Author: admin

Oktyabrın 21-də 132-134 nömrəli Təhsil Kompleksinin bir qrup yuxarı sinif şagirdləri Hərbi Qənimətlər Parkını ziyarət etdilər.

Təhsil Kompleksinin direktor müavini Könül Səfərova və Uşaq Birliyi rəhbəri Tamilla Abdullayevanın təşkilatçılığı, Hərbi rəhbər, Əməkdar məşqçi Ayaz İbişovun rəhbərliyi ilə məktəblilər üçün təşkil olunan ekskursiyanın məqsədi ölkənin intellektual gələcəyi olan şagirdlərə Vətən müharibəsi ərzində Azərbaycanın müzəffər ordusunun keçdiyi ağır döyüş yolu, hərbi əməliyyatların gedişatı və Zəfər qalibiyyətimizin nəticələri barədə məlumat vermək idi.

Məktəblilər “Hərbi Qənimətlər Parkı”nda Azərbaycanın ərazi bütövlüyünün bərpası uğrunda 44 gün davam edən Vətən müharibəsi zamanı şanlı Azərbaycan Ordusunun işğalçı Ermənistanı döyüş meydanında məğlub etməsi nəticəsində düşməndən ələ keçirdiyi hərbi qənimətlərlə tanış oldular. Ermənistan ordusu tərəfindən qurulmuş müdafiə sədləri isə şagirdlərdə müharibə haqqında aydın təsəvvür yaratdı.

Ordumuzun güc və əzmini bir daha göstərən Hərbi Qənimətlər Parkına ekskursiya şagirdlərdə Vətən müharibəsində qazanılan tarixi Qələbə haqqında dolğun məlumat yaratmaqla yanaşı, onlara qürurverici hisslər yaşatdı.

SAF 2022 “İNNOVATİV LAYİHƏLƏR SƏRGİSİ”

İstiqamət: Qlobal ekoloji problemlərin həll edilməsi

Komanda adı: ZeMission™

Layihənin adı: ZeroGreen

 

1. Problemin aktuallığı:

Bizi bu layihəni reallaşdırmağa vadar edən ilkin səbəblərdən biri ozon qatının avtomobillərdən çıxan zəhərli qazların təsiri ilə həddən çox zərər görməsidir. Bu problemin həlli üçün hələ ki, heç bir praktik həll üsulu təklif olunmayıb. Avtomobilsiz insanları təsəvvür etmək qeyri-mümkündür və demək olar ki, yer üzündə olan əhalinin yarısından çoxu avomobildən (avtomobillərdən) istifadə edir. Kimyəvi maddələrlə işləyən maşınlar ekologiyamıza olduqca böyük ziyan vurur. Günümüzdə bu problemin köklü həlli hələ ki yoxdur. Lakin bizim layihənin təkmilləşdirilməsi ilə bu problemin həlli istiqamətində əməli addımlar atıla bilər.

 

2. Problemin həlli və layihə ideyası:

Avtomobillər tərəfindən illər boyu ekologiya istismar edilib və günümüzdə də bu proses davam edir. Biz düşünürük ki, bu problemin digər həll yolu elektrik ilə işləyən maşınlara keçiddir. Lakin bütün dünyadakı maşınları dəyişmək illərimizi ala bilər, bu səbəbdən günümüzün ən prioritet və kreativ ideyası bizim idea hesab edilə bilər. Çünki biz avtomobilin egzozundan çıxan zərərli qazın tərkibində olan benzapireni məhv edərək ekologiyanı təmiz saxlamağa çalışırıq.

Biz qeyd olunan problemin həlli üçün bu innovativ layihəni irəli sürdük. İnanırıq ki, layihəmiz cəmiyyət üçün çox faydalı olacaqdır. İdeyamız bundan sonrakı illərdə də bizi əhatə edə biləcək və bəşəriyyət üçün ciddi təhlükə yaradan ekoloji fəlakət problemini aradan qaldıracaq.

 

3. Benzapiren haqqında:

Benz(a)piren ən tipik kimyəvi ekoloji kanserogendir, bioakkumulyasiya xüsusiyyətinə malik olduğundan aşağı konsentrasiyalarda belə insanlar üçün təhlükəlidir. Kimyəvi cəhətdən nisbətən sabit olan benzo(a)piren uzun müddət bir obyektdən digərinə miqrasiya edə bilir. Nəticədə, benzo(a)piren sintez etmək qabiliyyətinə malik olmayan bir çox ətraf mühit obyektləri və proseslər onun ikinci dərəcəli mənbələrinə çevrilir. Benz(a)piren də mutagen təsirə malikdir.

