Archives

8 noyabr 2020-ci il tarixində Azərbaycan xalqı möhtəşəm, tarixi Zəfərini qeyd etdi. 8 Noyabr – Zəfər Günü kimi Azərbaycan xalqının tarixinə əbədi həkk olundu. Azərbaycan dövləti müharibədə qalib gəldiyi kimi, post-müharibə dövründə də əsl qalib xalq olduğunu, işğaldan azad olunmuş torpaqların əsl sahibi olduğunu sübut etdi. Müharibənin bitdiyi tarixdən etibarən Azərbaycan torpaqlarında möhtəşəm bərpa, yenidən qurma layihələri başladı. 30 illik işğal dövründə düşmən Azərbaycan torpaqlarında tarixən xalqımız tərəfindən yaradılan və nəsildən-nəsilə ötürülərək yaşadılan mədəni, dini irsi məhv etməyə çalışdı. İşğaldan azad olunmuş Azərbaycan torpaqlarındakı viran qoyulmuş yaşayış məntəqələri, dağıdılmış, tarixi, mədəni abidələr, xalqımıza qarşı olan düşmənçiliyin ifadəsi olan barbarlıq, vəhşilik hər bir Azərbaycan vətəndaşını təəssüfləndirdi. 44 günlük Vətən müharibəsində qazanılan zəfər zamanı aydın oldu ki, Ermənistan işğal etdiyi Azərbaycanın şəhər və kəndlərini qəsdən dağıdıb, bütün mədəni və dini abidələri talan edib. Azərbaycanın 9 şəhəri və yüzlərlə kəndi yer üzündən silinib. Ağdam şəhəri o dərəcədə dağıdılıb ki, əcnəbi mütəxəssislər onu “Qafqazın Hiroşiması” adlandırıblar. Füzuli şəhəri işğaldan azad edildikdən sonra Azərbaycan Ordusu orada bayrağımızı dalğalandırmağa bir dənə də olsun tikili tapa bilmədi.

Azərbaycan xalqı tarixən qurub, yaradan xalqdır. İşğaldan azad olunmuş torpaqların sahibləri artıq iki ilə yaxındır ki, bu torpaqlara yenidən həyatı qaytarır. Qısa müddətdə o torpaqlarda nəhəng quruculuq işləri görülüb, o torpaqlara qayıdış prosesi artıq başlayıb, Azərbaycan azad edilmiş şəhər və kəndlərində müasir şəhər planlaşdırılması həyata keçirir. İşğaldan azad edilmiş şəhərlərin baş planları artıq hazırdır. Şuşa şəhərinin baş planı onun möhtəşəm tarixi və mədəni irsinin qorunması üzərində hazırlanıb. Qarabağ bölgəsi sənaye mərkəzinə çevriləcək. Ağdamda on minlərlə sakin üçün nəzərdə tutulmuş tamamilə yeni şəhər inşa olunur. Ağdam şəhərində ərazisi 200 hektar təşkil edən Ağdam Sənaye Parkı artıq fəaliyyətdədir, Zəngilan şəhəri onun təbiətə inteqrasiyası və park şəhərinə çevrilməsi baxışı ilə inşa edilir.

Bütün bu görülən işlər Azərbaycan dövlətinin, xalqımızın torpaqlarımıza necə sahib çıxdığının sübutudur. Qısa müddətdə icra olunan möhtəşəm bərpa-quruculuq layihələri bir daha əminlik yaradır ki, Azərbaycan xalqı gələcək illərdə də sarsılmaz birlik nümayiş etdirməklə torpaqlarımızın abadlaşdırılmasına, doğma Qarabağa yeni və xoşbəxt həyat gətirilməsinə nail olacaq, Qarabağ öz yeni həyatına qovuşacaqdır. Böyük qayıdış Qarabağa əbədi xoşbəxtlik gətirəcək. Prezident cənab İlham Əliyevin “Qarabağı cənnətə çevirəcəyik” ifadəsi çox yaxın zamanda böyük layihələr və işlər sayəsində Qarabağımızın gözəlliyinə gözəllik qatacaqdır.

Abdullayeva Dölət
132-134 nömrəli Təhsil Kompleksinin Riyaziyyat müəllimi

132-134 nömrəli Təhsil Kompleksində 27 sentyabr – Anım Günü ilə bağlı tədbir təşkil olundu. Tədbir Dövlət Himninin səsləndirilməsi ilə başladı. Vətən Müharibəsi Şəhidlərinin və 132-134 nömrəli Təhsil Kompleksinin Şəhid məzunlarının əziz xatirəsi bir dəqiqəlik sükutla yad edildi.

