yüksək səviyyəli yığıncaqlarda, məsələn, BDU-nun 50 illiyinə həsr olunmuş yubiley toplantısında, yenə həmin ali məktəbin partiya konfransında, yüksək dövlət səviyyəsində aparılan başqa müşavirələrdə ana dilində parlaq çıxışlar edərək, özünə böyük hörmət və məhəbbət qazandı. Sovet dövründə Azərbaycana rəhbərlik etdiyi dönəmdə Heydər Əliyev Azərbaycan SSR dövlət ictimai orqanlarında, maarif idarələrində Azərbaycan dilinin işlədilməsini təmin edir və onun hərtərəfli inkişafına dövlət qayğısı göstərir. XX əsrin 70-ci illərinin əvvəllərindən mənəvi mühitin sağlamlaşdırılması istiqamətində başlanan iş müstəqillik illərində də davam etdirilir. Vurğulandı ki, Azərbaycan dövlət müstəqilliyinin rəmzlərindən sayılan Azərbaycan dili Ulu Öndər Heydər Əliyevin əvəzsiz xidmətləri sayəsində xalqın milli mənəvi sərvətinə çevrilərək kamillik zirvəsinə çatdı. Bu şərəfli missiya Azərbaycan Respublikasının Prezidenti İlham Əliyev tərəfindən eyni qayğı və həssaslıqla davam etdirilir. Ana dilimizə göstərilən xüsusi qayğı baxımından “Azərbaycan əlifbası və Azərbaycan dili gününün təsis edilməsi haqqında” Azərbaycan Respublikasının Prezidenti İlham Əliyevin 12 yanvar 2004-cü il fərmanı xüsusi əhəmiyyətə malikdir.

Beləliklə, bütün sahələrdə olduğu kimi Azərbaycan dilinin inkişafı və onun dövlət səviyyəsində işlədilməsi məhz Ümummilli Lider Heydər Əliyevin adı ilə bağlıdır. Ulu Öndər Heydər Əliyevin əbədiyaşar ideyaları və müstəqil Azərbaycan dövlətçiliyi üçün misilsiz xidmətləri gənc nəsilə müəllimlərimiz tərəfindən həvəslə öyrədirilir və yeniyetmələr milli-mənəvi dəyərlərimiz ruhunda vətənpərvər şəxsiyyətlər kimi formalaşır.

Martın 3-də 132-134 nömrəli Təhsil Kompleksində 27 fevral-3 mart tarixlərində keçirilən “İdman Həftəsi”nin bağlanış tədbiri və həftə çərçivəsində keçirilən yarışların qaliblərinin mükafatlandırılma mərasimi keçirildi.

Mükafatlandırma mərasimində İdman Həftəsi çərçivəsində Kompleksdə keçirilən bütün yarışların – 7-ci sinif şagirdləri arasında “Ən sürətli şagird” qaçış yarışı, 5 və 6-cı sinif şagirdləri arasında “Şən startlar” estafet yarışlarının, 8-ci siniflər və yığma 7-ci sinif şagirdləri arasında Basketbol yarışı, futbol, voleybol, şahmat, qol güləşi yarışması və digər müsabiqələr üzrə müxtəlif nominasiyaların qalibləri mükafatlandırıldı.

Tədbirdə Kompleksin I-IV sinif şagirdləri gimnastika nümunələri və milli rəqslərlə çıxış etdilər.

Bütün şagirdlərimizi İdman Həftəsindəki uğurlu çıxışları münasibətilə təbrik edir və şagirdlərimizə gələcəkdə yeni-yeni təhsil və idman uğurları arzu edirik.