 

4. Layihənin unikallığı və funksionallığı, problemin həlli metodu:

Biz yeni bir üsul irəli sürmüşük və düşünürük ki, bu üsul başqa biriləri tərəfindən hələ ki, önə çıxarılmayıb. Bu üsul tam yenilikçi layihə hesab oluna bilər. Biz bu təcrübəyə başlayarkən ilk öncə kimya otağına üz tutduq. Çünki biz əldə etdiyimiz məlumatları öz təcrübəmizə əsasən doğrultmaq istəyirdik. Müəyyən labarotoriya təcrübələrindən sonra biz artıq konstruksiyamızı düzəltməyə hazır idik. Bizim hazırladığımız prototip standart ölçüdə qurulmuşdur və hələ ki, minik avtomobillər üçün nəzərdə tutulmuşdur. Aşağıda gördüyünüz 1-ci şəkil qurğumuzun çıxış borusudur. Ortada gördüyünüz hissə depo üçün nəzərdə tutulmuşdur və giriş borusundan gələn qazlar bu depoda yağla reaksiyaya girərək çıxış borusundan ixrac olunur. 2-ci şəkildə isə siz filterəvəzləyicini görürsünüz. Borunun üzərində müəyyən dəliklər açılaraq qazın qurğumuza daha rahat daxil olmasına şərait yaradılıb. Bu qurğu orta qazan ilə katalizator arasında yerləşdirilə bilər, lakin başqa alternativlərdən də istifadə etmək mümkündür. Qurğu maşına qoşulduqdan sonra eqzozdan çıxan qazın zərəri minimum 3, maksimum 5 qat azalacaq (bunun konkret dəyəri yoxdur, maşından maşına dəyişir)

 

5. İnnovativ Aspekt:

Layihəmizin ən böyük müsbət cəhəti ekologiyanı qorumasıdır. Əgər ki, bu layihə təkmilləşdirilərsə gələcək də daha da təmiz ekologiyamız ola bilər. Layihəmizə oxşar başqa bir qurğu katalizator hesab edilə bilər. Lakin katalizator daha çox karbon oksidə təsir göstərir. ZeroGreen qurğusu isə ekologiyanın daha çox istismarına səbəb olan benzapirenə təsir edir. Bugünə kimi isə heç bir komanda bu cür və ya buna oxşar layihə irəli sürməyib. Bu layihə oxşarı olmayan ilk uğurlu tədqiqat hesab edilə bilər. Məhsulda heç bir proqram hissəsi yoxdur, əlavə edilmiş bəzi detallar isə metallardan ibarətdir və istiyə olduqca davamlıdır.

____

XXI əsr təhsilalanları təhsildə tətbiq olunan yeni yanaşmalar nəticəsində müasir cəmiyyətin müxtəlif sahələrinin inkişafı üçün zəruri olan müxtəlif elm sahələri istiqamətində bilik və bacarıqlar əldə edirlər. Məhz bunun nəticəsində real həyati problemlərin həlli istiqamətində bilik və bacarıqlarını tətbiq edərək cəmiyyətə öz töhfələrini verə biləcək gənc nəsil formalaşmağa başlamışdır.
SAF 2022-də “İnnovativ layihələr sərgisi”nin təşkilində əsas məqsəd müxtəlif yaş qrupundan olan istedadlı təhsilalanların üzə çıxarılması, qeyd olunan fəaliyyət üzrə müəyyən dəstəyin göstərilməsi, həmçinin potensialın daha da inkişaf etdirilməsi üçün şəraitin yaradılmasıdır.

Komandamıza seçim mərhələsində uğurlar arzu edirik!

VİDEO

2020-ci il sentyabrın 27-də başlanan və 44 gün davam edən Vətən müharibəsində Azərbaycan Ordusu təcavüzkar Ermənistanın işğal siyasətinə son qoydu və ölkəmizin ərazi bütövlüyü bərpa olundu. Ölkə başçısı, müzəffər Ali Baş Komandan İlham Əliyevin rəhbərliyi ilə Azərbaycan xalqının bu Şanlı və tarixi qələbəsinə həsr olunan “Zəfər tarixi” dərslərində hər günü yeni Zəfər olan 44 günlük Vətən müharibəsinin tarixinə nəzər salınır, Qarabağın tarixi, coğrafiyası ilə bağlı müxtəlif mövzularda araşdırmalar aparılır, rəşadətli Azərbaycan Ordusunun şanlı döyüş və qələbə yolu təhlil olunur. Məktəblilər bu mövzularda maraqlı təqdimatlarla çıxış edirlər.

Bu həftə Rus bölməsi 9-cu siniflərin “Zəfər tarixi” dərsləri 2020-ci il oktyabr ayı ərzində işğaldan azad edilən yaşayış məntəqələri, Azərbaycan Ordusunun şanlı Füzuli və Zəngilan qələbələrinə həsr olundu. Məktəblilər Füzuli və Zəngilanın tarixi, xalqımızın bu ata-baba yurdlarındakı tarixi, dini, mədəni irsi, rayon mərkəzi və ətraf kəndlərin işğaldan azad olunması uğrunda gedən döyüşlər, bu ərazilərdə dağıdılmış dini abidələr, işğaldan azad olunan ərazilərdə həyata keçirilən misilsiz bərpa və yenidən-qurma işləri, əhalinin ilk qrupunun Zəngilanın Ağalı kəndinə köçürülməsi və Qarabağa Böyük Qayıdışın başlanması haqqında hazırladıqları essələri təqdim etdilər.

Foto: Rus bölməsi 9-cu sinif “Zəfər tarixi” dərsləri, Kompleksin Tarix müəllimləri: Qabaqcıl təhsil işçisi Şıxəmirova Yelena Lvovna və Qonaqova Firəngiz

IB (Beynəlxalq Bakalavriat Proqramı) 5-ci sinif şagirdləri Qala Arxeoloji-Etnoqrafik Muzey Kompleksində ekskursiyada oldular və burada 4 müxtəlif master-klasslarda iştirak etdilər.