Tədbirdə Azərbaycan əsgər və zabitlərinin Vətən müharibəsində göstərdikləri igidlik və şücaət, onların həyat və döyüş yolunu əks etdirən videoçarxlar nümayiş olundu. Şagirdlər Prezident, müzəffər Ali Baş Komandan İlham Əliyevin rəhbərliyi ilə Vətən müharibəsində qazanılan tarixi qələbəyə, rəşadətli Ordumuza, Azərbaycan əsgərinin vətənpərvərliyinə, 44 gündə qəhrəmanlıq dastanı yazan əbədiyaşar Şəhidlərimizin əziz xatirəsinə həsr olunan ədəbi-bədii kompozisiya ilə çıxış etdilər.

Qəhrəman Şəhidlərimizin daima yüksək ehtiram və dərin məhəbbətlə yad olunduğunu, əziz xatirələrinin xalqımızın qəlbində əbədi yaşayacağını qeyd edən direktor Sara Xanlarova bildirdi ki, iki il öncə sentyabrın 27-də işğalçı Ermənistanın Qarabağda növbəti təxribatına cavab olaraq əks-hücum əməliyyatına başlayan Azərbaycan Ordusu möhtərəm Prezidentimiz, müzəffər Ali Baş Komandan İlham Əliyevin rəhbərliyi altında 44 günlük Zəfər yürüşü ilə ölkəmizin ərazi bütövlüyünü bərpa etdi. Silahlı Qüvvələrimiz hər bir kənd, qəsəbə, şəhər, eləcə də strateji yüksəkliklərin düşməndən təmizlənməsi uğrunda rəşadətlə döyüşərək böyük tarixi nailiyyətə imza atdı. Prezident, Ali Baş Komandan İlham Əliyevin qətiyyəti, iradəsi, ordumuzun cəsurluğu, qəhrəmanlığı nəticəsində Vətən müharibəsi zəfərlə başa çatdı. Bu tarixi Qələbə əbədiyaşar Şəhidlərimizin qanı, xalqımızın birliyi hesabına qazanıldı və Azərbaycanın müstəqillik tarixinə qızıl hərflərlə yazıldı. Azərbaycan xalqının əzmi və iradəsi, iqtisadi gücü, müasir ordu quruculuğu və xalq-iqtidar birliyi ölkəmizin qələbəsini təmin edən mühüm amillərdəndir. Azərbaycan xalqı 44 gün ərzində Vətən sevgisini, torpağa bağlılığını, döyüşkənliyini, bir yumruq kimi Prezidenti ətrafında birləşmək bacarığını bütün dünyaya nümayiş etdirdi. Şuşa döyüşləri və Qarabağın gözü Şuşa qalasının işğaldan azad olunması Azərbaycan və dünya hərb tarixinə həkk olunan əsl qəhrəmanlıq dastanına çevrildi.

S.Xanlarova vurğuladı ki, Ümummilli Lider Heydər Əliyev tərəfindən əsası qoyulan və Ulu Öndərin layiqli siyasi davamçısı möhtərəm Prezidentimiz, müzəffər Ali Baş Komandan İlham Əliyev tərəfindən layiqincə davam etdirilən müstəqil, düşünülmüş, uzaqgörən və müdrik siyasətin nəticəsində Azərbaycanın Vətən müharibəsindəki haqq savaşı bir çox ölkələr tərəfindən düzgün qarşılandı və post-müharibə dövründə regionumuzda yaranan yeni geosiyasi reallıqlar dünya ictimaiyyəti tərəfindən qəbul olunaraq təsdiqləndi. Bu, xalqımızın böyük tarixi uğurudur. Azərbaycan artıq dünyada qalib dövlət kimi tanınır və xalqımız müzəffər xalq kimi əbədi olaraq o torpaqlarda yaşayacaq. Bu tarixi nailiyyəti, uğuru hər kəs öz işində, öz əməlində davam etdirməlidir.

Son damla qanına qədər vuruşaraq Azərbaycan xalqına böyük zəfər yaşadan qəhrəman Şəhidlərimizin hər zaman xalqın qəlbində yaşayacaqlarını diqqətə çatdıran S.Xanlarova Azərbaycan tarixinə qızıl hərflərlə yazılan bu qələbədə öz payı olan 132-134 nömrəli Təhsil Kompleksinin Şəhid məzunlarının əziz xatirəsinin hər zaman uca tutulacağını qeyd etdi.

