Archives

“Heydər Əliyev İli” çərçivəsində 132-134 nömrəli Təhsil Kompleksində keçirilən və Azərbaycan xalqının Ümummilli Lideri Heydər Əliyevin 100 illik yubileyinə həsr olunan “MƏN FƏXR EDİRƏM Kİ, AZƏRBAYCANLIYAM!” adlı layihənin qaliblərinin mükafatlandırılma mərasimi keçirildi.

Tədbirdə 132-134 nömrəli Təhsil Kompleksinin “MƏN FƏXR EDİRƏM Kİ, AZƏRBAYCANLIYAM!” layihəsində şeir, inşa yazı, rəsm, STEAM, ən yaxşı video-rolik, mahnı müsabiqələri və şahmat, futbol idman yarışları üzrə I, II və III yerin qalibləri olan Kompleks şagirdləri diplomlarla mükafatlandırıldılar.

#ÜmummilliLider #UluÖndər #HeydərƏliyev #HeydərƏliyev100

Mayın 10-da müasir müstəqil Azərbaycan dövlətinin memarı və qurucusu, Ümummilli Lider Heydər Əliyevin anadan olmasının 100-cü ildönümü münasibətilə Təhsil Kompleksimizin ibtidai siniflərində ilk dərslər Ulu Öndər Heydər Əliyevin həyat və fəaliyyətinə həsr olundu.

Dərslərdə müəllimlər şagirdlərə xalqımızın Ümummilli Liderinin həyat yolu və zəngin siyasi irsi barədə geniş məlumat verdilər. Məktəblilər Ulu Öndərə həsr olunan təqdimatlarla çıxış etdilər, şerlər səsləndirdilər.

Birincilərimiz üçün Kompleksin “Ulu Öndər Heydər Əliyev” Muzeyinə ekskursiyalar təşkil olundu.

Foto: Azərbaycan bölməsi  “2 a”, “2 c”, “3 c”, “4 a”, Rus bölməsi  “1 a”, “1 b”, “1 c”, “1 e”, “2 a”, “2 b”, “3 c”, “4 b”

Rus bölməsi “2 c” sinif şagirdləri Ümummilli Lider Heydər Əliyevin 100 illik yubileyi münasibətilə Fəxri xiyabanda Ulu Öndər Heydər Əliyevin məzarını ziyarət etdilər və müasir müstəqil Azərbaycan dövlətinin memarı və qurucusu Heydər Əliyevin əziz və əbədiyaşar xatirəsini ehtiramla yad etdilər.

Ulu Öndərin 100 illik yubileyi münasibətilə xüsusi dərs təşkil olundu, məktəblilər Ümummilli Liderin şərəfli həyat yolu, dövlət quruculuğu və zəngin siyasi irsi haqqında təqdimatlar, posterlər hazırladılar, çıxışlar etdilər.

Pedaqoq: Qəniyeva Sevda

132-134 nömrəli Təhsil Kompleksi və “İrəli” İctimai Birliyinin birgə təşkilatçılığı ilə müasir müstəqil Azərbaycan dövlətinin qurucusu, dahi siyasətçi və qüdrətli dövlət xadimi Ulu Öndər Heydər Əliyevin anadan olmasının 100-cü ildönümü münasibətilə “Heydər Əliyev – 100: Böyük ömrün dastanı” adlı yubiley tədbiri keçirildi.

Yubiley tədbirində Azərbaycanın əməkdar incəsənət xadimi, dövlət mükafatı laureatı, tanınmış kinorejissor Vaqif Mustafayev, “İrəli” İctimai Birliyinin sədri Şahin Rəhmanlı və digər qonaqlar iştirak etdilər.

İlk öncə Dövlət Himni səsləndirildi.