Ekskursiya məktəblilərin Azərbaycan tarixi ilə bağlı biliklərinin zənginləşdirilməsi, onlara milli-mənəvi dəyərlərin aşılanması və dünyagörüşlərinin inkişaf etdirilməsi məqsədilə təşkil edildi.

Oktyabrın 19-da 132-134 nömrəli Təhsil Kompleksində Azərbaycan Dövlət Pedaqoji Universitetinin (ADPU) MBA “Təhsilin təşkili və idarə edilməsi” ixtisaslaşmasının magistrantları üçün “132-134 nömrəli Təhsil Kompleksinin strateji və optimal idarəetmə təcrübəsinin öyrənilməsi” mövzusunda master-klass (dərs-görüş) keçirildi.

“Təhsildə strateji idarəetmə” fənni çərçivəsində auditoriyadan kənar dərs formatında təşkil olunan görüşdə ADPU-nun elm və innovasiyalar üzrə prorektoru professor Asəf Zamanov, ADPU-nun Tədris departamentinin direktor müavini, Təhsil menecmenti kafedrasının dosenti Ənvər İmanov, Təhsil Kompleksinin direktoru, Əməkdar müəllim Sara Xanlarova, direktor müavinləri və magistrantlar iştirak etdilər.

İlk öncə magistrantlar 132-134 nömrəli Təhsil Kompleksinin Tarix Muzeyi ilə tanış oldular və zəngin ənənələrə malik olan bu məktəbin tarixi, unudulmaz məzunları, Təhsil Kompleksinin tarixi inkişaf yolu haqqında geniş məlumatlar əldə etdilər.

Təhsil Kompleksinin Akt Zalında davam edən master-klassda direktor Sara Xanlarova 132-134 nömrəli Təhsil Kompleksinin fəaliyyəti, maddi-texniki bazası, məktəbin strateji və optimal idarəetmə təcrübəsi, icra olunan beynəlxalq layihələr, burada əldə olunan yüksək nailiyyətlər və məktəbin şagirdlərinin, məzunlarının uğurlu nəticələri haqqında magistrantlara ətraflı məlumat verdi.

Magistrantlar məktəbin rəhbər işçilərinə mövzu ilə bağlı çoxsaylı suallar ünvanladılar. Qarşılıqlı fikir mübadiləsi aparılan dərs-görüşdə magistrantları maraqlandıran suallar ətraflı cavablandırıldı. Görüşdə gələcəkdə müsbət təcrübənin öyrənilməsi məqsədilə Azərbaycan Dövlət Pedaqoji Universiteti və 132-134 nömrəli Təhsil Kompleksi arasında yeni əməkdaşlıq imkanları müzakirə olundu.

Oktyabrın 18-də 132-134 nömrəli Təhsil Kompleksində 44 günlük Vətən müharibəsinin Şəhidləri, Təhsil Kompleksinin qəhrəman məzunları Nicat Tarıverdiyev, Fərid Əliyev və Yusif Budaqovun xatirə lövhələrinin açılış mərasimi keçirildi.

Açılış mərasimində Səbail rayon İcra Hakimiyyətinin başçısı Vüqar Zeynalov, Milli Məclisin deputatı Nigar Arpadarai, YAP Səbail rayon təşkilatının sədri Muxtar Nağıyev, Səbail rayon Şəhidlərinin valideynləri, ailə üzvləri, Vətən müharibəsi qaziləri, 132-134 nömrəli Təhsil Kompleksinin müəllim-şagird kollektivi, rayon ictimaiyyəti nümayəndələri iştirak etdilər.

İlk öncə, Azərbaycanın müstəqilliyi və ərazi bütövlüyü uğrunda qəhrəmancasına döyüşərək həlak olan Şəhidlərimizin əziz xatirəsi bir dəqiqəlik sükutla yad edildi. Daha sonra Təhsil Kompleksinin qəhrəman məzun Şəhidləri Nicat Tarıverdiyev, Fərid Əliyev və Yusif Budaqovun xatirə lövhələri önünə güllər düzüldü, xatirələrinə ehtiram ifadə olundu.

Çıxış edən Səbail rayon İcra Hakimiyyətinin başçısı Vüqar Zeynalov 44 günlük Vətən müharibəsində Azərbaycan xalqının möhtəşəm Zəfəri və qəhrəmanlıq salnaməsi, dövlət başçısı, müzəffər Ali Baş Komandan İlham Əliyevin rəhbərliyi altında rəşadətli Azərbaycan Ordusunun Zəfər yolu və xalqımızın müharibə dövründəki milli birliyi, işğaldan azad olunan ərazilərdə həyata keçirilən misilsiz bərpa, yenidənqurma işləri, 18 oktyabr – dövlət müstəqilliyinin bərpasından sonra ölkəmizdə baş verən hadisələr və müasir müstəqil Azərbaycanın inkişaf yolu haqqında danışdı. İcra başçısı qeyd etdi ki, biz qəhrəman Azərbaycan Ordusu, şanlı Zəfər tarixi yazan Şəhidlərimiz, qazilərimiz ilə fəxr edirik. Fərəhləndirici haldır ki, canlarını Vətən uğrunda fəda edən əziz Şəhidlərimizin adları, qəhrəmanlığı əbədiləşdirilir, onların xatirə lövhələri, büstləri ucaldılır, kitablar yazılır, filmlər çəkilir. Vurğulandı ki, gələcək nəsillər qəhrəman Şəhidlərimizi tanıyacaq, onların qəhrəmanlığından örnək götürəcək və Vətənin keşiyində əzmlə dayanacaqlar.