Tədbirdə çıxış edən Kompleksin Tarix müəllimləri Səmədova Tünzalə və Əfəndiyeva Aygün Ali Baş Komandan İlham Əliyevin apardığı uğurlu siyasətin nəticəsində 44 günlük Vətən müharibəsində qazanılan zəfərdən, Azərbaycan xalqının birliyindən, ordumuzun qüdrətindən, qəhrəman oğulların igidliyindən, hazırda işğaldan azad olunmuş torpaqlarımızda həyata keçirilən abadlıq və quruculuq işlərindən danışdılar. Tarixi qələbəni şərtləndirən amillər haqqında məktəblilərə məlumat verən müəllimlər vurğuladılar ki, Azərbaycan xalqı bu qələbə ilə milli kimliyimizi, gücümüzü və əzmimizi bütün dünyaya nümayiş etdirdi. Gənc nəslin yüksək vətənpərvərlik və Vətənə sevgi ruhunda böyüdüyünü qürurla qeyd edən müəllimlər, məktəblilərə Vətənə hər zaman ləyaqətlə xidmət etməyi, Şəhidlərimizin xatirəsini əziz tutmağı və Vətən torpağını göz bəbəyi kimi qorumağı tövsiyə etdilər.

27 sentyabr 2020-ci il. Bu tarixi gün Azərbaycan xalqının müasir dövr qəhrəmanlıq dastanının və Böyük Zəfərə gedən yolun başlanğıcı oldu. Artıq ikinci ildir ki, xalqımız bu tarixi günü dərin hüzn, eyni zamanda hədsiz fəxarət və qürur hissi ilə yad edir. Məhz bu tarixi gündə işğalçı Ermənistanın Azərbaycan torpaqlarında törətdiyi növbəti hərbi təxribata cavab olaraq Azərbaycan Silahlı Qüvvələri düşmənə qarşı əks hücuma keçdi və 44 günlük Vətən müharibəsi tarixə həkk olundu.

Müharibə hər zaman bir xalqın taleyində ən ağır hadisədir, çünki müharibə hər zaman itki, dağıntı, gözüyaşlı qalan ailələr, yarımçıq qalan həyatlar və fəda olunan gənc ömürlər deməkdir. Lakin 44 günlük Vətən müharibəsi Azərbaycan xalqının 30 illik Vətən torpağı həsrətinə son qoyan, Azərbaycanın ərazi bütövlüyünü bərpa edən və əzəli düşməndən nəhayət ki, qisas alınan əsl haqq mübarizəsi idi. Bütün dünya 44 gün ərzində Azərbaycan xalqını sanki yenidən tanıdı, Azərbaycan Silahlı Qüvvələrinin müzəffər Ali Baş Komandanına, ölkəmizdəki xalq-ordu-iqtidar birliyinə, Azərbaycan gəncliyinin Vətən sevgisinə, mərdliyinə, cəsarətinə, fədakarlığına yaxşı mənada qibtə etdi. Dünya hərb tarixində özünəməxsusluğu ilə seçilən 44 günlük Vətən müharibəsi Azərbaycanın ərazi bütövlüyünün bərpası ilə nəticələndi. Bu tarixi qələbə möhtərəm Prezidentimiz İlham Əliyevin müdrik rəhbərliyinin, Azərbaycan xalqının bir yumruq kimi birləşərək vahid amal uğrunda mübarizəsinin və qəhrəman Azərbaycan əsgər və zabitlərinin hərbi hazırlığı, döyüş və qələbə ruhu, fədakarlığı və vətənpərvərliyinin nəticəsidir.