Çıxış edən Təhsil Kompleksinin direktoru, Əməkdar müəllim Sara Xanlarova müstəqil Azərbaycan dövləti üçün ən taleyüklü dövrlərdə misilsiz tarixi xidmətlər göstərmiş böyük şəxsiyyət, görkəmli dövlət xadimi, Azərbaycan xalqının Ümummilli Lideri Heydər Əliyevin xalqımızın milli azadlıq və müstəqillik tarixində xilaskarlıq rolu, mənalı həyat yolu, zəngin və çoxşaxəli irsi barədə danışdı. S.Xanlarova qeyd etdi ki, bütün həyatını Azərbaycanın tərəqqisi, xalqımızın rifahına həsr edən Ulu Öndər Heydər Əliyevin Azərbaycan xalqı qarşısındakı ən böyük xidmətlərindən biri şah əsəri olan Azərbaycanı sağlığında layiqli siyasi varisi, möhtərəm Prezidentimiz İlham Əliyevə etibar etməsidir. Azərbaycanda ötən dövr ərzində istisnasız bütün sosial-iqtisadi sahələrdə əldə olunan uğurlar, ölkəmizin ildən-ilə dinamik inkişafı, ən əsası isə 44 günlük Vətən müharibəsində Azərbaycan xalqının möhtəşəm qələbəsi Ulu Öndər Heydər Əliyevin uzaqgörən ideyalarının və Prezident cənab İlham Əliyevin düşünülmüş və Azərbaycan xalqının milli maraqlarına xidmət edən siyasətinin təntənəsidir. Vurğulandı ki, Ulu Öndərin zəngin siyasi irsinin, şərəfli həyat və fəaliyyətinin gənc nəsil tərəfindən öyrənilməsi olduqca önəmlidir. Çünki görkəmli dövlət xadimi, dahi şəxsiyyət Heydər Əliyevin həyat yolu və zəngin irsi, Onun Vətən sevgisi və Azərbaycançılıq məfkurəsi gənc və gələcək nəsillərimiz üçün böyük örnəkdir. S.Xanlarova Ulu Öndər Heydər Əliyevin Azərbaycan təhsilinin inkişafındakı müstəsna xidmətlərini xüsusi vurğulayaraq görkəmli dövlət xadiminin ümumtəhsil məktəblərinə, müəllim peşəsinə, şagirdlərə və Azərbaycanın gələcəyi olan gənclərə olan diqqət və qayğısından geniş bəhs etdi. Bildirildi ki, Ulu Öndərin əziz xatirəsi xalqımız tərəfindən əbədiyyən yaşadılacaq, Ümummilli Lider Heydər Əliyev hər zaman böyük sevgi və ehtiramla yad olunacaqdır.

Ulu Öndər Heydər Əliyev haqqında 12 sənədli filmin və “Heydər Əliyev” bədii filminin müəllifi olan Azərbaycan Respublikasının xalq artisti Vaqif Mustafayev çıxışında Ümummilli Lider haqqında böyük hörmət və ehtiramla danışdı. Kinorejissor qeyd etdi ki, “Heydər Əliyev xalqımızın yetişdirdiyi ən böyük və unudulmaz şəxsiyyətlərdən biri idi. İllər gəlib keçəcək, zaman ötəcək, nəsillər dəyişəcək, lakin Heydər Əliyevin Azərbaycan xalqı qarşısındakı əvəzsiz xidmətləri heç vaxt unudulmayacaq. Xüsusilə, mədəniyyət və kino işçilərinə onun göstərdiyi diqqət və qayğı hər cür təqdirə layiqdir. Bu sahədə fəaliyyət göstərən elə sənətkar tapmaq olmaz ki, Ulu Öndərin qayğısından kənarda qalsın. Mən dünya şöhrətli belə bir şəxsiyyəti tanıdığıma və onun həyatının müəyyən epizodlarını kinolentin yaddaşına köçürdüyümə görə qürur hissi duyuram.” Ölkə başçısı, müzəffər Ali Baş Komandan İlham Əliyevin rəhbərliyi ilə qazanılmış tarixi Qarabağ zəfərinin Ulu Öndər Heydər Əliyevin 100 illik yubileyinə ən böyük hədiyyə olduğunu vurğulayan V.Mustafayev Heydər Əliyev haqqında çəkdiyi filmlərin, o cümlədən “Heydər Əliyev. Bir həsədin tarixi” və “Heydər Əliyev. Əsl məhəbbət haqqında” sənədli filmlərinin ərsəyə gəlməsi, dahi şəxsiyyətlə şəxsi görüşləri, səmimi söhbətləri barədə geniş bəhs etdi və Ulu Öndər haqqında unudulmaz xatirələrini məktəblilərlə bölüşdü. V.Mustafayev məktəblilərə yaxşı təhsil almağı və Vətənə layiq vətəndaşlar kimi yetişməyi tövsiyə etdi.

“İrəli” İctimai Birliyinin sədri Şahin Rəhmanlı çıxışı zamanı Ulu Öndər Heydər Əliyevin həyatının bütün mərhələlərində daim Azərbaycanın inkişaf və tərəqqisi naminə çalışdığını, Ulu Öndər tərəfindən əsası qoyulan dövlət siyasətinin hazırda Prezident İlham Əliyev tərəfindən eyni həssaslıq və uğurla davam etdirildiyini diqqətə çatdırdı. Qeyd olundu ki, Azərbaycanda dövlət gənclər siyasətinin əsası Ümummilli Lider Heydər Əliyev tərəfindən qoyulub. Ulu Öndərin gənclər sahəsinə olan diqqəti bu sahənin inkişafını şərtləndirən əsas amillərdən biri idi. Ölkəmizdə gənclərin sağlam, vətənpərvər və milli ruhda inkişafını özünün əsas istiqaməti olaraq müəyyənləşdirən “İrəli” İctimai Birliyi də bu sahədə fəaliyyəti ilə dövlət gənclər siyasətinə töhfələr verməkdədir.