Milli Məclisin deputatı Nigar Arpadarai bugünkü tədbirin Azərbaycan xalqı üçün əlamətdar tarixi gündə – 18 oktyabrda keçirildiyini qeyd edərək bildirdi ki, Azərbaycan keşməkeşli müstəqillik yolu keçib, çox sınaqlardan üzüağ çıxıb və qəhrəman oğulları sayəsində bu gün, müasir, qüdrətli dövlətə çevrilib. Biz bu gün qürurlu, qalib xalqıq, çünki Azərbaycanın ərazi bütövlüyü bərpa olunub, işğaldan azad olunan ərazilərimizdə üçrəngli bayrağımız ucaldılıb. Deputat qeyd etdi ki, ölkəmizdəki xalq-iqtidar birliyi sayəsində biz əzəli düşmənimizi ağır məğlubiyyətə uğratdıq və Azərbaycanın müasir gəncləri möhtəşəm qələbə günləri yaşadılar. N. Arpadarai gənclərin qarşısında duran vəzifələrdən danışaraq vurğuladı ki, gənc nəsillər onlara əmanət olunan müasir, müstəqil Azərbaycan dövlətini göz bəbəyi kimi qorumalı və bayrağımızı daim ucalarda qürurla dalğalandırmalıdırlar.

YAP Səbail rayon təşkilatının sədri Muxtar Nağıyev çıxışında bildirdi ki, Azərbaycanın ərazi bütövlüyü uğrunda canlarını fəda edən Şəhidlərimizin xatirəsini daima əziz tutmaq hər birimizin vətəndaşlıq borcudur. Şəhidlərimiz, qazilərimiz, qəhrəman Azərbaycan əsgəri döyüş meydanında böyük qəhrəmanlıq nümayiş etdirdilər, müqəddəs amal üçün həyatlarını qurban verdilər, eyni zamanda xalqımızın milli birliyinə nail oldular. Vurğulandı ki, Ulu Öndər Heydər Əliyev tərəfindən əsası qoyulan siyasət ölkəmizdə uğurla davam etdirilir və Azərbaycanın qlobal miqyasda nailiyyətləri hər bir vətəndaşımızı qürurlandırır.

132-134 nömrəli Təhsil Kompleksinin direktoru, Əməkdar müəllim Sara Xanlarova çıxışında qeyd etdi ki, Təhsil Kompleksinin qəhrəman məzunlarının xatirə lövhələrinin açılış mərasimi məktəbin tarixində son dərəcə əlamətdar və unudulmaz hadisədir. Direktor vurğuladı ki, 132-134 nömrəli Təhsil Kompleksi hər zaman öz məzunları ilə fəxr edib. Bu məktəb vətənpərvər, savadlı məzunlar, qəhrəman Şəhidlər yetişdirən məktəbdir. Birinci Qarabağ müharibəsi Şəhidi, Milli Qəhrəman Riad Əhmədov, 20 Yanvar Şəhidi Larissa Məmmədova, 44 günlük Vətən müharibəsinin qələbə Şəhidləri Nicat Tarıverdiyev, Fərid Əliyev və Yusif Budaqov 132-134 nömrəli Təhsil Kompleksinin hər zaman böyük fəxr və qürurla anılan qəhrəman məzunlarıdır. Müqəddəs Vətən torpaqlarının azadlığı, xalqımızın müstəqilliyi uğrunda canlarını fəda edən bu qəhrəmanların hər birinin şərəfli həyat yolu bu məktəbdə böyüyən, yetişən gənc və gələcək nəsillər üçün böyük örnəkdir. Müasir, müstəqil, qüdrətli Azərbaycanın Ulu Öndər Heydər Əliyevin və görkəmli dövlət xadimi, ölkə başçısı, qalib ordunun qalib sərkərdəsi, müzəffər Ali Baş Komandan İlham Əliyevin siyasi yolu ilə uğurla irəlilədiyini vurğulayan S.Xanlarova əminliyini ifadə etdi ki, qalib Azərbaycan xalqı bundan sonra da Ümummilli Lider Heydər Əliyev siyasətinin uğurlu və layiqli davamçısı Prezident İlham Əliyevin ətrafında sıx birləşərək inamla gələcəyə addımlayacaq və ildən-ilə yeni qələbələrə imza atacaqdır. Qəhrəman Şəhidlərimizin əziz xatirəsi xalqımız tərəfindən daim böyük ehtiramla yad olunacaq və yaşadılacaqdır.

Çıxış edən Şəhid məzunlarımızın valideynləri övladlarının xatirəsinin və qəhrəmanlıqlarının əbədiləşdirilməsi istiqamətində görülən işlər üçün rayon rəhbərliyinə, 132-134 nömrəli Təhsil Kompleksinin müəllim və şagird kollektivinə təşəkkür etdilər. Valideynlər bildirdilər ki, biz bu gün çox qürurluyuq, çünki, övladlarımız yalnız bir ailənin, bir məktəbin deyil, böyük bir xalqın qəhrəmanına çevrildilər. 44 günlük müqəddəs Vətən müharibəsində döyüşən, Azərbaycan xalqına Zəfər yaşadan və bu yolda Şəhid olan qəhrəmanların hər biri igidlik dastanı və fəxarət tarixi yazdılar. Əziz Şəhidlərimizin xatirəsinin yaşadılması və gənc nəslin vətənpərvərlik ruhunda böyüdülməsində müəllimlərin rolunu xüsusi vurğulayan Şəhid valideynləri qeyd etdilər ki, Şəhid ailələrinə göstərilən hər bir diqqət bu ailələr üçün çox önəmli və dəyərlidir.