27 sentyabr tarixi Azərbaycanda Anım Günüdür. Bu tarixi gündə hər il xalqımız bizə tarixi qələbəni qazandıran, qanıyla, canıyla Vətən torpağını düşmən tapdağından azad edən, şanlı Azərbaycan bayrağını azad Qarabağ torpaqlarında dalğalandıran qəhrəman övladlarını ehtiramla yad edəcək, onların Vətən qarşısındakı xidmətlərini, fədakarlığını əbədi yaşadacaq. Sentyabrın 27-də Azərbaycan Respublikasının Prezidenti İlham Əliyev və birinci xanım Mehriban xanım Əliyevanın Füzuli rayonuna səfəri zamanı dövlət başçısının Füzuli rayonunun Qaraxanbəyli kəndində 27 Sentyabr – Anım Gününə həsr olunmuş xatirə lövhəsi önündəki çıxışında qeyd etdiyi kimi: “Bütün Azərbaycan xalqı şəhidlərimizin əziz xatirəsini yad edir. Allah bütün şəhidlərimizə rəhmət etsin. Şəhidlərimiz Vətən, torpaq uğrunda öz canlarını fəda etdilər. Biz öz şəhidlərimizlə fəxr edirik. Qəhrəman əsgər və zabitlərimizlə fəxr edirik. Şəhidlərimizin qanı yerdə qalmadı, biz şəhidlərimizin qanını aldıq. Döyüş meydanında qisasımızı aldıq. Doğma torpaqlarımızı düşməndən azad etdik, ölkəmizin ərazi bütövlüyünü bərpa etdik.” Bəli, Anım günündə ehtiramla və dərin məhəbbətlə yad etdiyimiz Vətənin igid övladlarının, bütün Şəhidlərimizin qisası, qanı alındı. Düşmən rüsvayçı kapitulyasiya aktına imza atmağa məcbur oldu və Azərbaycanın əzəli torpaqları əsl sahiblərinə geri döndü. Biz həqiqətən də, xoşbəxt nəsilik ki, bu böyük tarixin addım-addım yazılmasına şahidlik etdik. Azərbaycan xalqı, Vətənin igid oğulları müstəqilliyimizin keşiyində əbədi duracaq və torpaq uğrunda canından keçən Şəhidlərimizin əziz xatirəsini əbədi yaşadacaqlar.

Cavadova Dilşad
132-134 nömrəli Təhsil Kompleksinin Biologiya müəllimi

Bu gün, 132-134 nömrəli Təhsil Kompleksində 27 sentyabr – Anım Gününə həsr olunan dərslər keçirildi.

Bütün siniflərdə Anım günü ilə bağlı təşkil olunan dərslərdə Vətən müharibəsi Şəhidlərinin xatirəsi ehtiramla yad edildi, məktəblilərə müzəffər Ali Baş Komandan Prezident İlham Əliyevin rəhbərliyi ilə rəşadətli Azərbaycan ordusunun 44 günlük Vətən müharibəsindəki qəhrəmanlıq dastanı, tarixi Qarabağ Zəfəri və Şəhidlik zirvəsinə ucalan Vətənin igid övladları haqqında məlumat verildi. Qeyd olundu ki, gənc və gələcək nəsillər hər daim Şəhidlərimizin əziz xatirəsini, qəhrəmanlığını, fədakarlığını və Vətən üçün xidmətlərini xatırlamalı, onlardan nümunə götürməli və Vətənin keşiyində mərdliklə durmalıdırlar.

Məktəblilər Təhsil Kompleksinin Tarix Muzeyində yaradılmış Şəhid məzunlar guşəsini ehtiramla ziyarət etdilər və 132-134 nömrəli Təhsil Kompleksinin qəhrəman məzun Şəhidlərinin əbədiyaşar xatirəsini böyük məhəbbət və qürurla yad etdilər.

Allah bütün Şəhidlərimizə rəhmət eləsin! Şəhidlərimizin əziz xatirəsi qəlblərimizdə  əbədi olaraq yaşayacaq.

132-134 nömrəli Təhsil Kompleksinin Rus bölməsi “8 b” sinif şagirdləri erməni işğalçıları ilə döyüşlərdə Şəhid olmuş və 44 günlük Vətən müharibəsində ölkəmizin suverenliyi və ərazi bütövlüyü uğrunda canlarını fəda etmiş  qəhrəman Vətən övladlarının xatirəsini yad etmək üçün İkinci Fəxri Xiyabanı ziyarət etdilər.

Ziyarət zamanı bütün Şəhidlərimizin unudulmaz xatirəsi dərin hörmət və ehtiramla anıldı, məzarları üzərinə qərənfillər düzüldü.

Məktəblilər 132-134 nömrəli Təhsil Kompleksinin qəhrəman məzunu, 44 günlük Vətən müharibəsinin Şəhidi Nicat Tarıverdiyevin məzarını ziyarət etdilər, qəhrəman Şəhidimizin Anası Şükran xanımla görüşdülər.

Torpaq, uğrunda ölən varsa Vətəndir! Azərbaycan xalqı 44 günlük Vətən müharibəsinin hər günündə dönə-dönə sübut etdi ki, üzərinə ayaq basdığımız, müqəddəs bildiyimiz bu topraqların hər qarışı Vətəndir! Zəfərə gedən yolun hər addımında Şəhid verildi, minlərlə gənc Vətəndən pay olmayacağını Vətən torpağı ilə bütünləşərək sübuta yetirdi. Bu şanlı tarixi bizə yaşadanları dərin hörmət və ehtiramla yad edirik! Ruhunuz şad olsun, igid Vətən oğulları!