Yubiley tədbirində Ulu Öndər Heydər Əliyevin sevdiyi mahnılar pianinoda ifa olundu, Ümummilli Liderin həyat yolu və çoxşaxəli dövlətçilik fəaliyyətinin əks olunduğu videoçarxlar nümayiş olundu. 132-134 nömrəli Təhsil Kompleksinin şagirdlərinin ifasında müstəqil və müasir Azərbaycanın qurucusu, Ulu Öndər Heydər Əliyevin həyat və fəaliyyətinə həsr olunan ədəbi-bədii kompozisiya səsləndirildi və səhnəciklər təqdim olundu.

Ümummilli Lider Heydər Əliyevin anadan olmasının 100-cü ildönümü münasibətilə 132-134 nömrəli Təhsil Kompleksinin IB MYP (International Baccalaureate/ Beynəlxalq Bakalavriat Proqramı) 8-ci sinif şagirdləri Fəxri xiyabanda Ulu Öndər Heydər Əliyevin məzarını ziyarət etdilər.

Məktəblilər müasir müstəqil Azərbaycan dövlətinin memarı və qurucusu Ulu Öndər Heydər Əliyevin əziz və əbədiyaşar xatirəsini ehtiramla yad etdilər.

#ÜmummilliLider #UluÖndər #HeydərƏliyev #HeydərƏliyev100

Faşizm üzərində Qələbənin 78-ci ildönümü münasibətilə xüsusi dərslər təşkil olundu.

Faşizm üzərində Qələbənin əldə olunmasında Azərbaycan xalqının böyük xidmətləri olub, Bakı nefti əvəzsiz rol oynayıb.

İkinci Dünya müharibəsinin veteranları ilə qürur duyur, böyük şücaətlə iştirak etdikləri döyüşlərdə həlak olan soydaşlarımızın xatirəsini ehtiramla yad edirik!

Foto: Rus bölməsi “2 c” sinifi və Azərbaycan bölməsi “7 b” sinifi

Ümummilli Lider Heydər Əliyevin anadan olmasının 100-cü ildönümü münasibətilə 132-134 nömrəli Təhsil Kompleksində IB (International Baccalaureate/ Beynəlxalq Bakalavriat Proqramı) və 245 nömrəli orta məktəbin şagirdlərinin iştirakı ilə “Gənc tədqiqatçıların Konfransı” keçirildi.

132-134 nömrəli Təhsil Kompleksi və 245 nömrəli orta məktəbin birgə təşkilatçılığı ilə keçirilən Konfransda məktəblilər Ulu Öndər Heydər Əliyevin zəngin dövlətçilik irsi və Azərbaycan xalqı, müstəqil Azərbaycan dövləti üçün tarixi xidmətlərinə həsr olunan çıxışlar etdilər.

Mayın 3-də 132-134 nömrəli Təhsil Kompleksinin şagirdləri arasında “İrəli” İctimai Birliyinin təşkilatçılığı ilə “Heydər Əliyev ili”-nə həsr olunmuş “Nə? Harada? Nə zaman?” İntellektual oyunu keçirildi.

7 komandanın iştirakı ilə böyük rəqabət şəraitində keçən oyunda ilk üç yerin qalib komandalarının üzvləri Sertifikatlarla təltif olundular.

132-134 nömrəli Təhsil Kompleksində görkəmli oftalmoloq alim, Əməkdar elm xadimi, akademik Zərifə xanım Əliyevanın anadan olmasının 100-ci ildönümü münasibətilə tədbir keçirildi.

Tədbirdə çıxış edən Kompleksin direktoru Sara Xanlarova qeyd etdi ki, elmi fəaliyyəti, ən əsası isə insanlara olan sevgisi, xeyirxahlığı ilə Azərbaycan xalqı tərəfindən hər zaman böyük məhəbbət və ehtiramla xatırlanan Zərifə xanım özündə əsl Azərbaycan xanımına xas olan nəcib və ali insani keyfiyyətləri, yüksək əxlaqı, mənəviyyatı, saflığı təcəssüm etdirirdi. Görkəmli dövlət və elm xadimi, bütün bilik və bacarığını xalqa xidmətə sərf etmiş Əziz Əliyevin ailəsində dünyaya göz açan Zərifə xanım valideynlərinə layiqli bir övlad, məşhur alim, tanınmış həkim, istedadlı insan, sədaqətli ömür yoldaşı və qayğıkeş ana idi. Vicdanı, əməli pak olan Zərifə xanım oftalmologiya elminin inkişafına böyük töhfələr vermiş və oftalmologiya aləmində ən yüksək mükafata – SSRİ Tibb Elmləri Akademiyasının akademik M.İ.Averbax adına mükafatına layiq görülən ilk qadın həkim olmuşdur.