Tədbirdə 132-134 nömrəli Təhsil Kompleksinin şagirdləri vətənpərvərlik mövuzusunda Şəhidlərimizə həsr olunan ədəbi-musiqili kompozisiya ilə çıxş etdilər.

Allah bütün Şəhidlərimizə rəhmət eləsin! Qarabağ Azərbaycandır!

AZTV

Oktyabrın 13-də Azərbaycanın görkəmli tarixçi alimi, tarix elmləri doktoru, Azərbaycan Respublikasının əməkdar elm xadimi, akademik Yaqub Mahmudov 132-134 nömrəli Təhsil Kompleksinin qonağı oldu və Kompleksin yuxarı sinif şagirdləri üçün “Qalib xalq adını özümüzə qaytaran Böyük Tarixi Qələbə!” mövzusunda geniş mühazirə ilə çıxış etdi.

44 günlük Vətən müharibəsinin tarixi əhəmiyyəti, mühüm hərbi-siyasi nəticələri, xalqımızın möhtəşəm qələbəsini şərtləndirən amillər, müasir müstəqil Azərbaycanın siyasi dirçəlişi, Azərbaycanın zəngin dövlətçilik tarixi, görkəmli tarixi şəxsiyyətləri, qəhrəman sərkərdələri, mərkəzləşdirilmiş böyük Azərbaycan dövləti olan Səfəvilər İmperiyası, Türk dövlətlərinin tarixi, əzəli Azərbaycan torpaqları olan Qarabağ və İrəvan xanlıqlarının tarixi, coğrafiyası, mədəni və dini abidələri haqqında məktəblilərə ətraflı məlumat verən akademik bildirdi ki, 44 günlük Vətən müharibəsində möhtərəm Prezidentimiz, müzəffər Ali Baş Komandan İlham Əliyevin rəhbərliyi ilə rəşadətli Ordumuz, Azərbaycan xalqı dünya hərb tarixinin parlaq səhifəsini yazdı.

Akademik Yaqub Mahmudov mühazirəsində qeyd etdi ki, dünyanın böyük imperiyalar yaradan, yadelliləri dəfələrlə ağır məğlubiyyətlərə uğradan Azərbaycan xalqı 2020-ci ildə öz şərəfli tarixi adını – qalib xalq adını özünə qaytardı. Qarabağ zəfəri 1813-cü və 1828-ci il faciələrindən sonra Azərbaycan xalqının müharibə meydanında qazandığı ən böyük tarixi nailiyyətdir. 2020-ci ildə ilk dəfə olaraq xalqımızın sərkərdə oğlu İlham Əliyevin başçılıq etdiyi müzəffər Azərbaycan Ordusu tərəfindən erməni işğalçıları Azərbaycan torpaqlarından rüsvayçılıqla qovulub çıxarıldı. Müharibə nəticəsində sübut olundu ki, havadarları olmadıqda erməni faşizmi Azərbaycan xalqının, Azərbaycan Ordusunun qarşısında heç nədir!

Tarixçi alim diqqətə çatdırdı ki, 44 gün davam edən Vətən müharibəsi Azərbaycan üçün ağır sınaq idi. Bu ağır sınaq günlərində dost-düşmən çox aydın göründü. Dünya tarixinin və siyasətinin dahi bilicisi, Sovet İttifaqı kimi nəhəng dövlətin rəhbərlərindən biri kimi siyasət zirvəsinə ucalmış Ulu Öndər Heydər Əliyevin “Bir millət, iki dövlət” kəlamı Vətən müharibəsi zamanı cəbhədə, döyüş meydanlarında sınaqdan çıxdı. Biz bu müharibədə bir daha tarixi ibrət dərsi aldıq: Azərbaycan və Türkiyə daim birlikdə olmalıdır! Bunun alternativi yoxdur.

Mahmudov vurğuladı ki, biz yağı düşmən üzərində ona görə parlaq zəfər çala bildik ki, 44 günlük müharibədən əvvəl Prezident İlham Əliyevin başçılığı ilə informasiya müharibəsində düşmən üzərində qələbə çalmışdıq. İnformasiya müharibəsi bundan sonra da davam edəcək və kəskinləşəcək. Biz həmişə düşməni məğlub etməyə hazır və qadir olmalıyıq!

Vətən müharibəsində qələbəmizin ən mühüm tarixi əhəmiyyəti və nəticələrindən biri budur ki, Prezident İlham Əliyevin xüsusi səyləri nəticəsində Cənubi Qafqazın beynəlxalq münasibətlər tarixində dönüş baş verdi və yeni dövr başlandı. Tarixin gedişi dəyişdi. Tarix boyunca bütün Vətən müharibələrində xalq qalib gəlib. Bizim 44 günlük Vətən müharibəmizdə də xalqımız qalib gəldi, dəmir yumruq kimi birləşərək qalib gəldi. Xalq bu müharibədə öz Prezidentinə – Ordusunun sərkərdəsinə inandı, onun və Vətən torpaqları naminə çarpışan ordunun arxasında durdu. Azərbaycan xalqı müharibədən qalib xalq kimi çıxdı. Bu, Azərbaycanımızın gələcək tarixinə olduqca müsbət təsir göstərəcəkdir.