Sentyabrın 22-də Səbail rayon ümumtəhsil məktəblərində bu il ali məktəblərə qəbul imtahanında yüksək bal toplayan məzunlarla görüş keçirildi. Tədbirdə Səbail rayon İcra Hakimiyyətinin başçısı Vüqar Zeynalov, ümumtəhsil məktəblərinin direktorları, müəllimlər, şagirdlər və valideynlər iştirak etdilər.

Görüşdə iştirak edən 132-134 nömrəli Təhsil Kompleksinin 600-dən çox bal toplayan məzunları Səbail Rayon İcra Hakimiyyəti başçısının Fəxri Fərmanı ilə təltif olundular.

Tədbirdə çıxış edən Səbail Rayon İcra Hakimiyyətinin başçısı Vüqar Zeynalov uğur qazanmış gəncləri, təhsil ictimaiyyətini və valideynləri təbrik edərək Azərbaycan Respublikasının Prezidenti cənab İlham Əliyev və Birinci vitse-prezident Mehriban xanım Əliyeva tərəfindən təhsilin inkişafına yönəlmiş böyük diqqət və qayğı sayəsində respublikamızın hər bir bölgəsində olduğu kimi Səbail rayonunda da təhsilin səviyyəsinin günü-gündən artmaqda olduğunu bildirdi, ölkə başçısının imzaladığı Sərəncamlar və Dövlət Proqramlarına əsasən rayon ərazisində orta və məktəbəqədər təhsil müəssisələrinin böyük əksəriyyətinin əsaslı təmir olunduğunu, təhsil ocaqlarının maddi-texniki bazasının möhkəmləndirildiyini, təhsil işçilərinin həyat səviyyəsinin əhəmiyyətli dərəcədə yaxşılaşdığını qeyd etdi.

Daha sonra çıxış edən məktəb direktorları hazırda bütün sahələrdə olduğu kimi təhsil sahəsindədə islahatlar və böyük quruculuq işləri aparıldığını vurğuladılar. Qeyd olundu ki, işğaldan azad edilən bölgələrimizdə təhsil infrastrukturu müvəffəqiyyətlə qurulur, “ağıllı kənd” pilot layihəsi çərçivəsində müasir təhsil müəssisələrinin sürətli tikintisi aparılır. Çox tezliklə Ölkə başçısı cənab İlham Əliyevin Qarabağda təməllərini qoyduğu bütün məktəblərdə qaynar təhsil mühitinə start veriləcək və burada oxuyan Azərbaycan övladları elm və bilikləri ilə dünyaya səs salacaqlar. Bu da onu göstərir ki, Azərbaycan təhsili hərtərəfli qayğı ilə əhatə olunmuşdur.

Sonda 600-dən yüksək bal toplamış məzunlar Səbail Rayon İcra Hakimiyyəti başçısının Fəxri Fərmanı ilə təltif edildilər, onlarla xatirə şəkli çəkdirildi.

Sentyabrın 15-də yeni 2022/2023-cü tədris ilinin ilk dərs günü 132-134 nömrəli Təhsil Kompleksində bütün siniflərdə ilk dərslər “Qarabağ Azərbaycandır!” mövzusuna həsr olundu.

Azərbaycan Respublikasının Dövlət Himni səsləndirildikdən sonra sentyabrın 12-si gecə və 13-ü səhər saatlarında Ermənistan silahlı qüvvələri tərəfindən Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində törədilən genişmiqyaslı təxribatlar nəticəsində həlak olan Şəhidlərimizin əziz xatirəsi ehtiramla yad olundu.

Təhsil Kompleksində bütün siniflərdə ilk dərslər “Qarabağ Azərbaycandır!” mövzusuna həsr olundu. Dərslərdə müəllimlər məktəblilərə Azərbaycan Prezidenti, müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusunun 44 günlük Vətən müharibəsində qazandığı tarixi Qarabağ Zəfəri və işğaldan azad olunan Azərbaycan torpaqlarında həyata keçirilən geniş bərpa, yenidənqurma işləri haqqında ətraflı məlumat verdilər. Şagirdlərə Zəfərə gedən yolla bağlı videoçarxlar təqdim edildi, qəhrəman Şəhidlərimiz hörmət və ehtiramla anıldı.

Allah bütün Şəhidlərimizə rəhmət eləsin! Qarabağ Azərbaycandır!