Zərifə xanım Əliyeva, eyni zamanda müstəqil Azərbaycan dövlətinin memarı və qurucusu, bütün mənalı ömrünü Vətəninin və xalqının tərəqqisinə həsr etmiş dahi şəxsiyyətin – Ümummilli Lider Heydər Əliyevin vəfalı ömür-gün yoldaşı, sədaqətli dostu və etibarlı silahdaşı olmuşdur. İnsanların gözlərinə şəfa vermək kimi müqəddəs və şərəfli peşəyə sahib olan Zərifə xanım Əliyevaya eyni zamanda həm Prezident xanımı olmaq, həm də Prezident anası olmaq kimi nadir insanlara nəsib olan tale qismət olmuşdur. S.Xanlarova vurğuladı ki, Zərifə xanım sadəliyi və səmimiliyi ilə gözəllik yaradırdı. Məhz bu isti, vətənpərvər ocaqda böyüyüb, boya-başa çatan, Zərifə xanımın ailə tərbiyəsinin, görkəmli dövlət xadimi Ulu Öndər Heydər Əliyevin siyasi məktəbinin layiqli varisi, nəinki Azərbaycan, bütün dünya üçün fenomenal şəxsiyyət olan möhtərəm Prezidentimiz İlham Əliyev müstəqil Azərbaycanın ən şanlı qələbələrinə imza atır. Ölkə başçısı, müzəffər Ali Baş Komandan İlham Əliyev 30 illik ağrılı münaqişəni siyasi iradəsi və idarəçilik məharəti ilə 44 gündə həll etdi və möhtəşəm Qarabağ Zəfəri Azərbaycan tarixinə qızıl hərflərlə həkk olundu. Vurğulandı ki, ümumtəhsil məktəblərində Azərbaycanın görkəmli şəxsiyyətlərinə həsr olunan tədbirlərin, xatirə günlərinin təşkili gənc və gələcək nəslin tərbiyəsində mühüm əhəmiyyət kəsb edir. Zərifə xanım Əliyevanın nümunəvi həyat yolu, ali insani keyfiyyətləri, xeyirxahlığı və insan sevgisi kiçikdən-böyüyə hər kəs üçün böyük örnəkdir və gözəl insan Zərifə xanımın işıqlı xatirəsi daima Azərbaycan xalqı tərəfindən ehtiramla yad olunacaqdır. Direktor xüsusi qeyd etdi ki, qədim tarixə və zəngin təhsil ənənələrinə malik olan 132-134 nömrəli Təhsil Kompleksində təhsil alan, bu təhsil ocağından məzun olan hər bir şagird öz gələcəyini doğma Azərbaycanımızın inkişafında, çiçəklənməsində görür. Şagirdlərimiz görkəmli alim, gözəl insan, nümunəvi ana və həyat yoldaşı olan Zərifə xanım Əliyeva kimi görkəmli Azərbaycan şəxsiyyətlərinin həyat və elm yolunu öyrənir, onlardan nümunə götürür. S.Xanlarova məktəblilərə milli-mənəvi dəyərlərimizə hər zaman sadiq qalmağı, azərbaycançılığımızla fəxr etməyi və dünyanın harasında olurlarsa olsunlar Vətənimizi ləyaqətlə təmsil etməyi arzu etdi.

Tədbirdə görkəmli oftalmoloq alim Zərifə xanım Əliyevanın həyat və fəaliyyəti ilə bağlı videoçarxlar nümayiş olundu. Kompleksin şagirdlərinin ifasında oftalmologiya elminə verdiyi töhfələri bu gün də aktuallığını qoruyan, biliyi ilə yanaşı, insanpərvərliyi ilə də seçilən Zərifə xanımın həyat və elm yoluna həsr olunan ədəbi-bədii kompozisiya səsləndirildi, səhnəciklər təqdim olundu.

Rus bölməsi Fransız modeli “1 a” sinif şagirdləri Rus dili dərsində Valentin Dmitrieviç Berestovun “Leylək və Bülbül” təmsilini öyrəndilər və təmsildəki tərbiyəvi məqamları birlikdə təhlil etdilər.

Uşaq yazıçılarının əsərlərindən dərs-tərbiyə işində istifadə yüksək tərbiyəvi əhəmiyyətə malikdir. Uşaqlar bu formatdakı dərslərdə müəlliflərlə birlikdə dəyişən dünyanı kəşf edir, mənimsəyir, fantaziyalar qurur və yeni məlumatlar, bacarıqlar mənimsəyirlər.

Pedaqoq: Nağıyeva İradə