Akademik Yaqub Mahmudov zəngin tarixi ənənələri olan 132-134 nömrəli Təhsil Kompleksinin şagirdlərinə hər zaman xalqımızla, Vətənimizlə, Azərbaycanın dövlətçilik tarixi və dahi şəxsiyyətləri ilə qürur duymağı, tariximizi dərindən öyrənməyi, xarici dilləri yüksək səviyyədə öyrənərək Azərbaycan həqiqətələrini hər yerdə təbliğ etməyi, cəsarətli, sədaqətli və mərd olaraq Vətənimizə sahib çıxmağı tövsiyə etdi. Alim əminliyini ifadə etdi ki, qalib dövlətin gəncləri arasından gələcəkdə böyük alimlər, Nizamilər, Tusilər, Lütfi Zadələr, Cavad xanlar, Hüseynqulu xanlar, Ziyadoğulları nəslindən olan qalib sərkərdələr, Sabirlər, Bəxtiyar Vahabzadələr yetişəcək və bu vətənpərvər nəsil hər sahədə hər zaman zəkaları ilə qalib gələcəklər.

Tədbirdə 132-134 nömrəli Təhsil Kompleksinin təlim-tərbiyə işləri üzrə direktor müavini Şəfəq Şirinova, Kompleksin tarix müəllimələri Aygün Əfəndiyeva və Tünzalə Səmədova, məktəblilər çıxış edərək görkəmli tarixçi alim Yaqub Mahmudova bugünkü unudulmaz mühazirə üçün təşəkkür etdilər və gənc nəslin vətənpərvərlik ruhunda böyüməsində, şanlı Azərbaycan tarixinin müstəqillik dövründə düzgün yazılmasında və təbliğində Yaqub müəllimin əvəzsiz xidmətlərini və misilsiz töhfələrini vurğuladılar.

Akademik Yaqub Mahmudov 132-134 nömrəli Təhsil Kompleksinin kitabxanasına “Seçilmiş əsərləri” çoxcildliyini hədiyyə etdi.

AzərTAC
İkiSahil
Olaylar.az
Sherg.az
Modern.az

Oktyabrın 11-də 132-134 nömrəli Təhsil Kompleksinin qəhrəman məzun Şəhidi Budaqov Yusif Ramiq oğlunun doğum günü münasibətilə məzarı ziyarət olundu.

Rayon ictimaiyyətinin nümayəndələri 44 günlük Vətən müharibəsinin Şəhidi Budaqov Yusif Ramiq oğlunun xatirəsini ehtiramla yad etdilər, məzarı üzərinə gül dəstələri düzdülər və ruhuna dualar oxudular.

Vətən müharibəsinin ilk günlərindən döyüşə atılan Yusif Budaqov oktyabrın 27-də Füzuli rayonu istiqamətində gedən döyüşlərdə şəhidlik zirvəsinə ucalmışdır. Döyüşlərdə göstərdiyi qəhrəmanlığa görə Azərbaycan Respublikasının Prezidenti cənab İlham Əliyev tərəfindən ölümündən sonra “Vətən uğrunda”, “Xocavəndin azad olunmasına görə” və “Füzulinin azad olunmasına görə” medalları ilə təltif olunmuşdur.

Qəhrəman məzun Şəhidimiz Yusifin şərəfli həyat və döyüş yolu gənc nəsillərə hər zaman örnək olacaq, Azərbaycan xalqı qəhrəman Şəhidlərimizin əziz və əbədiyaşar xatirəsini daima uca tutacaq və onların Vətən uğrundakı şücaət və fədakarlığını minnətdarlıqla yad edəcəklər. Ruhun şad olsun, Vətən oğlu!

Oktyabrın 10-da 132-134 nömrəli Təhsil Kompleksi və Milli Azərbaycan Tarixi Muzeyinin birgə təşkilatçılığı ilə böyük şərqşünas alim, filologiya elmləri doktoru, elm təşkilatçısı, ictimai xadim, professor Aida xanım İmanquliyevanın anadan olmasının 83-cü ildönümünə həsr edilmiş “Elmin zirvəsinə ucalan alim ömrü” adlı tədbir keçirildi.

Tədbirdə çıxış edən Təhsil Kompleksinin direktoru, Əməkdar müəllim Sara Xanlarova 1957-ci ildə 132 nömrəli orta məktəbi (indiki 132-134 nömrəli Təhsil Kompleksi) qızıl medalla bitirmiş Kompleksin unudulmaz məzunu professor Aida xanım İmanquliyevanı böyük şərqşünas alim, pedaqoq, parlaq şəxsiyyət, zərif və nəcib qadın və mehriban ana kimi xarakterizə edərək görkəmli alimin şərəfli, gənc və gələcək nəsillərə örnək olan ömür yolu haqqında məktəblilərə geniş məlumat verdi. Vurğulandı ki, Azərbaycanda ilk şərqşünas qadın elmlər doktoru olan Aida xanım Azərbaycan qadınına xas olan ən gözəl, ən nəcib xüsusiyyətləri özündə cəmləşdirən xeyirxah insan və Vətənə yüksək intellektual səviyyəli, dərin mənəvi keyfiyyətləri ilə nümunə olan övladlar bəxş edən qayğıkeş ana olub.

Son illərdə ölkəmizdə təhsilin inkişafı ilə bağlı həyata keçirilən tədbirləri və Azərbaycan xalqının Ümummilli Lideri Heydər Əliyevin “Təhsil millətin gələcəyidir” müdrik kəlamını xüsusi qeyd edən S.Xanlarova bildirdi ki, əsası Ulu Öndər Heydər Əliyev tərəfindən qoyulan milli təhsil strategiyası bu gün möhtərəm Prezidentimiz cənab İlham Əliyev tərəfindən uğurla davam etdirilir. Dövlətin təhsillə bağlı strategiyasının həyata keçirilməsində Respublikanın Birinci vitse-prezidenti Mehriban xanım Əliyevanın və rəhbərlik etdiyi Heydər Əliyev Fondunun fəaliyyəti xüsusi ilə diqqət çəkir. Bu gün Azərbaycanda heç vaxt olmayan qədər geniş bazaya malik təhsil infrastrukturu yaradılıb. Bununla da ölkədə təhsilə qayğı, onun maddi-texniki bazasının möhkəmləndirilməsi işi ümummilli səviyyəyə qaldırılıb.

Məktəbin fəaliyyətinin əsas nəticəsinin onun şagirdlərinin və məzunlarının nailiyyətlərini olduğunu diqqətə çatdıran S.Xanlarova bildirdi ki, Azərbaycanın təhsil tarixində özünəməxsus yeri olan 132-134 nömrəli Təhsil Kompleksinin müəllim-şagird kollektivi məktəbin unudulmaz məzunu, Azərbaycanın dünya elminə bəxş etdiyi görkəmli simalardan olan Aida xanım İmanquliyeva ilə fəxr edir. Aida xanım İmanquliyevanın xatirəsi yeni nəsillər tərəfindən də hər zaman dərin ehtiram və böyük məhəbbətlə yad olunur, əsərləri dönə-dönə oxunur, elmi irsi araşdırılır və təbliğ edilir. Direktor əminliyini ifadə etdi ki, 132-134 nömrəli Təhsil Kompleksinin şagirdləri Kompleksin unudulmaz məzunlarından hər zaman layiqli örnək alacaq və Azərbaycanın gələcək gözəl vətəndaşları və böyük alimləri kimi yetişəcəklər.

Çıxış edən Milli Azərbaycan Tarixi Muzeyinin direktoru, akademik Nailə Vəlixanlı məzunu olduğu 132 nömrəli orta məktəb (indiki 132-134 nömrəli Təhsil Kompleksi) haqqında xatirələrini şagirdlərlə bölüşərək, məktəbin unudulmaz məzunu, professor Aida xanım İmanquliyevanın Azərbaycanın elm və təhsil tarixindəki müstəsna rolundan bəhs etdi, onun elmi irsinin, əsərlərinin əhəmiyyətini diqqətə çatdırdı. Vurğulandı ki, Şərq-Qərb mədəni əlaqələrinin inkişafında professor Aida İmanquliyevanın tədqiqatları xüsusilə böyük aktuallıq kəsb edir. N.Vəlixanlı Aida xanım İmanquliyevanın əziz xatirəsinin könüllərdə daim yaşayacağını qeyd edərək, 132-134 nömrəli Təhsil Kompleksinin şagirdlərinə seçdikləri fəaliyyət sahəsindən asılı olmayaraq hər zaman bu tarixi məktəbin adını layiqli şəkildə təmsil etməyi tövsiyə etdi.

Tədbirdə professor Aida İmanquliyevanın tələbələri olmuş 132-134 nömrəli Təhsil Kompleksinin Ərəb dili müəllimi Gülnarə Məmmədova, hazırda təqaüddə olan Kompleksin Ərəb dili müəllimi Dilşad Səfərli, Kompeksin tarix müəllimələri Aygün Əfəndiyeva və Tünzalə Səmədova ölkəmizdə şərqşünaslıq məktəbinin yaranmasında mühüm rolu olan Aida xanımın elmi irsinin əhəmiyyətindən geniş bəhs etdilər. Çıxışlarda qeyd olundu ki, ömrünü Şərq mədəniyyətini və məhcər ədəbiyyatını öyrənməyə sərf edən Aida xanım İmanquliyeva müasir ərəb ədəbiyyatının tədqiqində yeni səhifə açıb, öz fundamental araşdırmaları ilə təkcə Azərbaycan şərqşünaslığını deyil, dünya şərqşünaslığını da zənginləşdirib və inkişaf etdirib. Azərbaycan şərqşünaslığında ilk qadın elmlər doktoru, professor olan Aida İmanquliyeva Şərq-Qərb ədəbi əlaqələrini araşdıran ilk azərbaycanlı olub, Bakı Dövlət Universitetində səmərəli pedaqoji fəaliyyət göstərib, ərəb filologiyası fənnindən oxuduğu maraqlı mühazirələri və xeyirxahlığı, yüksək insani keyfiyyətləri ilə yetirmələrinin, tələbələrinin yaddaşlarında dərin izlər qoyub.

Tədbirdə böyük alimin həyat və fəaliyyətindən bəhs edən videoçarxlar nümayiş olundu. Təhsil Kompleksinin şagirdləri ictimai xadim, professor Aida xanım İmanquliyevanın zəngin elmi irsi və şərəfli, nümunəvi həyat yolu ilə bağlı çıxışlar etdilər.

Bütün çıxışlarda vurğulandı ki, 132-134 nömrəli Təhsil Kompleksinin unudulmaz məzunu Aida xanım İmanquliyevanın əziz xatirəsi, Onun şəxsiyyətini və elmi irsini yüksək dəyərləndirən çoxsaylı insanların qəlbində əbədi olaraq yaşayacaqdır.

Oktyabrın 5-də Ağdamda “Dayanıqlı İnkişaf Məqsədləri” və “Yeni Şəhər Gündəliyi” – postmünaqişə dövründə bərpa və yenidənqurmanın aparıcı qüvvəsi kimi” mövzusunda keçirilən Azərbaycan Milli Şəhərsalma Forumu Azərbaycan həqiqətlərinin bir daha dünyaya çatdırıldığı növbəti beynəlxalq platforma oldu. Azərbaycan Respublikasının Prezidenti İlham Əliyev Forumun açılış mərasimindəki nitqində Ermənistanın işğalçılıq siyasətinin acınacaqlı nəticələrini bir daha faktlar və əsaslı sübutlarla dünya ictimaiyyətinə təqdim etdi. Artıq bütün dünya Azərbaycanın işğaldan azad olunmuş ərazilərində erməni vandalizminin, barbarlığının, xalqımıza qarşı aparılan etnik təmizləmə siyasətinin canlı şahididir.

Ötən 30 illik işğal dövründə Azərbaycanın düşmən tapdağında olan bütün şəhər və kəndləri qəddarcasına dağıdılıb, ermənilər bizim torpaqlarımızda qanunsuz məskunlaşdırma siyasəti həyata keçirib. İşğaldan azad olunan ərazilərə gələn xarici ekspertlər, jurnalistlər viran qoyulmuş Azərbaycan şəhərlərinə, Füziliyə, Cəbrayıla, Qubadlıya, Zəngilana “urbisid qurbanı”, “ruhlar şəhəri”, Ağdama isə də “Qafqazın Xirosiması” adlarını verib. Bu adların hər biri xalqımıza qarşı törədilən insanlıq faciəsi və hərbi cinayətlərin miqyasını əks etdirir.

Ağdam şəhərinin bir zamanlar yerləşdiyi məkanda keçirilən Forumda dünyanın 40-dan çox ölkənin nümayəndəsi, BMT təmsilçisi iştirak etdilər. Xarici qonaqlar Ağdamda gördükləri mənzərəni Qarabağ ərazisində hər bir kənddə görə bilərlər. Bütün binaların dağıdılmadığı yeganə yerlər Şuşa, Laçın və qismən Kəlbəcər olub. Bunun səbəbi odur ki, Ermənistan dövləti müxtəlif ölkələrdən olan erməniləri işğal edilmiş ərazilərdə yerləşdirmək üçün qanunsuz məskunlaşma siyasəti yürüdürdü. Bu, beynəlxalq hüququn və Cenevrə Konvensiyasının kobud şəkildə pozulması hesab olunur. Ermənilər Azərbaycan xalqına qarşı hərbi cinayətlər işləməklə yanaşı, xalqımızın əzəli torpaqlarında tarixi, mədəni, dini irsini silmək üçün kütləvi dağıntılar törədib, xalqımızın maddi və mənəvi tarixi xəzinələri talan olunub, oğurlanıb, məhv olunub. İşğalçı həmçinin daha bir beynəlxalq cinayətə imza ataraq Azərbaycan ərazilərində qanunsuz məskunlaşma siyasəti yürüdüb. Lakin, 44 günlük müharibə təcavüzkar Ermənistana əsaslı cavab oldu, xalqımızın əzəli düşmənin başı əzildi və qisas qiyamətə qalmadı.

Dövlət başçısının bu beynəlxalq Forumdakı tarixi nitqində qeyd etdiyi kimi, əvvəllər bizim milli ideya torpaqlarımıza qayıtmaqdan, ədaləti və ərazi bütövlüyümüzü bərpa etməkdən ibarət idi və bütün Azərbaycan xalqı bu ideya ətrafında birləşmişdi, özünü buna hazırlamışdı. 8 noyabr 2020-ci il tarixində Azərbaycan xalqı Böyük Qələbəni gününü tarixə həkk etdi. İndi azərbaycan xalqı artıq öz ata-baba yurlarına qayıdır. İndi biz keçmiş məcburi köçkünlərin öz yurdlarına tezliklə qayıtması üçün bütün potensialımızı səfərbər edirik. İşğaldan azad olunan ərazilərdə irimiqyaslı infrastruktur layihələr icra olunur. Biz beynəlxalq hüquq normalarından istifadə edərək geri qayıtdıq və biz burada yaşamağa, əbədi yaşamağa geri qayıtdıq. Əminik ki, möhtərəm Prezidentimiz İlham Əliyevin rəhbərliyi ilə həyata keçirilən bu möhtəşəm bərpa və quruculuq işləri nəticəsində Qarabağ yaxın illərdə cənnət məkana çevriləcək.

Manaflı Gülər

132-134 nömrəli Təhsil Kompleksinin İngilis dili müəllimi